No Ho Nsɛm
No Ho Nsɛm
Ibotum Ahwɛ Nsɛm Yi So
YƐWƆ OBU MA WO KUKUA MU NSƐM
Obu a yɛbɛkyerɛ ama wo kukua mu nsɛm na yaabɔ ho ban no hia hɛn papaapa. Wɛbsaet yi No Ho Nsɛm yi yɛ biribi a yebotum egyina do dze woho nsɛm bi a yebebisa anaa woho nsɛm bi a edze bɛma hɛn biara no edzi dwuma wɔ hɛn wɛbsaet do. Sɛ eba hɛn wɛbsaet yi do a, yɛdze woho nsɛm ahorow bi sie na yɛgye to mu dɛ no ho hia dɛ yɛkora dɛm nsɛm no do yie, na ɔwɔ dɛ yɛma ihu dwuma a yɛdze dɛm nsɛm no bedzi. Ibotum dze nsɛm bi a wobu no dɛ ɔyɛ woho nsɛm no ama hɛn. Asɛm “woho asɛm” a wɔdze edzi dwuma wɔ wɛbsaet yi No Ho nsɛm mu no yɛ nsɛm bi tse dɛ wo dzin, wo e-mail address, beebi a etse, wo tɛlefon nɔmba, anaa nsɛm afofor biara a wobotum dze ehu wo no. Worimmbisa woho nsɛm biara ana eetum dze wɛbsaet yi ne fã a obiara tum kɔ hɔ no edzi dwuma. Sɛ yɛdze kasafua “wɛbsaet” dzi dwuma a, ɔyɛ dɛm wɛbsaet yi nye wɛbsaet ahorow a ɔka ho tse dɛ apps.pr418.com, tv.pr418.com, stream.pr418.com, na wol.pr418.com nyina na yɛrekã ho asɛm.
MBRƐ YEBOTUM DZE WOHO NSƐM EDZI DWUMA
Wɛbsaet yi yɛ Watchtower Bible and Tract Society of New York, Inc. (“Watchtower”) no dze. Ɔyɛ edwumakuw bi a wɔmmfa mmpɛ sika a ɔwɔ New York, na hɔn na wɔboa Jehovah Adasefo hɔn dwumadzi nye Bible nkyerɛkyerɛ edwuma a Jehovah Adasefo yɛ no. Sɛ warankasa fi wo pɛ mu bue account bi, iyi ntoboa, ibisa dɛ wɔnye wo mbɛyɛ Bible adzesua a irunntua hwee, anaa eyɛ biribi a ɔbɛma woebisa woho nsɛm bi a, ɔkyerɛ dɛ egye wɛbsaet yi No Ho Nsɛm no to mu, na dɛmara so na egye to mu dɛ wobotum dze woho nsɛm no esie wɔ servers a ɔwɔ United States of America no do na wobotum afa woho nsɛm no, wɔdze edzi dwuma, wɔdze amona, na Watchtower nye ahyehyɛdze ahorow a wɔboa Jehovah Adasefo wɔ aman ahorow do no so botum akora do na woedzi w’ebisadze no ho dwuma dɛ mbrɛ ɔsɛ. Dɛm nyamesom ahyehyɛdze yi nam ahyehyɛdze ahorow a wɔwɔ aman ahorow mu no do na wodzi dwuma wɔ wiadze nyina. Hɔn a wobotum dze woho nsɛm bi edzi dwuma no botum ayɛ Jehovah Adasefo asafo ahorow a wɔwɔ wo man mu, nkorbata edwumayɛbea ahorow, nye Jehovah Adasefo ndwumakuw ahorow bi a ɔtsetse dɛm.
Mbrɛ yebotum dze woho nsɛm bi edzi dwuma no gu ahorow na obegyina dwuma pɔtsee a ibedzi wɔ wɛbsaet no do. Dɛ mfatoho no, sɛ iyi ntoboa ma mbra kwan do ahyehyɛdze bi a ɔwɔ ɔman pɔtsee bi mu a, dɛm mbra kwan do ahyehyɛdze no dze wo dzin na nsɛm afofor a wobotum dze ehu wo a edze bɛma hɔn no bedzi dwuma wɔ wo ntoboayi no mu. Mfatoho fofor so nye dɛ, sɛ ibisa dɛ wɔnye wo mbɛyɛ Bible adzesua a, wɔdze wo dzin na woho nsɛm afofor no bɛma Jehovah Adasefo nkorbata edwumayɛbea nye asafo bi a ɔbɛn wo no ma woeedzi w’ebisadze no ho dwuma.
Sɛ ɔman a etse mu no wɔ mbra pɔtsee bi a ɔfa ankorankor ho nsɛm a wɔkora do a, mbrɛ ɔbɛyɛ na yeetum aboa wo no, ibotum ahwɛ dɛm ɔman no n’address wɔ Ankorankor Ho Nsɛm A Wɔkora Do ɔfã hɔ.
