Canadafo wɔ hɔnankasa hɔn kurow mu kasa bɔbor 60, na Canadafo bɛyɛ 213,000 na wɔkyerɛ dɛ wɔdze kasa yi mu kor twaa hɔn mfunuma.

Jehovah Adasefo no mu pii esũa dɛm kasa ahorow yi no mu kor, mbrɛ ɔbɛyɛ a wobotum akã asɛmpa no ma akã hɔn a wɔkã dɛm kasa no hɔn akoma. Ɔdze bodur mfe 2015 n’ewiei no, nna nyimpa bɔbor 250 na woewie skuul a Adasefo no yɛ dze kyerɛ dɛm kasa ahorow yi no bi.

Bio so, Jehovah Adasefo akyerɛ Bible ho nwoma nye video ntsiatsiamba ahorow ase akɔ Canadafo hɔn kurow mu kasa ahorow awɔtwe mu: Algonquin, Blackfoot, Plains Cree, West Swampy Cree, Inuktitut, Mohawk, Odawa, nye Northern Ojibwa. a

Hɔn a wosũa kasa a wɔkã no wɔ nkuraase no gye to mu dɛ, ɔyɛ a otum yɛ dzen paa. Carma kã dɛ: “Aber a mehyɛɛ ase dɛ moroboa Blackfoot kasa asekyerɛ kuw no, nna ɔtse dɛ gyama makyekyer m’enyiwa na mereyɛ edwuma no. Nna menntse kasa no papa. Nna emi a, munntum nnkenkan Blackfoot kasa no, emi so a, metse a menntse ase.”

Terence a ɔnye West Swampy Cree kasa asekyerɛ kuw no yɛ edwuma no kã dɛ: “Nkasafua no mu pii yɛ atsentsen, na no bɔ so yɛ dzen.” Daniel, a ɔyɛ ber nyina somfo wɔ Manitoulin Island a ɔwɔ Ontario no kã dɛ: “Yennyi nwoma ahorow wɔ kasa no mu a yɛdze bɛyɛ nhwehwɛmu. Ɔkwan a oye sen biara a ibotum afa do esũa Odawa kasa nye dɛ, ebɔhwehwɛ akɔkora anaa aberwa bi wɔ ekuroba no ase ma ɔaakyerɛ wo.”

Aso dɛm edwumadzen yi nyinara ho hia? Ojibwanyi maame bi kãa dɛ, mbɔdzen a Jehovah Adasefo bɔ no ma wɔyɛ soronko fi nyamesom afofor ho. Ɔkãa dɛ, sɛ Adasefo no kɔ nkorɔfo hɔn efie, na wɔnye hɔn kenkan Kyerɛwnsɛm no wɔ Ojibwa kasa mu a, ɔma wɔtse Bible no ase yie.

Bert a onyinii wɔ Blood Tribe asaase no do wɔ Alberta, a ɔyɛ kasa asekyerɛfo no kã dɛ: “Mehu Blackfootfo pii a wɔdze hɛn nwoma bi abɔ hɔn bo na wɔrekã dɛ, ‘Mo kurow mu kasa nye yi. Iyi dze wɔyɛɛ maa me!’ Sɛ wɔhwɛ hɛn video no bi wɔ hɔn kurow mu kasa mu a, metaa hu dɛ worusũ.”

Basia bi a ɔkã Cree kasa no enyi sɔɔ hɛn video a wɔato dzin Ebɛnadze Ntsi na Ɔsɛ dɛ Isũa Bible No?  wɔ no kurow mu kasa mu. Ɔkãa dɛ, nna ɔtse nkã dɛ gyama ne maame na ɔrekasa akyerɛ no.

Adasefo pii abɔ mbɔdzen dɛ wɔdze Bible no mu awerɛkyekyer nsɛm no bodu nkuraase bi wɔ ekyikyir. Terence nye ne yer Orlean kaa dɛ wotwaa kwan bi dɛm. Wɔkã dɛ: “Yɛdze kaar too santsen twaa kwan ndɔnhwer 12 faa kwan a esukwankyɛba ayɛ do ma do, kɛkãa asɛmpa no wɔ pɔw bi a wɔfrɛ no Little Grand Rapids no mu. Mbrɛ wɔgyee asɛmpa no yɛɛ hɛn ahobow!”

Binom etutu efi hɔn efie papabi mu akɛtsena nkuraase beebi. Aber a Daniel nye ne yer LeeAnn dze abosoom ebiasa kɛkãa asɛmpa wɔ Manitoulin Island no, wosii gyinae dɛ wobotu akɛtsena hɔ. Daniel kyerɛkyerɛ mu dɛ: “Hɛn enyi gye ho dɛ yebenya ber pii dze aboa afofor ma woeenya Nyankopɔn n’asɛm ho enyigye.”

Ebɛnadze ntsi na Jehovah Adasefo bɔ mbɔdzen biara dɛ wɔdze asɛmpa no bodu hɔn a wɔtsetse nkuraase no nkyɛn? Bert ne yer Rose kyerɛkyerɛ mu dɛ: “Mankasa, kurow mu hɔ na mifi. Na osiandɛ mehu mfaso a ɔwɔ do dɛ wɔdze Bible mu ngyinadonsɛm bɛyɛ edwuma no ntsi, iyi kenyan me ma moboa afofor.”

Orlean kã dɛ: “Mepɛ dɛ Creefo no nya ho kwan dɛ hɛn Bɔfo no bɛkyerɛ hɔn kwan. Ɔyɛ ho kwan dɛ mobɔboa hɔn ma wɔaabɛn Jehovah, na woeedzi nsɛndzendzen biara a wobehyia no ndɛ no do.”

Marc nye Blackfoot kasa asekyerɛ kuw no yɛ edwuma. Ebɛnadze ntsi na ɔpɛ dɛ ɔdze asɛmpa no du nkuraasefo no hɔ? Oyi ano dɛ: “Osiandɛ mowɔ ɔdɔ mapa ma hɔn.”