Yanmei yɛ Ɔdasefo, na ɔwɔ Asia. Da kor bi, ɔboaa ɔbaa bi a n’enyi efura a wɔfrɛ no Mingjie ma otwaa kaar kwan bi mu. a Mingjie daa no ase na ɔkaa kyerɛɛ no dɛ: “Nyankopɔn nhyira wo!” Ɔno ekyir no, Yanmei bisaa Mingjie dɛ sɛ ɔpɛ a ɔbɛba ne fie na ɔnye no ebosua Bible. Mingjie kaa kyerɛɛ no dɛ, da biara ɔbɔ Nyankopɔn mpaa dɛ ɔmboa no ma onhu asɔr a ɔyɛ papa. Nna ebɛnadze ntsi na ɔbɔ dɛm mpaa no?

 Mingjie kaa dɛ, wɔ afe 2008 mu no, ne nyɛnko bi kaa kyerɛɛ no dɛ asɔr bi wɔ hɔ a wɔboa hɔn a woedzi dzɛm, ntsi ɔmbra ma wɔnkɔ bi. Dɛm ntsi ɔnye no kɔree. Aber a wɔpoon asɔr no, Mingjie bisaa ɔsɔfo no dɛ ebɛn nwoma na oyii ne nkyerɛkyerɛ no fii mu. Ɔsɔfo no kaa kyerɛɛ Mingjie dɛ oyii ne nsɛm no fii Nyankopɔn n’Asɛm Bible no mu. Asɛm a ɔkae no maa Mingjie n’enyi gyee ho paa dɛ ɔbɛkenkan Bible no. Dɛm ntsi ɔkɛpɛɛ Chinese Bible a wɔayɛ ama enyifurafo no bi. Nna Bible yi wɔ mu afa ahorow 32, na ɔdze bɛyɛ abosoom esia kenkaan ne nyina. Mingjie gu do rekenkan Bible no, obohun dɛ Baasakor nkyerɛkyerɛ a n’asɔr no kyerɛkyerɛ no nnyɛ nokwar. Afei so obohun dɛ Nyankopɔn ne dzin dze Jehovah.

 Ber rokɔ do no, asɔrmba no hɔn abrabɔ maa Mingjie n’abaw mu bui. Obohun dɛ asɔrmba no mmfa Bible mu asɛm a ɔrekenkan no mmbɔ hɔn bra. Dza nna wɔyɛ no bi nye dɛ, sɛ nna wɔrekyɛ edziban a wɔdze papa no ma hɔn a hɔn enyi mmfurae no, na sɛ wowie a nna wɔdze n’ase n’ase no ama enyifurafo no. Osian dza nna wɔdze reyɛ enyifurafo no ntsi, Mingjie no werɛ hoow paa. Iyi maa ɔyɛɛ n’adwen dɛ ɔbɛpɛ asɔr fofor akɔ. Dza nna wɔdze ayɛ Mingjie no ntsi na ɔbɔɔ mpaa dɛ Nyankopɔn mboa no ma onhu asɔr a ɔyɛ papa no.

 Dza Yanmei yɛe dze boaa Mingjie no kaa n’akoma papaapa, dɛm ntsi ɔpeen do dɛ ɔnye no mbosua Bible. Da a odzi kan a Mingjie kɔr Jehovah Adasefo asafo nhyiamu ase no, dza ohun no yɛɛ no nwanwa paa. Ɔkaa dɛ: “Mo werɛ rimmfir dɛm nhyiamu yi da. Enuanom a wɔwɔ hɔ no nyina gyee me fɛw do na iyi maa m’akoma tɔɔ me yamu. Ɔwɔ mu m’enyi efura dze, naaso ɔdɔ a wɔdaa no edzi kyerɛɛ me no dze, muhunii. Nna nyiyimu biara nnyi hɔ.”

 Mingjie kɔr do suaa Bible no, na ɔhyɛɛ ase kɔr asafo nhyiamu a nna ɔnntoto mu. Adze a nna n’enyi gye ho paa nye dɛ ɔbɔtow ndwom wɔ asafo nhyiamu ase. Naaso nna ndwom no nnyi braille mu, ntsi nna ɔyɛ dzen ma no dɛ ɔbɔtow. Enuanom a wɔwɔ n’asafo no mu no boaa no ma ɔyɛɛ ndwom buukuu no bi. Ndwom ahorow 151 na ɔwɔ hɛn ndwom buukuu no mu, na Mingjie dze ndɔnhwer 22 kyerɛɛw ne nyina! Mingjie hyɛɛ ase dɛ ɔrokɔ asɛnka wɔ April 2018 mu. Bosoom biara, nna otum dze ndɔnhwer bɛyɛ 30 ka asɛm no kyerɛ nkorɔfo.

 Aber a Mingjie yɛɛ n’adwen dɛ obonuma no, nsɛmbisa a yɛnye hɔn a wɔpɛ dɛ wonuma no susu ho a ɔwɔ Organized to Do Jehovah’s Will buukuu no mu no, Yanmei yɛɛ no rekɔɔden, na ɔdze maa Mingjie ma ɔbɔe tsiei. Wonumaa Mingjie wɔ July 2018. Mingjie kaa dɛ: “Ɔdɔ a enuanom daa no edzi wɔ ehyiadzi no ase no kaa me papaapa. Iyi maa musui. Muhun dɛ asɔr papa nye yi.” (John 13:34, 35) Mingjie so pɛ dɛ ɔda ɔdɔ edzi kyerɛ afofor, ntsi ɔdze mber pii ka asɛmpa no kyerɛ nkorɔfo.