Ofi tsetseetse nyinara no, Bible no nye adze tsitsir a yɛdze hɛn gyedzi ahorow no egyina do. Ntsi aber biara a yɛbɛtse Kyerɛwnsɛm no mu asɛm bi ase yie no, yɛsesã hɛn gyedzi ahorow no ma ɔnye hɛn ntseasee fofor no hyia. a

Dɛm nsesã ahorow yi nye Bible mu ngyinadosɛm a ɔwɔ Mbɛbusɛm 4:​18 no hyia: “Na atseneneefo kwan dze, ɔtse dɛ kan hyɛnhyɛn a ɔhyerɛn mbordo araa kodu ewia ketee.” Dɛ mbrɛ ewia no pue nkakrankakra ma yehu adze yie no, dɛmara so na Nyankopɔn ma yɛtse Kyerɛwnsɛm no mu nokwasɛm ase nkakrankakra wɔ ne ber a ɔsɛ mu. (1 Peter 1:​10-​12) Dɛ mbrɛ Bible no hyɛɛ nkɔm no, Nyankopɔn ama iyi rokɔ do ntsɛntsɛm wɔ “ewiei ber no” mu.​—Daniel 12:4.

Ɔnnsɛ dɛ dɛm nsakyer ahorow yi a yɛyɛ no wɔ hɛn ntseasee ahorow mu no yɛ hɛn nwanwa anaa ɔhaw hɛn. Wɔ tsetse mber mu no, hɔn a wɔsoom Nyankopɔn no mu binom so nyaa nsusui nye akwanhwɛ ahorow bi a nna ɔnnsɛ dɛ wonya, ma ntsi nna ohia dɛ wɔtsentsen hɔn adwen.

• Mfe 40 ansaana Nyankopɔn dze Moses bedzi dwuma dɛ ɔgyefo ama Israelmba no, Moses nankasa yɛɛ noho dɛ gyama ɔyɛ hɔn gyefo.​—Ndwuma 7:​23-​25, 30, 35.

• Asomafo no anntse nkɔnhyɛ a ɔfa Messiah no no wu nye no wusoɛr ho no ase.​—Isaiah 53:​8-​12; Matthew 16:21-​23.

• Nna Christianfo a wodzi kan no mu binom wɔ adwen a ɔmmfata wɔ ber a “Christ da no” bɛba no ho.​—2 Thessalonicafo 2:​1, 2.

Ekyir yi, Nyankopɔn tsentseen hɔn nsusui no, na yɛbɔ mpaa dɛ ɔbɔkɔ do ara ayɛ dɛmara ama hɛn so.​—James 1:5.