Hɔn a wonumaa hɔn dɛ Jehovah Adasefo naaso wɔnnda ho nnkã asɛm no nnkyerɛ afofor, anaa mpo wɔatwẽ hɔnho efi hɔn mfɛfo agyedzifo ho no, yennyi hɔn akwa. Nokwasɛm nye yi, yɛhwehwɛ hɔn, na yɛbɔ mbɔdzen dɛ yebekenyan hɔn ma wɔaasan nye hɛn abɔsom.

Yennfitsi ara nntu obi a ɔyɛ bɔn a enyiber wɔ mu no. Naaso, sɛ ɔdasefo bi a woenuma no dze yɛ no ntɔyɛɛ dɛ obobu Bible no abrabɔ ho akwankyerɛ do na sɛ oennu noho a, yebeyi no akwa anaadɛ wobotu no efi asafo no mu. Bible no kã no pefee dɛ: “Hom nyi nyimpa bɔn no mfi hom mu.”​—1 Corinthfo 5:13.

Na ɔbarimba a woetu no, naaso ne yer na ne mba da ho yɛ Jehovah Adasefo no so ɛ? Ɔsom mu nkitahodzi a ɔnye hɔn wɔ no mu twa, naaso ebusua mu dze no tsena hɔ. Awar no mu ebusuabɔ kɔ do dɛmara, na ɔnye ebusua no hɔn dabiara da nkitahodzi no so yɛ dɛ mbrɛ ɔtse noara.

Hɔn a woetu hɔn no botum aba hɛn som mu dwumadzi ahorow no bi. Sɛ wɔpɛ a wobotum so enya Bible mu afotu efi asafo no mu mpanyimfo hɔ. Botae no ara nye dɛ yɛbɔboa ankorankor biara ma ɔaasan afata dɛ Jehovah Adasefo no mu kor bio. Hɔn a woetu hɔn, naaso wɔbɔ mbɔdzen dɛ wɔbɔpow abrabɔ a ɔmmfata, na wɔda no edzi dɛ wɔpɛ dɛ wɔdze Bible gyinapɛn bɔ hɔn bra no, wɔsan gye hɔn ba asafo no mu bio.