Akɔhwisɛm: Siantsir a Jehovah Adasefo nndzi Easter nye dɛ wɔnnyɛ Christianfo.

Nokwasɛm: Yɛgye Jesus Christ dzi dɛ ɔno nye hɛn Agyenkwa, na yɛbɔ mbɔdzen ‘dzi n’anamɔn ekyir’ pɛɛ.​—1 Peter 2:21; Luke 2:11.

Akɔhwisɛm: Hom nngye nndzi dɛ wonyaan Jesus fii ewufo mu.

Nokwasɛm: Yɛgye Jesus no wufosoɛr no dzi; yebu no dɛ ɔyɛ adze tsitsir a Christianfo gyedzi gyina do, na yɛtaa kã ho asɛm wɔ hɛn asɛnka edwuma no mu.​—1 Corinthfo 15:3, 4, 12-15.

Akɔhwisɛm: Ɔmmfa hom ho mpo dɛ hom mba nnya Easter enyigye no bi.

Nokwasɛm: Yɛdɔ hɛn mba no​—yɛyɛ dza yebotum biara dɛ yɛbɛnyɛn hɔn, yɛbɛtsetse hɔn, na yɛaboa hɔn ma hɔn enyi agye.​—Titus 2:4.

• Easter afahyɛ a wodzi no nngyina Bible no do.

• Jesus hyɛɛ hɛn dɛ yɛnkaa no wu no, na nnyɛ no wusoɛr no. Yedzi dɛm Nkaadzi yi afe biara wɔ da a Jesus no wu no besi no, dɛ mbrɛ Bible mu kalɛnda no kyerɛ no.​—Luke 22:19, 20.

• Yɛgye dzi dɛ Easter amandze ahorow no fi tsetse awo ho abosonsom amandze mu, na iyi ntsi Nyankopɔn nngye Easter nnto mu. Nyankopɔn yɛ “Nyame nyinkufo” na ɔpɛ dɛ yɛdze ɔsom ma nankotsee, ntsi ɔnngye ɔsom a yɛdze amandze a ɔnnpen do aforafora mu no nnto mu.​—Exodus 20:5; 1 Ahemfo 18:21.

Yɛgye dzi dɛ hɛn gyinaesi dɛ yɛbɔtwe hɛn ho efi Easter ho no gyina Bible no do pampee, na ɔhyɛ hɛn nkuran dɛ yɛmfa “nyansa pa na adwenmutsewee” ndzi dwuma mbom sen dɛ yebedzi nyimpa atsetsesɛm ekyir. (Mbɛbusɛm 3:21; Matthew 15:3) Ɔwɔ mu dɛ yɛkã hɛn gyedzi ho asɛm kyerɛ obiara a obisa hɛn Easter ho asɛm no dze, naaso yɛkyerɛ obu so ma obiara no hokwan a ɔwɔ dɛ ɔpaw dza ɔbɛyɛ wɔ adzeyɛ yi ho.​—1 Peter 3:15.