Nyimpa a wɔkã Nyankopɔn n’Ahenman no ho asɛmpa bosoom biara no nkotsee na yɛkan hɔn ka Jehovah Adasefo ho. (Matthew 24:14) Iyinom mu binom nye hɔn a wɔama woenuma hɔn dɛ Jehovah Adasefo, nye hɔn a wonnumaa hɔn naaso wɔafata dɛ wɔyɛ asɛmpaka edwuma no bi.

 Oho. Wɔ hɛn som no mu no, dɛ bi a wɔbɛkan obi aka Adasefo no ho anaa obenya dwumadzi anaa hokwan pɔtsee bi no mmfa sikasɛm ho hwee. (Asomafo Ndwuma 8:18-20) Nokwasɛm mpo nye dɛ, hɔn a woyi ntoboa no mu pii nnda hɔnho edzi. Ɔdasefo biara dze ne mber, n’ahoɔdzen nye n’ahodze boa wiadze nyina edwuma no, dɛ mbrɛ ne nsɛm tsebea tse nye mbrɛ noara pɛ.​—2 Corinthfo 9:7.

 Bosoom biara no, Adasefo no ankasa fi hɔn pɛ mu dze asɛnka edwuma a wɔyɛe no ho akontaabu ma hɔn asafo a wɔwɔ mu no.

 Asafo biara keka n’akontaabu no bɔ mu, na afei, wɔdze mona edwumayɛbea nkorbata a ɔhwɛ hɔn do no. Nkorbata biara so keka n’akontaabu ahorow no bɔ mu, na afei, wɔdze mona wiadze nyina edwumayɛbea tsir no.

 Wɔ ɔsom afe a biara n’ewiei no, wɔhwɛ dɛ mbrɛ Adasefo a wɔwɔ asaase biara do no hɔn dodow akɔ sor ekodu. Afei wɔkeka dɛm akontaabu ahorow yi nyinara bɔ mu na ama woeehu Adasefo dodow a wɔwɔ wiadze nyina. Wɔda ɔman biara n’asɛnka akontaabu nye ne nkyekyɛmu ahorow edzi wɔ wɛbsaet yi do. Wɔato dɛm ɔfã no dzin “Around the World.” Dɛm amandzɛɛbɔ ahorow yi hyɛ hɛn nkuran, dɛ mbrɛ amandzɛɛbɔ ahorow a ɔtsetse dɛm hyɛɛ Christianfo a wodzi kan no nkuran no ara.​—Asomafo Ndwuma 2:41; 4:4; 15:3.

 Ɔwɔ mu dɛ yɛnnkan dɛm nkorɔfo yi nnka Adasefo no dodow ho dze, naaso yɛgye hɔn fɛw do ba hɛn asafo ahorow no mu. Iyinom mu pii ba Christ wu ho Nkaadzi no ase. Ntsi sɛ yɛtsew Adasefo no hɔn dodow fi hɔn a wɔbaa Nkaadzi no nyinara no hɔn dodow no mu a, yetum hu hɔn a wɔnye hɛn ahyehyɛdze no bɔ no hɔn dodow. Wɔ afe 2023 mu no, hɔn a wɔbaa Nkaadzi no ase no nyinara dodow si 20,461,767.

 Nyimpa pii mmba hɛn nhyiamu ahorow no bi, naaso wonya Bible adzesua a yɛnye hɔn yɛ wɔ fie a wonntua hwee no do mfaso. Wɔ afe 2023 mu no, sɛ wɔkyekyɛ mu pɛpɛɛpɛr a, yɛnye nkorɔfo 7,281,212 yɛɛ ofie Bible adzesua bosoom biara a adzesua no mu binom wɔ hɔ a, yɛnye ankorankor yɛe wɔ ber kor no ara mu.

 Asoɛ a ɔhwɛ aban no ne nyimpakan do no taa bisa nkorɔfo ɔsom kor a wɔnye hɔn bɔ, na ɔno na wogyina do kyerɛ nyimpa dodow a wɔwɔ ɔsom bi mu. Dɛ nhwɛdo no, asoɛ a ɔhwɛ nyimpakan do wɔ U.S. no kã dɛ, aber a wɔrekan nyimpa no, “wɔhwɛ dɛ nyimpa a wɔrekan hɔn no bu hɔnho dɛ wɔyɛ ebɛn ɔsom mufo.” Afei so, nna akontaabu a wonya no “gyina hɔnankasa hɔn nsusui do, na nnyɛ nokwasɛm no ankasa do.” Dza ɔnye iyi bɔ ebira no, hɔn a wɔkã asɛmpa no kyerɛ afofor na wobu hɔn dwumadzi no ho akontaa nkotsee na yɛkan hɔn ka Jehovah Adasefo ho, na nnyɛ obiara a obu noho dɛ Ɔdasefo kɛkɛ.