Wɔnantsew Po Ase Kɛkã Asɛmpa No

BƆ

Wɔ North Sea bea bi a ɔbɛn German mantɔw Schleswig-Holstein no ne mpoano wɔ anee afamu no, nyimpa bɛyɛ 300 tsetse nsupɔw nketsenketse bi a wɔka bɔ mu frɛ no Halligen no do. Ɔyɛ dɛn yɛ na dɛm nkorɔfo yi tum tse Bible mu nsɛm a Jehovah Adasefo kã no bi?—Matthew 24:14.

Adasefo no dze hɛmba akɛse twa kwan kɔ nsupɔw ahorow no bi do. Naaso, mbrɛ ɔbɛyɛ na Adasefo no edu hɔn a wɔwɔ nsupɔw nkaa no do no nkyɛn no, wɔfa kwan fofor bi do—wɔnantsew fa po no ase bɛyɛ kilomita enum (akwansin 3). Ɔyɛ dɛn mbɔ na iyi tum yɛ yie?

Mber A Po No Wew

Adasefo no hwɛ mber a po no wew. Wɔ North Sea no, po a ɔwɔ Halligen apaamu hɔ no wew bɛyɛ mita 3 (anamɔn 10) wɔ dɔnhwer esia biara ekyir, na ɔsan yɛ ma bio wɔ dɔnhwer esia ekyir! Sɛ nsu no wew a, nna po no ase ada hɔ, na Adasefo no nantsew fa do kɔ nsupɔw ahorow ebiasa do.

Dɛm kwan yi ne twa tse dɛn? Ulrich a ɔwɔ suahu dɛ kuw no kwankyerɛfo no kã dɛ: “Ɔgye hɛn ndɔnhwer ebien ana yeedur Halligen no kor do. Mpɛn pii no, yɛdze hɛn nan to famu. Iyi nye kwan a oye na ɔyɛ mberɛw sen biara a yebotum afa do anantsew po no ase. Wɔ awɔwber mu no yɛhyɛ asopaatse.”

Dza ɔwowɔ kwan no do no yɛ ahobow. Ulrich kã dɛ: “Sɛ enam hɔ a, ɔtse dɛ gyama enam ekyin-woraba fofor bi do. Po no ase beebi yɛ atɛkyɛ, mbea bi so yɛ aboabo, na mbea afofor so yɛ mpɔnkɔfuw. Ihu po mu nnoma, kɔtɔ, nye mboa ahorow ahorow pii.” Ɔwɔ mu wɔ mu ara a, kuw no twa epo nsu bi a ayɛ dɛ esutsen wɔ kwan no do, wɔfrɛ esutsen ahorow yi Priele wɔ German kasa mu.

Hɔn a wotwa dɛm kwan yi hyia nsɛndzendzen ahorow bi. Ulrich kã dɛ: “Ibotum ayew seseiara, tsitsir no sɛ bɔw wɔ hɔ a. Ntsi ɔba no dɛm a, yɛdze kɔmpase nye GPS efir dzi dwuma, na yɛdze hɛn ber yɛ edwuma paa mbrɛ ɔbɛyɛ a yɛbɛba no nna nsu no nnyirii.”

Wɔrekã asɛmpa no wɔ Halligen nsupɔw no kor do

Aso dɛm edwumadzen yi nyinara ho hia? Ulrich kã ɔbarimba bi a oedzi bɛyɛ mfe 90 na no mboree ho asɛm dɛ ɔkenkan Ɔweɔn-Aban nye Awake! a ɔba fofor biara no. Ulrich kã dɛ: “Da kor bi, ber dzii tsiaa hɛn ara ma yenntum annkɛsera ɔbarimba yi. Naaso, ansaana yebesim efi hɔ no, ɔbarimba no dze baesekel dzii hɛn ekyir bɔtoo hɛn wɔ kwan no do, na ɔkãa dɛ: ‘Na hom remmfa me Ɔweɔn-Aban no mma me a?’ Nokwasɛm nye dɛ, hɛn enyi gyee dɛ yɛdze maa no.”