Gilead Skuul No Edzi Mfrenhyia Eduosuon
Wɔ February 1, 1943 mu no, wɔhyɛɛ ase yɛɛ skuul tsitsir bi wɔ bea bi a ɔmmbɛn kurow mu wɔ New York. Wɔdze dɛm skuul a seseiara wɔfrɛ no Ɔweɔn-Aban Gilead Bible Skuul yi ama mbarimba nye mbaa bɔbor 8,000 a wofifi wiadze mfɛndzanan nyina ntsetsee soronko bi.
Sor dze no: Abow a wɔdze kɔ Gilead Skuul a ɔwɔ South Lansing wɔ New York no. Ase dze no: Gilead kyerɛkyerɛnyi a ɔnye hɔn a wɔkɔr Gilead skuul a ɔtɔ do 31 no rekasa wɔ paado
Jonathan, a owiee Gilead Skuul no bi nnkyɛree no kãa dɛ: “Ntsetsee a wɔdze gyinaa Nyankopɔn n’Asɛm no do dze maa hɛn no bɔboa hɛn ma yaayɛ hɛn som edwuma no yie, ɔmmfa ho asaasesin a yɛbɔkɔ mu anaa amambra a yebehyia no.” Ne yer Marnie so dze kãa ho dɛ: “Sesei, meenya ɔpɛ asen mber biara a abɛsen kɔ no, dɛ, mobɔboa nkorɔfo ma woeehu dɛ asetsena papa biara nnyi hɔ a ɔkyɛn dza hɛn Bɔfo no abɔ ne tsirmu pɔw dɛ ɔdze bɛma hɛn no. Megye dzi dɛ, sɛ moboa afofor ma wobohu Jehovah a, hɔn asetsena botu mpon.”
Abosoom enum na wɔdze kɔ Gilead skuul no, na skuulfo no nntua hwee. Iyinom tsitsir na skuul no twe adwen si do: Bible no, nye mbrɛ asɛmpaka edwuma no ho hia. Skuul yi no botae nye dɛ wɔdze bɛtsetse skuulfo no ma wɔaahyɛ afofor nkuran, wɔaahyɛ hɔn dzen, na wɔaaboa Nyankopɔn nkorɔfo nyina ma woeedzi nsɛndzendzen a wobehyia wɔ hɔn asetsena mu no ho dwuma. Wɔ skuul no mu no, skuulfo no dze ndɔnhwer pii susu Kyerɛwnsɛm no mu ngyinadonsɛm ho, mbrɛ ɔbɛyɛ a wɔbɛhyɛ wɔnye Jehovah Nyankopɔn ntamu ebusuabɔ no mu dzen.
Sor dze no: Afe 1958, Albert Schroeder dze ntamadan a wɔayɛ ne kakraba rekyerɛ Gilead skuulfo no adze. Ase dze no: Afe 1968, Ulysses Glass rekyerɛ hɔn a wɔkɔr Gilead a ɔtɔ do 46 no adze
Awarfo a wɔkɔ Gilead skuul no bi no yɛ ber nyina asomfo dadaw. Sɛ wowie skuul no a, wotum ma wɔkɔtoa hɔn dwumadzi a nna ɔhyɛ hɔn nsa no do, anaadɛ wonya dwumadzi fofor wɔ ɔman fofor do. Wɔma binom kɛyɛ edwuma wɔ Jehovah Adasefo edwumayɛbea nkorbata bɔbor 90 no mu kor mu. Wɔma hɔn mu pii kɔsom wɔ mbea a nyimpa pii wɔ, mbrɛ ɔbɛyɛ a wobenya nkantando kɛse wɔ asɛmpaka edwuma no do.
Ahyɛse paa no, nna wɔyɛ Gilead Skuul no wɔ Kingdom Farm a ɔwɔ South Lansing wɔ New York no. Afe 1961 mu no, woyii skuul no kɔr Jehovah Adasefo wiadze nyina edwumayɛbea tsir a ɔwɔ Brooklyn wɔ New York no. Ofitsi afe 1988 kesi 1995 no, wɔyɛɛ skuul no wɔ Watchtower Farms a ɔwɔ Wallkill wɔ New York no. Afei wɔ afe 1995 mu no, woyii skuul no kɔr beebi a seseiara ɔwɔ wɔ Watchtower Educational Center a ɔwɔ Patterson wɔ New York no. March 2013 mu na hɔn a wɔkɔr skuul a ɔtɔ do 134 no wiei.
Sor dze no: Mfe 2003, Hɔn a wɔkɔr Gilead skuul a ɔtɔ do 116 a worusũa adze wɔ adzesuadan mu. Ase dze no: Mfe 2011, Gilead skuulfo a worusũa adze wɔ Gilead nwomakorabea hɔ
Mfe 70 nye yi no, hɔn a woewie Ɔweɔn-Aban Gilead Bible Skuul no ayɛ nhwɛdo pa wɔ mbrɛ wɔdze nokwardzi edzi Jehovah no ho dase no mu.
Bi A W'enyi Bɛgye Iyi So Ho
NHYIAMU ETSITSIR AHOROW
Nhyiamu Ma Hɔn A Woewie Ɔweɔn-Aban Gilead Bible Skuul A Ɔtɔ Do 135 No
Nyimpa bɔbor 10,000 na wɔkɔr dɛm nhyiamu a ɔyɛ enyigye na ɔkã akoma a wɔyɛɛ no September 14, 2013 no bi. Hwɛ dwumadzi no mu nsɛntsitsir a ɔyɛ enyigye no.
DOCUMENTARIES
Dze Ekodu Asaase Ano Noho
Ɔweɔn-Aban Gilead Bible Skuul no twẽ adwen si hia a asɛnka edwuma noho hia no do. Tsie osũahu a ɔyɛ enyigye a asɛmpatserɛwfo a wɔakɔ skuul yi bi no akã no.