Jehovah Adasefo wɔ nhyehyɛɛ bi a obotum aboa wo ma eesũa pii efi Bible no mu. Hɛn Bible adzesua ho nhyehyɛɛ yi botum aboa wo ma:

•   Eenya asetsena pa a enyigye wɔ mu

•   Aabɛyɛ Nyankopɔn ne nyɛnko

•   Eehu anohoba ahorow a Bible no abɔ afa daakye ho

Wɔ dɛm ɔfã yi

•  Ebɛn kwan do na wɔyɛ Bible adzesua no?

•  Sɛ wɔnye me rusũa adze a, mubotua ahen?

•  Ɔbɛgye ber tsentsen ahen ana wɔnye me esũa buukuu no ewie?

•  Mibesi dɛn ahyɛ ase?

•  Mubotum ama wɔnye me ayɛ adzesua kor bi ahwɛ anaa?

•  Sɛ mepen do dɛ wɔnye me nsũa Bible no a, aso ɔsɛ dɛ mebɛyɛ Jehovah Dasefo a?

•  Mubotum dze mara me Bible ayɛ adzesua no a?

•  Mubotum afrɛ afofor ma wɔaabɛka moho ma yeesũa adze no?

•  Sɛ menye Jehovah Adasefo esũa Bible no pɛn a, aso mubotum nye hɔn esũa adze bio a?

•  Sɛ obi mmpɛ dɛ Ɔdasefo bi nye no sũa Bible no a, aso hom wɔ nhyehyɛɛ bi a nankasa botum dze esũa Bible no?

 Obi nye wo bosũa Bible no, na ɔbɔboa wo ma aatse nsɛm ahorow a ɔwɔ Bible mu no ase. Aber a ɔnye wo rusũa buukuu a wɔato dzin Ibotum Enya Enyigye Daa! nkakrankakra no, ebɛba ebohu mbrɛ dza isũa fi Bible mu no botum aboa wo. Sɛ epɛ dɛ ihu pii fa iyi ho a, hwɛ video yi.

 Irunntua hwee. Jehovah Adasefo dzi akwankyerɛ a Jesus dze maa n’esuafo no do. Ɔkãa dɛ: “Hom enya no kwa: hom mfa mma kwa.” (Matthew 10:8) Afei so ndzɛmba a yɛdze sũa adze no, bo biara nnda do; no mu bi nye Bible no nye buukuu a wɔato dzin Ibotum Enya Enyigye Daa!

 Adzesua nsɛm ahorow 60 na ɔwɔ buukuu yi mu. Ber tsentsen a edze bosũa buukuu yi ewie no begyina woara wo do, naaso binom ebohu dɛ sɛ wotum sũa adzesua asɛm kor anaa dza ɔbor dɛm wɔ dapɛn kor mu a, ɔboa hɔn paa.

1.  1. Hyehyɛ fɔɔm a ɔwɔ intanɛt do no. Woho nsɛm a edze bɛma hɛn no, adze kor pɛ na yɛdze bɛyɛ. Ɔno nye dɛ yɛdze bedzi w’ebisadze no ho dwuma ma Jehovah Dasefo bi nye wo eebosũa Bible no.

2.  2. Obi a ɔnye wo bosũa adze no bɛfrɛ wo anaa ɔbɛba abɛsera wo. Nyia ɔnye wo bosũa adze no bɛma ehu mbrɛ ibotum enya Bible adzesua yi do mfaso kɛse, na nkyii so obobua nsɛmbisa biara a ewɔ no.

3.  3. Enye obi a ɔnye wo bosũa adze no bɛyɛ adzesua no ho nhyehyɛɛ. Obotum abɛsera wo nye wo esũa adze. Hom botum so afa tɛlefon, video kɔɔl, krataakyerɛw, anaa email do ayɛ adzesua no. Mpɛn pii no, adzesua no botum edzi bɛyɛ dɔnhwer kor. Naaso dɛ adzesua no bɔbor dɔnhwer kor o, dɛ orunndu dɛm o, ɔyɛ wo mber nhyehyɛɛ na ɔbɛkyerɛ.

