Wɔ mfe 2014 mu no, Jehovah Adasefo Akwankyerɛ Kuw no maa akwankyerɛ bi ma wɔyɛɛ nhyehyɛɛ fofor bi a ɔbɛma wɔdze Bible no mu asɛmpa edu Europe nye North America etsifi afamu. (Ndwuma 1:8) Ahyɛse no, nhyehyɛɛ no maa wɔdze adwen sii mbea ahorow bi a ɔwowɔ Alaska (U.S.A.), Lapland (Finland) na Nunavut, nye Northwest Territories (Canada) do.

Jehovah Adasefo dze mfe pii akɛserasera dɛm mbea yi akɛkã asɛmpa no wɔ hɔ. Naaso nna Adasefo no kɔ a, wɔnntsena hɔ nnkyɛr. Afei so mpɛn pii no, dza nna wotum yɛ ara nye dɛ wɔma kurow mu hɔfo no Bible ho nwoma, nna woegya hɔn hɔ kɔ.

Wɔ dɛm nhyehyɛɛ fofor yi ase no, Jehovah Adasefo edwumayɛbea nkorbata a ɔhwɛ hɛn asɛnka edwuma no do wɔ ekyirkyir nsaase do wɔ etsifi afamu no, to nsa frɛ ber nyina asomfo (akwampaaefo) ma wokedzi annyɛ yie koraa no abosoom ebiasa wɔ nsaasesin bi mu. Sɛ nkorɔfo pii kyerɛ enyigye dɛ wobosũa Bible no a, asomfo yi botum akyɛr kakra wɔ hɔ na wɔaayɛ baguamu nhyiamu mpo wɔ hɔ.

Naaso, nsɛndzendzen pii wɔ Etsifi afamu hɔ. Wɔsomaa akwampaaefo beenu bi kɔr Barrow, Alaska. Hɔn mu kor fi California pomu afamu, na nyia ɔkã ho no so fi Georgia wɔ U.S.A. Ber a odzi kan a wohyiaa awɔwber wɔ Barrow no, wimu tsebea no yɛɛ nwinwinnwin bodur degree -38 (-36°F)! Naaso, wodur kurow no mu hɔ no, wɔ abosoom kakraabi ntamu no, nna wɔaserasera efie ahorow a ɔwɔ kurow no mu hɔ no mu ɔha mu nkyekyɛmu 95. Afei so, nna wɔahyɛ Bible adzesũa ahorow anan ase, a no mu kor nye dza wɔnye John yɛ no. John nye no mpona no nyinara rusũa What Does the Bible Really Teach? bukuu no, na ɔnye n’anyɛnkofo nye n’edwumamufo kyɛ dza osũa no. Afei so ɔdze JW Library app no bue Examining the Scriptures Daily no kenkan daa asɛm no wɔ no fon do.

Kaar kwan biara nnyi hɔ a wɔfa do kɔ Rankin Inlet a ɔwɔ Canada kurow Nunavut no mu. Ntsi akwampaaefo beenu bi dze wimu hɛn kɔr dɛm ekuroba kakraba yi ase, na wɔkɛhyɛɛ Bible adzesua ahorow pii ase wɔ hɔ. Aber a ɔbarimba bi hwɛɛ video a wɔato dzin Ebɛnadze na Ɔkɔ do wɔ Hɛn Ahendzi Asa Do? no wiei no, obisaa dɛ, ebɛn aber na wɔbɛba ebesi Ahendzi Asa wɔ kurow no mu hɔ. Ɔdze kãa ho dɛ, “Sɛ wobesi no nna meda ho ara wɔ ha dze a, mebɛba nhyiamu ahorow no bi.”

Wɔdze akwampaaefo bi kɔr Savukoski wɔ Finland, bea bi a nwansan ayɛ hɔ ma, hɔn dodow tse dɛ nyimpa a wɔwɔ kurow mu hɔ no hɔn dodow mpɛn du. Akwampaaefo no kãa dɛ: “Hɔ yɛ nwin papaapa, na esukwankyɛba so tɔ paa.” Naaso, wɔkãa dɛ ber a wɔdze baa kurow no mu hɔ no fata papaapa. Ebɛnadze ntsi a? Wɔse: “Yeetum ewie nsaasesin no mu edwuma kofekofe. Nkorɔfo siesie kaar kwan a ɔwɔ kurow no mu hɔ no do, na woyiyi esukwankyɛba no nyinara fifi hɔ. Osian awɔw no ntsi, nkorɔfo taa tsena fie paa.”

Mbɔdzen ahorow a yɛabɔ dɛ yɛbɛkã Bible mu nokwasɛm no wɔ ekyirkyir nsaase do wɔ etsifi afamu no atwetwe nkorɔfo pii adwen. Aber a akwampaaefo bi kɛseraa aban no ananmusinyi bi wɔ Alaska kurow bi mu no, aban ananmusinyi no dze nkɔmbɔ no a wɔbɔe no too intanɛt do, ɔdze krataaba a wɔato dzin Nyankopɔn N’ahendzi No, Ɔyɛ Ebɛn Adze? no ho mfonyin so kãa ho, na ɔkãa asɛmpa faa akwampaaefo no ho.

Wɔ kurow bi a wɔfrɛ no Haines wɔ Alaska mu no, akwampaaefo beenu bi gyee nkorɔfo baawɔtwe fɛw do baa nhyiamu a wɔyɛ no wɔ kurow mu hɔ nwomakorabea no mu no ase. Kurow mu hɔ dawurbɔ krataa no bɔɔ amandzɛɛ dɛ, mbarimba beenu bi fi Texas nye North Carolina aba kurow mu hɔ nye ankorankor reyɛ fie Bible adzesua. Dawurbɔ no baa ewiei dɛ: “Kɔ jw.org do na kosũa pii kã ho.”