Oho. Jehovah Adasefo nnkasa nntsia pandze a wɔdze wɔ nkorɔfo dze siw yarba ano no. Yebu adzeyɛ yi dɛ ɔyɛ biribi a ɔwɔ dɛ Christiannyi biara si nankasa ne gyinae wɔ ho. Jehovah Adasefo pii wɔ pandze dze siw yarba ano.

 Yɛpɛ ayarsa a odzi mu, ntsi nkɔenyim a woenya wɔ ayarsa mu a ɔma wotum siw yarba a ɔyɛ hu ano no, hɛn enyi gye ho. Sɛ yarba a ɔyɛ hu yi ne tsir a, mbrɛ adɔktafo tu hɔnho kyɛ na wɔyɛ dza wobotum biara dɛ wobenya n’ano edur no, hɛn enyi sɔ papaapa.

 Jehovah Adasefo dzi akwankyerɛ a adɔktafo na eduyɛfo dze ma no do. Dɛ nhwɛdo no, ofitsi ber a COVID-19 yarba bɔn no yii ne tsir no, Jehovah Adasefo akɔ do etsintsim nsɛm wɔ kasa ɔhaha pii mu wɔ wɛbsaet yi do a ɔma yehu mbrɛ yebesi abɔ hɛnho ban efi dɛm yarba yi ho. No mu bi nye mfaso a ɔwɔ do dɛ yɛbɛtsetsew hɛn ntamu, akwankyerɛ a ɔfa guabɔ ho, hɛnho a yɛbɛtsew efi nyimpa mu ber a yɛyar no, hɛn nsaho a yɛbɔhohor, mask a yɛbɛhyɛ, nye akwankyerɛ biara a aban mpanyimfo dze ama a ɔwɔ dɛ yedzi do no.​—Romefo 13:1, 2.

 Mfe pii na Jehovah Adasefo atwe adwen esi dɛm nsɛm a odzidzi do yi do:

•   Eduyɛ ho nsɛm bi wɔ hɔ a, ɔwɔ dɛ nyimpa biara si ne gyinae.​—Galatiafo 6:5.

   “[Magazine yi] nnkamfo ayarsa pɔtsee bi nnkyerɛ. Dɛmara so na ɔnnka dɛ eduyɛ bi yɛ papa kyɛn eduyɛ fofor bi. Magazine yi no botae nye dɛ ɔbɛma nokwar a ɔwɔ asɛm bi mu no ada edzi na nyimpa biara eesi nankasa ne gyinae.”​—Nyan! February 8, 1987, Borɔfo dze no.

   “Ɔyɛ wankasa na ɔwɔ dɛ isi gyinae dɛ enye wo mba bɔwɔ pandze a wɔdze siw yarba ano no.”​—Nyan! August 22, 1965, Borɔfo dze no.

•   Yɛwɔ obu kɛse ma nkwa. Dɛm ntsi sɛ yɛyar a, yɛpɛ n’ano edur.​—Asomafo Ndwuma 17:28.

   “Sɛ Jehovah Adasefo yar a, wokohu adɔktafo a wobotum asa hɔn yarba. Nkwa som bo ma hɔn, ntsi wɔyɛ dza wobotum biara hwehwɛ ayarsa a Kyerɛwnsɛm no nnkasa nntsia.”​—Ɔweɔn-Aban, July 1, 1975 Borɔfo dze no.

   “Jehovah Adasefo fi hɔn pɛ mu gye eduyɛ to mu. Wɔpɛ dɛ wonya apɔwmudzen na wɔtsena ase kyɛr. Nokwasɛm nye dɛ, tsetse Christianfo no mu kor a wɔfrɛ no Luke no, nna ɔyɛ dɔkta. Ndɛ, Jehovah Adasefo binom so yɛ adɔktafo. . . . Jehovah Adasefo enyi sɔ edwumadzen a adɔktafo na eduyɛfo binom yɛ no. Afei so, dza dɛm adɔktafo nye eduyɛfo yi yɛ ma wonya hɔn ayarsa no, ɔma hɔn enyi gye papaapa.”​—Ɔweɔn-Aban, February 1, 2011 Borɔfo dze no.