Nyew, sɛ atoyerɛnkyɛm si a, Jehovah Adasefo taa dze mboa ma. Yɛtaa dze mboa ankasa, a asetsena mu ndzɛmba kã ho kɛma Adasefo nye hɔn a wɔnnyɛ Adasefo ma ɔnye Bible mu ahyɛdze a ɔwɔ Galatiafo 6:10 yi hyia: “hom mma yɛnyɛ papa mma nyimpa nyina, nkanka hɔn a wɔyɛ gyedzi fifo no.” Afei so, yefi Kyerɛwnsɛm no mu kyekye hɔn a hɔn ho akã no werɛ, na yɛboa hɔn ma wogyina hɔn ayawdzi ano.​—2 Corinthfo 1:3, 4.

Sɛ atoyerɛnkyɛm bi si a, asafo no mu mpanyimfo a wɔwɔ beebi a atoyerɛnkyɛm esi no hwehwɛ dɛ wobohu beebi a asafo no munyi biara wɔ, na wɔhwɛ dɛ biribiara nnyɛɛ hɔn, afei so wɔhwɛ dɛ ebɛn mboa na wobehia. Iyi ekyir no, mpanyimfo no dze hɔn nhwehwɛmu nye dza wɔyɛe wɔ ho ntsɛmara no ho amandzɛɛbɔ kɛma Jehovah Adasefo edwumayɛbea nkorbata a ɔhwɛ hɔn do no.

Sɛ mboa a wobehia wɔ beebi a atoyerɛnkyɛm no esi no bor asafo ahorow no hɔn ahoɔdzen do a, Jehovah Adasefo Akwankyerɛ Kuw no yɛ nhyehyɛɛ ma wɔdze dza wohia no kɛma hɔn. Iyi tse dɛ mbrɛ Christianfo a wodzi kan no yɛɛ nhyehyɛɛ dze boaa hɔnho wɔ ɔkɔm ber mu no. (1 Corinthfo 16:1-4) Edwumayɛbea nkorbata a wɔhwɛ dɛm bea yi paw Atoyerɛnkyɛm Ber Mu Mboakuw ahorow ma wɔhwɛ dɛm nhyehyɛɛ yi do, na wɔdze ho akwankyerɛ ma. Adasefo ahorow fifi mbea ahorow tu hɔn mber nye hɔn ahodze kyɛ dze boa.​—Mbɛbusɛm 17:17.

Ntoboa a wɔdze kɔ Jehovah Adasefo edwumayɛbea nkorbata no, akwan ahorow a wɔfa do dze dzi dwuma no no mu kor nye dɛ wɔdze kɔboa beebi a atoyerɛnkyɛm esi no. (Ndwuma 11:27-30; 2 Corinthfo 8:13-15) Osiandɛ wonntua dɛm etuhoakyɛfo a wɔkɔboa yi kaw ntsi, wɔdze ntoboa ahorow a woyi no dzi ɔhaw a atoyerɛnkyɛm no dze aba no ankasa ho dwuma, na nnyɛ dɛ wɔdze hwɛ hɔn a wɔyɛ edwuma no. Yɛyɛ ahwɛyie wɔ mbrɛ yɛdze ntoboa biara dzi dwuma no mu.​—2 Corinthfo 8:20.