Mark Asɛmpa 1:1-45
-
John Onumanyi no kaa asɛm no (1-8)
-
Wonumaa Jesus (9-11)
-
Satan sɔɔ Jesus hwɛe (12, 13)
-
Jesus hyɛɛ ase kaa asɛm no wɔ Galilee (14, 15)
-
Jesus frɛɛ n’esuafo a wodzi kan (16-20)
-
Otuu sunsum fi (21-28)
-
Jesus saa nyimpa pii yarba wɔ Kapernaum (29-34)
-
Ɔkɛhyɛɛ beebi a obiara nnyi hɔ kɔbɔɔ mpaa (35-39)
-
Ɔsaa ɔkwatanyi bi yarba (40-45)
1 Asɛmpa a ɔfa Nyankopɔn ne Ba Jesus Christ ho no, n’ahyɛse nye yi:
2 Wɔakyerɛw wɔ nkɔnhyɛnyi Isaiah no nwoma no mu dɛ: “(Hwɛ, morosoma mo somafo ma oeedzi w’enyim kan, ɔno na obesiesie wo kwan mu ama wo.)
3 Obi retsea mu wɔ sar no do dɛ: ‘Hom nsiesie Jehovah* no kwan! Hom mma akwan a ɔda n’enyim no ntsen.’”
4 Na dɛ mbrɛ wɔakyerɛw no, nna John Onumanyi no wɔ sar no do, na ɔpaa mu kaa kyerɛɛ nkorɔfo dɛ ɔsɛ dɛ wonuma* dze kyerɛ dɛ woenu hɔnho, ama wɔdze hɔn bɔn aakyɛ hɔn.
5 Na hɔn a wɔwɔ Judea mantɔw no mu nyina nye hɔn a wɔtsetse Jerusalem nyina baa ne nkyɛn, na onumaa hɔn wɔ* Jordan Esutsen no mu, na wɔpaa mu kaa hɔn bɔn.
6 Nna John hyɛ atar a wɔdze efupɔnkɔ no nhwi ayɛ, na bɛlt* bi a wɔdze abowa nwoma ayɛ so bɔ n’asen. Nna n’edziban a odzi nye mbɛbɛw na ewo.
7 Dza nna ɔka kyerɛ nkorɔfo nye dɛ: “Obi a ɔwɔ tum kyɛn me dzi m’ekyir reba, na mennsɛ mmfata dɛ mobɔbɔ mo mu adze asan ne mpaboa n’ahoma mpo.
8 Emi dze munumaa hom wɔ nsu mu, naaso ɔno dze ɔdze sunsum krɔnkrɔn bonuma hom.”
9 Dɛm aber no, Jesus fi Nazaret a ɔwɔ Galilee no bae ma John numaa no wɔ Jordan Esutsen no mu.
10 Na aber a ofi nsu no mu rupue no ara na ohun dɛ ɔsor rubue, na sunsum krɔnkrɔn no ayɛ tse dɛ ebubur risian ba no do.
11 Na ndze bi fi sor kaa dɛ: “Ɔwo nye me Ba a modɔ wo; Magye wo ato mu.”
12 Na ntsɛmara na sunsum no maa ɔkɔr sar no do.
13 Ntsi ɔtsenaa sar no do ndafua 40, na Satan sɔɔ no hwɛe. Nna ɔnye haban mu mbowa wɔ hɔ, na abɔfo soom no.
14 Afei aber a wɔkyeer John no, Jesus kɔr Galilee kɛkaa asɛmpa a ofi Nyankopɔn hɔ no.
15 Asɛm a nna ɔka nye dɛ: “Ber a wɔhyɛe no aso, na Nyankopɔn n’Ahendzi* no abɛn. Hom nnu homho, na hom ngye asɛmpa no ndzi.”
16 Na aber a ɔnam Galilee Po no ho no, ohun Simon na no nua Andrew* dɛ wɔrotow hɔn eboa wɔ po no mu, osiandɛ nna wɔyɛ afarfo.
17 Na Jesus kaa kyerɛɛ hɔn dɛ: “Hom mbedzi m’ekyir, na mebɛma hom eyi* nyimpa.”
18 Ntsi ntsɛmara na wogyaa hɔn eboa no wɔ hɔ na wodzii n’ekyir.
19 Na aber a ɔkɔr n’enyim kakra no, ohun Zebedee ne ba James na no nua John dɛ wɔtsena hɔn hɛmba mu resa* hɔn eboa.
20 Na ntsɛmara na ɔfrɛɛ hɔn. Ntsi wogyaa hɔn papa Zebedee na apaafo no hɔ wɔ hɛmba no mu, na wokedzii n’ekyir.
21 Na wɔkɔr Kapernaum.
Na odur Ahomgyeda no ara pɛ na ɔkɔr nhyiamudan no mu, na ɔhyɛɛ ase dɛ ɔrekyerɛkyerɛ.
22 Na kwan a ɔfaa do kyerɛkyerɛe no yɛɛ hɔn nwanwa, osiandɛ ɔkyerɛkyerɛɛ hɔn tse dɛ obi a ɔwɔ tum, na nnyɛ dɛ akyerɛwfo no.