MBRƐ YƐBƆKORA WOHO NSƐM DO YIE NA YAABƆ HO BAN
Yebu woho nsɛm a yɛbɔkora do yie na yɛabɔ ho ban no enyibersɛm papaapa. Abaɛfor nhyehyɛɛ na kwan a wɔfa do bɔ ankorankor ho nsɛm ho ban a wɔaba fofor no na yɛdze dzi dwuma dze bɔ woho nsɛm ho ban, na amma hɔn a wonnyi ho kwan dɛ hɔn nsa ka dɛm nsɛm no, hɔn a wɔremmfa nndzi dwuma wɔ kwan pa do anaa wɔmmfata dɛ wohu, hɔn a wonnyi ho kwan dɛ wɔyɛ mu nsesa, nye hɔn a mbra mma hɔn kwan dɛ wɔsɛɛ woho nsɛm no nsa annka, anaa woemmfi hɛn nsa awerɛfir mu. Hɔn a wɔdze woho nsɛm bedzi dwuma nye ndwumakuw afofor biara a yɛnye hɔn bedzi dwuma ma wɔdze woho nsɛm edzi dwuma bi no nyim dɛ ɔyɛ hɔn asodzii dɛ wɔkyerɛ obu ma woho nsɛm biara. Ber tsentsen a ohia na ɔfata dɛ yɛkora woho nsɛm bi do dze dzi dwuma ma ɔnye siantsir a yɛgyee no hyia no nko na yɛbɔkora do, anaa dɛ mbrɛ ɔnye mbra kwan do nhyehyɛɛ ahorow a ɔfa ber tsentsen a wɔhwehwɛ dɛ wɔdze asɛm bi sie ho no hyia no.
Sɛ yɛdze woho nsɛm rifi bea bi akɔ bea fofor a, yɛdze nhyehyɛɛ bi tse dɛ Transport Layer Security (TLS) no dzi dwuma dze bɔ ho ban. Mbrɛ ɔbɛyɛ na yeetum abɔ kukua mu nsɛm a wɔdze ma hɛn no ho ban no, yɛdze nsɛm no gu kɔmpiwta mfir ahorow a ɔnnyɛ obiara na obotum akɔ mu no do, na yɛdze dɛm mfir no sisi mbea ahorow bi a wɔagye ho, na yɛdze elɛktrɔnek mfir nye akwan ahorow bi a wɔfa do bɔ ndzɛmba ho ban dzi dwuma dze bɔ dɛm nsɛm no ho ban. Yɛdze nhyehyɛɛ a ɔma yɛkora nsɛm do na yɛbɔ ho ban no yɛ edwuma yie na yedzi do fenkyemm na amma obiara a onnyi ho kwan dɛ ne nsa ka dɛm nsɛm no nsa annka.
MBOFRA
Sɛ eyɛ abofra wɔ ɔman a edze hɛn wɛbsaet ridzi dwuma wɔ mu no mu a, gyedɛ wo nã, w’egya anaa w’awofo anaa obi a ɔhwɛ wo do no nsa wɔ mu bi ana eetum dze woho nsɛm ama wɔ wɛbsaet yi do. Sɛ hom yɛ awofo, anaa sɛ eyɛ egya, nã, anaa ehwɛ abofra bi do na ema no kwan ma ɔdze noho nsɛm ma wɔ wɛbsaet yi do a, ɔkyerɛ dɛ egye wɛbsaet yi No Ho Nsɛm no to mu na w’abofra no botum dze wɛbsaet yi edzi dwuma.
NDWUMAKUW AFOFOR (THIRD-PARTY VENDORS)
Ɔtɔfabi a wɛbsaet yi botum nye wo ekopue ndwumakuw afofor bi a yɛapen do dɛ wondzi dwuma bi mma hɛn no hɔn wɛbsaet do (dɛ mfatoho no, aber a erehyehyɛ fɔɔm bi wɔ intanɛt do no). Sɛ ifi wɛbsaet yi do kɔ edwumakuw fofor bi ne wɛbsaet do a ibohu, osiandɛ ndzɛmba a ihu no bɛsesa na address bar a ɔwɔ browser no do no so bɛsesa. Sɛ yɛpaw ndwumakuw afofor bi, anaa yɛapaw hɔn dada mpo a, ofi ber to ber no, yɛyɛ hɔn wɛbsaet no ho nsɛm nye mbrɛ wɔkora ankorankor ho nsɛm do no mu nhwehwɛmu hwɛ hu dɛ ana hɔn nhyehyɛɛ no da ho ara nye hɛndze no hyia anaa. Naaso, mbrɛ dɛm ndwumakuw afofor yi dzi hɔn dwuma nye kwan a wɔafa do ahyehyɛ hɔn app ahorow na wɔdze yɛ edwuma, no ho nhyehyɛɛ, no ho nsɛm ahorow, nye nsɛm afofor bi a ɔka ho no dze, yerunntum nnyɛ ho hwee. Iyi ntsi, mbrɛ edze hɔn app ahorow no nye hɔn dwumadzi bedzi dwuma wɔ wɛbsaet yi do no begyina mbrɛ dɛm ndwumakuw ahorow no dwumadzi ho nsɛm nye no ho nhyehyɛɛ a wɔdze ato gua sesei no tse no do. Sɛ ndwumakuw afofor no yɛ nsesa wɔ hɔn dwumadzi ho nhyehyɛɛ mu a, wɔmmbɔ hɛn amandzɛɛ, ntsi yɛserɛ wo, dzi kan hwɛ hɔn nhyehyɛɛ no mu ana edze eedzi dwuma. Sɛ ewɔ edwumakuw fofor bi hɔn nhyehyɛɛ ho nsɛmbisa bi a, yeserɛ wo dɛ hwɛ hɔn nhyehyɛɛ ho nsɛm a ɔwɔ hɔn wɛbsaet do no.
