Afe1987 mu no, Lyman Swingle a ɔyɛ Jehovah Adasefo Akwankyerɛ Kuw no munyi kasae kyerɛɛ nyimpadodow 63,580 a woehyia mu wɔ Plaza Monumental agopramado wɔ Valencia, Venezuela no. Nna hɔn mu dodowara dze bɔs etwa kwan anafua mu nyinara ribetsie no. Aber a Onua Swingle rekasa akyerɛ nyimpadɔm no ɔkãa dɛ, “Hom nnda ho nnyɛ nkorbata ketseaba bio. Seseira hom yɛ hɔ-na-hɔ. Na sɛ mohwɛ a, ɔnnkɛkyɛr, dabi hom bɛba abɛkã ‘adawurbɔfo-100,000 kuw’ no ho!”

Nna Jehovah Adasefo a wɔrekã Ahendzi no ho asɛmpa wɔ Venezuela wɔ afe 1987 mu no dodow bor 38,000. Dɛm aber no, nna aman awɔtwe pɛr na no mu adawurbɔfo no dodow bor 100,000.

Mbrɛ Jehovah Adasefo no dodow rinya nkɔenyim wɔ wiadze nyina no yɛ nwanwa. Wiadze Kõ a odzi kan no ekyir no, nna nyimpa mpem kakraabi na wɔrobɔ Jehovah n’Ahendzi no ho dawur. Iyi sesae. 1943 Yearbook of Jehovah’s Witnesses bɔɔ amandzɛɛ dɛ: “Ɔwɔ mu dɛ nna ɔyɛ dzen dɛ wɔnye enuanom bedzi nkitaho ma ntsi woennya afe 1942 akontaabu no nyinara dze, naaso sɛ wɔkekã akontaabu no bɔ mu a, ɔyɛ enyigye . . . , osiandɛ akontaabu no da no edzi dɛ wɔ wiadze nyina no, adawurbɔfo bɔbor 106,000 na wɔreyɛ edwuma [wɔrekã asɛmpa] no.” Ɔmmfa ho mpo dɛ nna Wiadze Kõ a otsĩa ebien no gyina mu no, nyimpa pii tsiee Bible mu nokwar no wɔ asopa mu. Wɔ afe 1950 mu no, nna United States nkotsee na adawurbɔfo a wɔwɔ hɔ no dodow bor 100,000.

Ɔman a odzi hɔ a onyaa adawurbɔfo 100,000 nye Nigeria wɔ afe1974 mu.

Afe a odzi hɔ no mu no, adawurbɔfo a wɔwɔ Brazil nye Germany so dodow boor 100,000. Nkɔenyim a ɔtse dɛm a aba wɔ nsaasepɔn anan do no kyerɛ mbrɛ Bible mu nokwar no rekã nyimpa dodowara hɔn akoma.

Wɔ wiadze nyina no, hɔn a wotsie asɛmpa no dodow akɔ do enya nkɔenyim. Iyi nye Bible no mu nkɔnhyɛ hyia, ɔkã dɛ: “Aketsewaba no bɛdan apem, na ekumaba no adan ɔman dzendzen: emi Ewuradze na mebɛyɛ no har wɔ ne ber mu.”​—Isaiah 60:22.

Dɛ mbrɛ mfe 2014 ɔsom akontaabu no kyerɛ no, aman 24 bi wɔ hɔ a no mu adawurbɔfo no dodow bor 100,000. Nna Venezuela kã ho, no mu adawurbɔfo no dodow dur 100,000 wɔ mfe 2007 no mu. Wɔ wiadze nyina no, Jehovah Adasefo wɔ asafo ahorow 115,416 na adawurbɔfo no dodow si 8,201,545.