23 Dɛm aber no ara so, nna ɔbarimba bi wɔ nhyiamudan no mu a sunsum fi wɔ no do, na ɔtseatseaa mu dɛ:
24 “Nazaretnyi Jesus, ebɛnadze na yɛnye wo wɔ yɛ? Aba dɛ erebɛsɛɛ hɛn anaa? Minyim wo nyimpa ban, ɔwo nye Nyankopɔn no Krɔnkrɔnnyi no!”
25 Naaso Jesus twuuw n’enyim, na ɔkaa kyerɛɛ no dɛ: “Ka w’ano to mu, na fi no mu pue!”
26 Na sunsum fi no maa ɔbarimba no wosoow gidzigidzi, na ɔdze ndze kɛse tseatseaa mu na ofii ɔbarimba no mu.
27 Na nkorɔfo no nyina ho boow hɔn araa ma wɔhyɛɛ ase dɛ woribisabisa hɔnho dɛ: “Ebɛnadze nye yi? Iyi dze nkyerɛkyerɛ fofor a! Ɔdze tum kasa kyerɛ esunsum fi mpo ma wotsie no.”
28 Na noho nsɛm tahyee ntsɛntsɛm wɔ Galilee mantɔw no mu beebiara.
29 Afei Jesus, James, John, Simon na Andrew fii nhyiamudan no mu na wɔkɔr Simon na Andrew hɔn fie.
30 Nna Simon n’asew basia yar da hɔ ma oenya fiiva.* Na ntsɛmara na wɔkaa ne yarba no ho asɛm kyerɛɛ Jesus.
31 Ntsi Jesus kɔr ne nkyɛn kosuoo ne nsa mu na ɔmaa no do. Na ne fiiva no kɔree, na ɔhyɛɛ ase soom hɔn.
32 Na odur ewimbir a ewia rokɔtɔ no, nkorɔfo hyɛɛ ase dze hɔn a wɔyar nye hɔn a wɔwɔ esunsum fi nyina boguu no do.
33 Na nyimpa a wɔwɔ kurow no mu nyinara tuu bum baa fie no n’abow no ano.
34 Ntsi ɔsaa nyimpa pii a nna wɔyar no yarba, na otutuu esunsum fi pii so. Ɔamma esunsum fi no kwan ma wɔannkasa, osiandɛ nna wonyim dɛ ɔno nye Christ no.*
35 Na ɔsoɛɛr anapatutuutu aber a nna wimu nntsetsewee, na opuei kɛhyɛɛ beebi a obiara nnyi hɔ kɔbɔɔ mpaa.
36 Na Simon nye hɔn a wɔka no ho no kekyinkyinii kɔhwehwɛɛ no.
37 Na aber a wohun no no, wɔkaa kyerɛɛ no dɛ: “Obiara rohwehwɛ wo.”
38 Naaso ɔkaa kyerɛɛ hɔn dɛ: “Hom mma yɛnkɔ beebi fofor, yɛnkɔ nkurow a ɔbembɛn ha yi mu na menkɛka asɛm no wɔ hɔ so, osiandɛ iyi ntsi na mebae.”
39 Na ɔkɔree kɛkaa asɛm no wɔ nhyiamudan a ɔwowɔ Galilee nyina mu, na otutuu esunsum fi.
40 Na ɔkwatanyi bi so baa ne nkyɛn bobuu ntwɛr wɔ n’enyim, na ɔserɛɛ no dɛ: “Sɛ epɛ a, ibotum asa me yarba.”
41 No ho yɛɛ no mbɔbɔr, ntsi ɔtseen ne nsa kaa no, na ɔkaa kyerɛɛ no dɛ: “Mepɛ! Woho ntɔ wo.”
42 Na amonmu hɔ ara no kwata no tui yewee, na noho tɔɔ no.
43 Na ntsɛmara Jesus gyaa no kwan ma ɔkɔree. Naaso ansaana ɔrobɔkɔ no, ɔbɔɔ n’ano dɛ:
44 “Hwɛ na aannka annkyerɛ obiara. Mbom osiandɛ woho atɔ wo ntsi, kɔ na fa woho kɛkyerɛ asɔfo no, na kɔbɔ afɔr a Moses hyɛɛ ho mbra no, ama hɔnankasa eedzi ho dase.”
45 Naaso aber a ɔbarimba no fii hɔ kɔree no, ɔkɔbɔɔ asɛm no dawur na ɔmaa asɛm no tahyee. Dɛm ntsi Jesus enntum ennyi n’enyim annkɔ kurow biara mu, mbom mbea ahorow a wɔatsew no ho wɔ kurow no ekyir no, hɔ na ɔkɛtsenae. Naaso nkorɔfo fifi mbea ahorow pii baa ne nkyɛn.
Ase Hɔ Nsɛm
^ Hwɛ Nke. A5.
^ Anaa “wɔbɔ esu.”
^ Anaa “na ɔdze hɔn nuu; na ɔdze hɔn hyɛɛ.”
^ Anaa “abɔyamu.”
^ Anaa “n’Ahenman; n’Aban.”
^ Simon no nua Andrew.
^ Anaa “apa.”
^ Anaa “risiesie.”
^ Anaa “papu; ibun.”
^ Obotum so akyerɛ, “nna wonyim nyimpa kor a ɔyɛ.”