 Nyew. Sɛ epɛ dɛ eyɛ dɛm a, hyehyɛ fɔɔm a ɔwɔ intanɛt do no. Sɛ obi frɛ wo anaa ɔbɛsera wo dɛ ɔnye wo rubosũa adze a, ma onhu dɛ epɛ dɛ ɔnye wo yɛ adzesua kor bi ma ehwɛ. Ɔnye wo bɛhyɛ ase esũa Ibotum Enya Enyigye Daa! nwomaba no ahwɛ dɛ sɛ w’enyi bɛgye adzesua no ho a. Adzesua nsɛm ebiasa na ɔwɔ dɛm nwomaba yi mu.

 Oho. Dɛ Jehovah Adasefo no, hɛn enyi gye ho paa dɛ yɛdze Bible no bɛkyerɛkyerɛ nkorɔfo, naaso yɛnnhyɛ obiara dɛ ɔmbɛyɛ hɛn som no munyi da. Mbom, yefi obu mu kyerɛkyerɛ dza Bible kã no, na yɛgye to mu so dɛ obiara wɔ ho kwan dɛ osi dza ɔbɛgye edzi ho gyinae.​—1 Peter 3:15.

 Nyew, ibotum dze Bible nkyerɛase biara a epɛ no ayɛ adzesua no. Hɛn dze, hɛn enyi gye New World Translation of the Holy Scriptures no ho osiandɛ ne nkyerɛasee no dzi mũ na no mu da hɔ so. Naaso yeebohu dɛ nyimpa piinara so na hɔn enyi gye ho dɛ wɔdze Bible nkyerɛase a wɔwɔ no bɛyɛ adzesua no.

 Nyew. Ibotum ama w’ebusua anaa w’anyɛnkofo abɛka woho ma hom eesũa adze.

 Nyew ibotum. Wɔasesa buukuu a yɛdze yɛ adzesua no, nye kwan a yɛfa do yɛ adzesua no mu ma ɔroboa nkorɔfo pii ndɛ. Ne dɛm ntsi yɛgye dzi paa dɛ w’enyi bɛgye adzesua fofor yi ho mpo akyɛn nkan dze no. Wɔ dɛm buukuu a yɛdze yɛ Bible adzesua yi mu no, mfonyin na video ahorow pii wɔ mu, na enye nyia ɔnye wo bosũa adze no so bɔbɔ adzesua no mu nkɔmbɔ paa.

 Nyew. Ɔwɔ mu, nyimpa pii ebohu dɛ sɛ wɔma obi nye hɔn sũa Bible no a, ɔboa paa. Naaso wɔ binom so hɔn afamu no, ɔyɛ a ahyɛse no dze wɔmmpɛ dɛ obi nye hɔn sũa Bible no, mbom wɔpɛ dɛ hɔnankasa sũa hɔn adze. Sɛ ekɔ hɛn wɛbsaet do a, ɔfã bi wɔ hɔ a wɔato dzin “Edwindadze A Wɔdze Sũa Bible No.” Wɔ dɛm ɔfã no, ibenya ndzɛmba pii a obotum aboa wo ma eesũa Bible no. Edwindadze ahorow a odzidzi do yi botum aboa wo paa:

•   Intanɛt Do Bible Adzesua. Dɛm adzesua ahorow yi bɛma enya nsɛmbisa a no ho hia paa wɔ asetsena mu ho mbuae. Ibi tse dɛ: Woana nye Nyankopɔn? Ebɛnadze ntsi na amandzehu na bɔn adɔɔ sõ dɛm? Aso Nyankopɔn beyi amandzehu efi hɔ dabi?

•   Bible Ho Video Ahorow. Dɛm video ntsiantsia ahorow yi kyerɛkyerɛ Bible mu nkyerɛkyerɛ etsitsir bi mu.

•   Bible Mu Nsɛmbisa A Woebua. Dɛm nsɛm yi ma yenya Bible mu nsɛmbisa pii ho mbuae.

•   Kyerɛwnsɛm A Wɔakyerɛkyerɛ Mu. Hwɛ dza Bible mu asɛm na nsɛmfua ahorow bi kyerɛ ankasa.