Aso Obi Botum Apaw Dɛ Ɔnnkɛyɛ Jehovah Adasefo No Mu Kor Bio?

BƆ

Nyew. Obi botum afa akwan ebien do apaw dɛ orifi hɛn ahyehyɛdze no mu:

Ɔbɛhyɛ da akã. Obi botum dze n’ano akã anaa ɔaakyerɛw aba dɛ, oesi gyinae dɛ ɔmmpɛ dɛ ɔbɛyɛ Jehovah Adasefo no mu kor bio.
Ɔdze ne ndzeyɛɛ bɛkyerɛ. Obi botum ayɛ biribi a ɔkyerɛ dɛ ɔmmpɛ dɛ ɔbɛyɛ Jehovah Adasefo no mu kor bio. (1 Peter 5:9) Dɛ nhwɛdo no, ibia ɔdze no ho bɔbɔ ɔsom fofor bi ho, na ɔno ekyir no ɔada no edzi dɛ ɔbɔkɔ do nye hɔn asom.—1 John 2:19.

Sɛ obi gyaa asɛnka anaa hom nhyiamu ahorow no kɔ so ɛ? Aso hom bu dɛm nyimpa no dɛ ɔapaw dɛ ɔnnkɛyɛ Jehovah Adasefo no mu kor bio anaa?

Oho, yemmbu no dɛm. Dɛ obi bɛpaw dɛ ɔnnkɛyɛ Ɔdasefo bio, anaa ɔbɔtwe noho efi hɛn som no ho no yɛ soronko fi mberɛw a obi bɛyɛ wɔ gyedzi no mu no ho. Mpɛn pii no, hɔn a wɔgogow hɔn som mu anaa wogyaa som no kakra no mmpoow hɔn gyedzi no, na mbom wɔayɛ mberɛw anaa hɔn abaw mu na ebu. Dɛ nkyɛ yebeyi nkorɔfo a wɔtsetse dɛm no tokyen no, yɛbɔ mbɔdzen dɛ yɛbɛhyɛ hɔn nkuran na yaaboa hɔn. (1 Thessalonicafo 5:14; Jude 22) Sɛ nyimpa no pɛ mboa dze a, asafo no mufo no, tsitsir no mpanyimfo no fi Kyerɛwnsɛm no mu boa no.—Galatiafo 6:1; 1 Peter 5:1-3.

Naaso, mpanyimfo no nnyi tum dɛ wɔbɛhyɛ obiara dɛ ɔnkɔ do nyɛ Jehovah Adasefo no mu kor. Obiara si nankasa ne gyinae fa ɔsom ho. (Joshua 24:15) Yɛgye dzi dɛ, ɔsɛ dɛ obiara a ɔsom Nyankopɔn no fi ne pɛ anaa n’akoma mu som no.—Ndwom 110:3; Matthew 22:37.