Sɛ edze Google Map bedzi dwuma wɔ dɛm wɛbsaet yi do a, ɔkyerɛ dɛ edze Google wɛbsaet no ho nhyehyɛɛ a ɔwɔ hɔ sesei no bɛyɛ edwuma. Google yɛ edwumakuw fofor, ntsi yerunntum mmfa mbrɛ hɔn wɛbsaet no yɛ edwuma, hɔn apps, nye hɔn wɛbsaet no ho nhyehyɛɛ ho mbra mma. Dɛm ntsi, sɛ edze Google Maps dzi dwuma wɔ dɛm wɛbsaet yi do a, ɔkyerɛ dɛ edze Google Maps/Google Earth no ho nhyehyɛɛ a ɔwɔ hɔ sesei no bɛyɛ edwuma. Sɛ ndwumakuw afofor no yɛ nsesa wɔ hɔn dwumadzi ho nhyehyɛɛ mu a, wɔmmbɔ hɛn amandzɛɛ, ntsi yɛserɛ wo, dzi kan hwɛ Google Maps dwumadzi no ho nhyehyɛɛ no mu ana edze edzi dwuma. Sɛ enngye Google Maps dwumadzi ho nhyehyɛɛ no nnto mu a, mma mmfa nndzi dwuma.
WƐBSAET YI NO HO NSƐM MU NSESA HO AMANDZƐƐBƆ
Aber biara yɛbɔ mbɔdzen dɛ yɛdze ndzɛmba afofor bɛba wɛbsaet yi do na aama mbrɛ wɛbsaet yi dzi dwuma no etu mpon, na ɔyɛ so a yɛdze ndzɛmba afofor ka dza ɔwɔ hɔ dada no ho na yɛyɛ mbrɛ wɛbsaet yi dzi dwuma no mu nsesa na aama no do dwumadzi no etu mpon. Osian dɛm nsesa a ɔtaa kɔ do, nye nsesa ahorow so a ɔyɛ a ɔba wɔ abaɛfor mfirdwuma ho mbra nye no ho nyimdzee mu ntsi, ofi ber to ber no, nsesa bɛba mbrɛ yesi dze nsɛm dzi dwuma wɔ wɛbsaet yi do no mu. Sɛ no ho ba hia dɛ yɛyɛ nsesa wɔ wɛbsaet yi No Ho Nhyehyɛɛ mu a, yɛdze nsesa biara a yɛayɛ no bɔto ɔfã ha, na aama aber biara, ehu woho nsɛm pɔtsee a yɛgye nye kwan a yɛfa do dze dzi dwuma.
ACTIVE SCRIPTING ANAA JAVASCRIPT
Yɛdze scripting dzi dwuma na aama hɛn wɛbsaet yi no do dwumadzi etu mpon. Yɛdze scripting dzi dwuma wɔ abaɛfor kwan do na aama wo nsa aka nsɛm a ihia wɔ wɛbsaet yi do no ntsɛntsɛm. Wɛbsaet yi mmfa scripting nndzi dwuma mmfa kɔmpiwta do dwumadzi bi nngu wo kɔmpiwta do anaa ɔmmfa nngye woho nsɛm aber a yɛnngyee dɛm ho kwan no mmfii wo hɔ.
Wɛbsaet yi n’afã bi wɔ hɔ a ɔwɔ dɛ esɔ Active Scripting anaa Javascript no wɔ wo browser no mu ansaana oetum ayɛ edwuma yie. Browser ahorow piinara wɔ hɔ a wɛbsaet pɔtsee bi a ebɔkɔ do no na ɔbɛma Active Scripting anaa Javascript no asɔ anaa oedum. Hwɛ nsɛm a ɔwɔ browser no ne fã a wɔato dzin Help no mu na hu mbrɛ ibotum asɔ scripting no na edze eedzi dwuma wɔ wɛbsaet ahorow pɔtsee bi do.