Bible no mu ngyinadonsɛm ahorow ma Jehovah Adasefo ahyehyɛdze no kora ankorankor biara no kukua mu nsɛm do yie. Ahyehyɛdze no nyim hia a ohia dɛ wodzi nokwar ber a wɔnye ankorankor biara ridzi nkitaho nye ber a wɔregye nyimpa biara no kukua mu nsɛm mbrɛ ɔbɛyɛ a wobotum edzi Jehovah Adasefo hɔn ehiadze ho dwuma, na woeedzi dwuma biara a ɔfa hɔn som nye mboa a wɔdze ma a wɔnngye hwee no ho. Nkyii so, dɛm dwumadzi ahorow yi ma wohu hia a ohia dɛ wɔkora nsɛm biara a wɔgye no do, na wɔbɔ ho ban yie. (Mbɛbusɛm 15:22; 25:9) Nsɛm a wɔbɔkora do yie no som bo ma hɔn papaapa.​—Mbɛbusɛm 20:19.

Aman ahorow pii ahyehyɛ mbra a ɔbɔ ankorankor biara no kukua mu nsɛm ho ban. Ansaana wɔrehyehyɛ mbra ahorow yi mpo no, nna wofi tsetse nyim Jehovah Adasefo dɛ wɔyɛ ahyehyɛdze a wɔkyerɛ obu ma ankorankor biara no kukua mu nsɛm, na wɔkora do yie. Jehovah Adasefo hɔn ahyehyɛdze no bɔkɔ do akora kukua mu nsɛm biara a wɔdze ma hɔn no do dɛ mbrɛ ɔnye dza ofi tsetse wonyim hɔn dɛ wɔyɛ no hyia no. Adzeyɛ yi na wɔayɛ ho kyerɛwtohɔ wɔ dɛm nhyehyɛɛ yi mu no.

Dɛm nhyehyɛɛ yi fa Jehovah Adasefo hɔn ahyehyɛdze no nyina ho. Hɔn edwumayɛbea nkorbata ahorow a ɔwɔ wiadze nyina no na ɔyɛ hɔn ahyehyɛdze no ananmugyinafo.

Jehovah Adasefo hɔn ahyehyɛdze no bedzi ankorankor biara no kukua mu nsɛm ho dwuma dɛ mbrɛ dɛm ngyinadonsɛm ahorow a odzidzi do yi tse:

1. Wobedzi ankorankor biara no ho nsɛm ho dwuma wɔ mbra kwan do a nyiyimu biara nnyi mu.

2. Wɔbɛgye ankorankor biara no ho nsɛm na woeedzi ho dwuma dɛ mbrɛ ohia, na obotum ama Jehovah Adasefo akɔ do edzi dwuma a ɔfa hɔn som nye mboa a wɔdze ma a wɔnngye hwee no ho.

3. Wɔbɔhwɛ dɛ ankorankor biara no ho nsɛm dzi mu. Sɛ ahyehyɛdze no hu dɛ mfom bi aba nyimpa bi no ho nsɛm a wɔagye ho a, wobedzi ho dwuma ntsɛmara.

4. Wɔbɔkora ankorankor biara no ho nsɛm do ber tsentsen a ohia ma ahyehyɛdze no no dwumadzi ahorow.

5. Wɔbɛyɛ dza wobotum biara dze akyerɛ obu ama ho kwan a ankorankor biara a ɔdze no ho nsɛm ama no wɔ.

6. Wɔdze nhyehyɛɛ a odzi mu bogu akwan mu mbrɛ ɔbɛyɛ a wɔrennda obi no kukua mu nsɛm edzi nnkyerɛ obi fofor. Paaswɛɛd wɔ kɔmpiwta ahorow a wɔdze ankorankor biara no kukua mu nsɛm egu do no do. Nyimpa a wɔdze ho kwan no ama hɔn no pɛ na wobotum asɔ kɔmpiwta no. Wɔtotow ɔfese ahorow no mu aber a wɔapon edwuma, na nyimpa a wɔyɛ edwuma wɔ hɔ no nkotoo na wobotum ahɛn hɔ.

7. Wonnkeyi obi no kukua mu nsɛm efi nkorbata kor mu dze akɔ fofor mu gyedɛ dɛm adzeyɛ yi ho ebehia na ama Jehovah Adasefo hɔn ahyehyɛdze no eetum edzi dwuma biara a ɔfa hɔn som anaa mboa a wɔdze ma a wɔnngye hwee no ho. Jehovah Adasefo nyina efi hɔn pɛ mu agye ato mu, na woesi gyinae dɛ wɔbɛyɛ dɛm ahyehyɛdze yi a ɔma wɔda hɔnho edzi dɛ Jehovah Adasefo no mufo.

1. Ankorankor biara wɔ ho kwan dɛ wɔkora no kukua mu nsɛm do yie. Nkyii so, sɛ woridzi mfom bi a ɔfa obi no ho nsɛm ho dwuma anaa worutwa obi no ho nsɛm no mu a, ɔwɔ ho kwan dɛ wɔkora no ho nsɛm no do yie. Jehovah Adasefo bɔhwɛ ayɛ iyi dɛ mbrɛ wɔada no edzi wɔ dɛm nhyehyɛɛ yi mu no.

2. Sɛ obi pɛ dɛ wodzi nsɛm bi ho dwuma ma no dɛ mbrɛ ɔfã yi kyerɛ a, ɔwɔ dɛ ɔma wohu ne nyimpa ban a ɔyɛ ho nsɛm a ɔfata.

3. Sɛ obi pɛ dɛ ohu, ɔyɛ nsesã ahorow bi anaa wotwa no kukua mu nsɛm bi mu a, ahyehyɛdze no bosusu ho yie ahwɛ dɛ dɛm a wɔbɛyɛ no rennkã hɔn dwumadzi anaa hɔn som mu gyedzi ahorow nnhyɛ, na woeedzi ho dwuma dɛ mbrɛ ɔbɔboa nyimpa no nye ahyehyɛdze no nyina.

4. Ahyehyɛdze no wɔ ɔpɛ dɛ ɔbɔkora ankorankor biara a ɔyɛ Jehovah Dasenyi no ho nsɛm do afebɔɔ. Sɛ wotwa nsɛm a ɔtse dɛm mu a, ɔbɛkã ahyehyɛdze no no dwumadzi nye no som mu gyedzi ahorow no ahyɛ.

Sɛ obi susu dɛ wɔakã ho kwan ahorow a ɔwɔ no ahyɛ a, obotum akyerɛw krataa dze n’asɛm akɛdan Nkorbata Egyinatukuw no. Ɔsɛ dɛ ɔyɛ dɛm wɔ adapɛn ebien ntamu.