Oho, wɔnnyɛ Zionfo. Jehovah Adasefo yɛ Christianfo a wɔdze hɔn gyedzi ahorow gyina Kyerɛwnsɛm no do. Aber a nyamesom ekuw ahorow bi kyerɛkyerɛ dɛ Jewfo a wɔroboaboa hɔn ano wɔ Palestine no fa Kyerɛwnsɛm mu nkɔnhyɛ ho no, Jehovah Adasefo nngye nsusũi yi nnto mu. Jehovah Adasefo nngye nndzi dɛ wɔahyɛ dɛm amanyɛkuw pɔtsẽe yi ho nkɔm wɔ Kyerɛwnsɛm no mu. Nokwasɛm nye yi, Kyerɛwnsɛm no nnkã nyimpa aban, ebusuakuw anaa nkorɔfo bi ho asɛm dɛ woye sen afofor. Jehovah Adasefo hɔn magazine a wɔato dzin Ɔweɔn-Aban no akã no kofee dɛ: “Yennyi Kyerɛwnsɛm mu ngyinado biara a ɔfoa Zion amanyɛkuw no do.”

 Encyclopædia Britannica no kyerɛkyerɛ Zionsom mu dɛ ɔyɛ “Jewfo amanyɛkuw bi a no botae nye dɛ ɔbɛhyehyɛ na wɔaaboa Jewfo ahenkurow a ɔwɔ Palestine no.” N’ase fi nyamesom nye amanyɛsɛm mu. Jehovah Adasefo mmbɔ Zionsom ho dawur dɛ nyamesom nkyerɛkyerɛ a wɔgye to mu, na wonngyina ɔfã biara wɔ Zionfo amansɛm mu.

 Jehovah Adasefo ahyehyɛdze no yɛ nyamesom ahyehyɛdze nkotoo, na ɔnntaa amanyɛkuw biara ekyir, a Zionsom so kã ho. Wɔayɛ ɔfã biara a Jehovah Adasefo nngyina wɔ amansɛm mu no ho kyerɛwtohɔ pefee, na wɔ aman ahorow bi do no, Adasefo no afa ɔsoɛrtsia akɛse mu mbom sen dɛ wobegyina ɔfã bi. Yɛgye dzi paa dɛ Nyankopɔn no sor Ahendzi no nkotsẽe na obotum dze asomdwee a ɔtsena hɔ daa abrɛ asaase yi; nyimpa aban anaa amanyɛkuw biara nnkotum edzi iyi ho dwuma.

 Ɔmmfa ho beebi a Jehovah Adasefo tse biara no, hɔn som mu gyedzi ahorow no mu ngyinadosɛm tsitsir nye dɛ wɔbɛyɛ setsie ama aban ahorow no mbra ahorow no. Wɔnntsew etũa nntsia aban no tumdzi ahorow no, na wɔmmfa hɔnho nnhyɛ basabasayɛ anaa akodzi biara mu.