Mark Asɛmpa 11:1-33
11 Aber a wɔrebɛn Jerusalem, na wodur Betfage na Betani a ɔwɔ Ngodua Bepɔw no do no, ɔsomaa n’esuafo no mu beenu,
2 na ɔkaa kyerɛɛ hɔn dɛ: “Hom nkɔ ekuraase a hom enyi tua yi mu. Na sɛ hom du hɔ ara pɛ a, hom bohu asoasopɔnkɔ ne ba a wɔamontan no a obiara nntsenaa no do da. Hom nsan no na hom mfa no mbra ha.
3 Na sɛ obi bisa hom dɛ, ‘Ebɛnadze ntsi na hom resan no?’ a, hom nka dɛ, ‘Ewuradze hia no. Na sɛ owie ara pɛ a, ɔbɛsan dze no aba.’”
4 Ntsi wɔkɔree na wokohun dɛ wɔamontan asoasopɔnkɔ ne ba no wɔ abow bi ho wɔ paado, ntsi wɔsaan no.
5 Nna hɔn a wogyinagyina hɔ no bi bisaa hɔn dɛ: “Hom resan asoasopɔnkɔ ne ba no ayɛ dɛn?”
6 Asɛm a Jesus kae no, dɛm pɛpɛɛpɛ na wɔkaa kyerɛɛ hɔn, na wɔmaa hɔn kwan.
7 Na wɔdze asoasopɔnkɔ ne ba no brɛɛ Jesus, na wɔdze hɔn ntar ngugudo guu no do, na ɔtsenaa do.
8 Afei so, nyimpa dodowara dze hɔn ntar ngugudo sesɛɛw kwan no mu, na binom so twitwaa dua ne nsa wɔ haban mu.
9 Na hɔn a wodzi n’enyim nye hɔn a wodzi n’ekyir no nyina kɔr do tseatseaa mu dɛ: “Yɛserɛ wo, gye no! Nhyira nye nyia ɔba wɔ Jehovah* ne dzin mu!
10 Nhyira nye hɛn egya David n’Ahendzi a ɔreba no! Yɛserɛ wo, gye no, ɔwo a ewɔ ɔsorsor!”
11 Aber a odur Jerusalem no ɔkɔr asɔrfie hɔ, na ɔtoo n’enyi hwɛɛ ndzɛmba a ɔwɔ hɔ nyina, naaso nna adze resa, ntsi ɔnye Duebien no fii hɔ kɔr Betani.
12 Adze kyee a worifi Betani no, ɔtsee dɛ ɔkɔm dze no.
13 Na ohun adɔmbadua bi a ahataw wɔ do wɔ ekyirekyir, ntsi ɔkɔhwɛɛ dɛ obenya eduaba bi wɔ do a. Naaso ɔkɔree no, oennhu hwee wɔ do dɛ ahataw nkotsee, osiandɛ nna ɔnnyɛ ber a adɔmba sow.
14 Ntsi ɔkaa kyerɛɛ dua no dɛ: “Mma obiara nndzi wo do eduaba bio ara da.” Nna n’esuafo no ritsie.
15 Afei wɔbaa Jerusalem. Na ɔkɔr asɔrfie hɔ, na ɔhyɛɛ ase paam hɔn a wɔrotɔn adze nye hɔn a wɔrotɔ adze nyina fii asɔrfie hɔ, na obutubutuuw hɔn a wɔsesa sika no hɔn apon nye hɔn a wɔtɔn mbubur no hɔn ngua.
16 Na ɔamma kwan ma obiara annsoa adze ammfa asɔrfie hɔ.
17 Na ɔkyerɛkyerɛɛ hɔn na ɔkaa kyerɛɛ hɔn dɛ: “Wɔnnkyerɛɛw dɛ, ‘Wɔbɛfrɛ me fie mpaabɔ fie ama amanaman nyina’? Naaso hom dze ayɛ beebi a epoobɔfo suma.”
18 Na asɔfompanyimfo nye akyerɛwfo no tsee no, wɔhwehwɛɛ kwan a wɔbɛfa do eku no; naaso nna wosuro no, osiandɛ ne nkyerɛkyerɛ no yɛɛ nyimpadɔm no nyina nwanwa.
19 Na odur ewimbir no, wofii kurow no mu hɔ kɔree.
20 Na anapatutuutu a worutwa mu no, wohun dɛ adɔmbadua no akyenkyen dada, ofitsi no ndwow araa dze kesi no nkɔn mu.
21 Na Peter kaae, na ɔkaa kyerɛɛ no dɛ: “Rabbi, hwɛ! adɔmbadua no a epaa no no, ɔakyenkyen.”
22 Jesus kaa kyerɛɛ hɔn dɛ: “Hom ngye Nyankopɔn ndzi.
23 Nokwar mese hom dɛ obiara a ɔbɛka akyerɛ bepɔw yi dɛ, ‘Tutu kogu po mu,’ na ɔanngye kyim wɔ n’akoma mu na mbom ɔbɛgye edzi dɛ dza ɔaka no bɛyɛ hɔ no, ɔbɛyɛ hɔ ama no.
24 Iyi ntsi na meka kyerɛ hom dɛ, biribiara a hom bɔbɔ mpaa ebisa no, hom nnya gyedzi dɛ hom nsa aka, na hom nsa bɛka.
25 Na sɛ hom soɛr gyina hɔ dɛ hom robɔ mpaa a, adze biara a obiara dze ayɛ hom no, hom mfa nkyɛ no, na hom Egya a ɔwɔ sor no so dze hom mfom bɛkyɛ hom.”
26 * ——
27 Wɔsanee baa Jerusalem bio. Na aber a ɔnenam asɔrfie hɔ no, asɔfompanyimfo nye akyerɛwfo no nye ɔman no mu mpanyimfo baa ne nkyɛn,
28 na wobisaa no dɛ: “Ebɛn tum na edze yɛ dɛm ndzɛmba yi? Na woana na ɔmaa wo dɛm tum a edze yɛ dɛm ndzɛmba yi?”
29 Nna Jesus kaa kyerɛɛ hɔn dɛ: “Mibebisa hom asɛm kor. Hom nyi me ano, na mo so mebɛka tum kor a medze yɛ dɛm ndzɛmba yi akyerɛ hom.
30 Tum a nna John wɔ a ɔdze numa no, ofi sor anaa ofi nyimpa? Hom nyi me ano.”
31 Naaso ɔyɛɛ huhuhuhu wɔ hɔn mu, na wɔkaa dɛ: “Sɛ yɛka dɛ, ‘Ofi sor’ a, obebisa hɛn dɛ, ‘Sɛ dɛm a, ebɛnadze ntsi na hom anngye no enndzi?’
32 Na yɛyɛ dɛn so bɔ hɛnho mbusu ka dɛ, ‘Ofi nyimpa’?” Nna wosuro dza nyimpadɔm no bɛyɛ, osiandɛ nna hɔn nyina bu John dɛ ɔyɛ nkɔnhyɛnyi ankasa.
33 Ntsi mbuae a wɔdze maa Jesus nye dɛ: “Yennyim.” Nna Jesus so kaa kyerɛɛ hɔn dɛ: “Sɛ dɛm dze a, nna ɔno mo so merennka tum kor a medze yɛ dɛm ndzɛmba yi nnkyerɛ hom.”
