Mark Asɛmpa 12:1-44
12 Afei ɔhyɛɛ ase dze mfatoho kasae kyerɛɛ hɔn. Ɔkaa dɛ: “Ɔbarimba bi yɛɛ wenyin haban na ɔgyee ho ban. Afei otuu amona a obekyi no wenyinaba no wɔ mu wɔ haban no mu, na ɔtoow abantsentsen so wɔ haban no mu. Ɔno ekyir no ɔdze fɛɛm ekuafo bi na otuu kwan kɔr ekyirekyir.
2 Na ber soo dɛ wɔtsetsew wenyinaba no, ɔsomaa akowaa bi dɛ ɔnkɔ ekuafo no hɔ nkɛgye wenyinaba no bi.
3 Naaso wɔkyeer no boor no, na wɔpaam no ma ɔdze nsapan kɔree.
4 Afei ɔsomaa akowaa fofor so wɔ hɔn nkyɛn, na ɔno so wɔdze adze hwee ne tsirmu na woguu n’enyim ase.
5 Ɔsomaa akowaa fofor, na ɔno dze wokum no. Ɔsanee somaa nkowaa afofor pii so, naaso wɔboor hɔn mu binom na wokunkum binom so.
6 Afei dze nna wɔaka nyimpa kor, ne ba a ɔdɔ no. Ntsi ewiei koraa no ɔsomaa ɔno so na ɔkaa dɛ, ‘Me babanyin dze, wɔbɛfɛr no.’
7 Naaso ekuafo no kekaa kyerɛɛ hɔnho dɛ, ‘Oyi na obedzi adze no. Hom mbra ma yenku no, na egyapadze no bɛyɛ hɛndze.’
8 Ntsi wɔkyeer no kum no, na wɔtoow no kyeen wenyin haban no n’ekyir.
9 Ebɛnadze na wenyin haban no wura bɛyɛ? Ɔbɛba ebokuku ekuafo no na ɔdze wenyin haban no ama nyimpa afofor.
10 Ntsi hom nnkenkaan kyerɛwsɛm yi pɛn dɛ: ‘Ɔbo a adansifo powee no, ɔno na ɔabɛyɛ ɔbo a no ho hia paa no?*
11 Iyi fi Jehovah* hɔ na ɔyɛ nwanwa wɔ hɛn enyiwa do.’ Dɛm asɛm yi hom nnkenkanee a?”
12 Ɔkaa dɛm no nna wɔpɛ dɛ wɔkyer no, osiandɛ wohun dɛ hɔnara ntsi na ɔyɛɛ dɛm mfatoho no. Naaso nna wosuro nyimpadɔm no, ntsi wogyaa no hɔ kɔree.
13 Afei wɔsomaa Farisiifo binom nye Herod n’ekyirdzifo no mu binom kɔr ne nkyɛn, mbrɛ ɔbɛyɛ a ɔbɛka asɛm bi ma woeenya no.
14 Aber a wodur hɔ no, wɔkaa kyerɛɛ no dɛ: “Kyerɛkyerɛnyi, yenyim dɛ eka nokwar na ennhwehwɛ enyimnyam mmfi nyimpa hɔ, osiandɛ ennhwɛ nyimpa enyim, na dza ekyerɛkyerɛ fa Nyankopɔn ho nyina so yɛ nokwar. Mbra ma kwan* dɛ wotua tow ma Siiza anaa ɔmma kwan?
15 Yentua, anaadɛ mma yenntua?” Aber a ohun hɔn nyaatwem no, ɔkaa kyerɛɛ hɔn dɛ: “Ɔyɛ dɛn ntsi na hom rosɔ me ahwɛ yi? Hom mfa denare* no bi mbrɛ me ma monhwɛ.”
16 Ntsi wɔdze kor brɛɛ no, na obisaa hɔn dɛ: “Woana no mfonyin nye yi, na woana no ho asɛm na wɔakyerɛw wɔ do yi?” Woyii no ano dɛ: “Siiza a.”
17 Nna Jesus so kaa kyerɛɛ hɔn dɛ: “Hom ntua dza ɔyɛ Siiza dze mma Siiza, na hom ntua dza ɔyɛ Nyankopɔn dze so mma Nyankopɔn.” Na no ho yɛɛ hɔn nwanwa.
18 Afei Sadusiifo a nna wɔka dɛ owusoɛr biara nnyi hɔ no baa ne nkyɛn bebisaa no dɛ:
19 “Kyerɛkyerɛnyi, Moses kyerɛwee maa hɛn dɛ, sɛ obi no nuabanyin wu gya ne yer na ɔannwo ba biara a, ɔsɛ dɛ no nuabanyin no war ne yer no na ɔnye no wo ba ma no nua no.
20 Nna enuanom beesuon bi wɔ hɔ. Nyia odzi kan no waree, naaso owui a ɔannwo ba biara.
21 Ntsi nyia otsia ebien no waar ɔbaa no, naaso ɔno so wui a ɔannwo ba biara, na dɛmara na ɔtoo nyia otsia ebiasa no so.
22 Na beesuon no nyina annwo ba biara. Ewiei koraa no, ɔbaa no so wui.
23 Ntsi wɔ owusoɛr no mu no, hɔn mu woana na ɔbaa no bɛyɛ ne yer? Osiandɛ hɔn beesuon no nyina waar no.”
24 Jesus kaa kyerɛɛ hɔn dɛ: “Ɔnnyɛ iyi ntsi na hom afom yi a? Osiandɛ hom nnyim Kyerɛwnsɛm no anaa Nyankopɔn no tum so.
25 Osiandɛ sɛ wonyan fi ewufo mu a, mbarimba ronnwar, na wɔremmfa mbaa so mma awar, na mbom wɔbɛyɛ dɛ sor abɔfo.
26 Ɔdze fa ewufo a wobenyan hɔn no ho no, ntsi hom nnkenkaan dza wɔakyerɛw wɔ Moses nwoma no mu no, asɛm a Nyankopɔn kaa kyerɛɛ no wɔ efuw a ɔredzɛw no mu no? Ɔkaa dɛ: ‘Emi nye Abraham Nyankopɔn, nye Isaac Nyankopɔn, nye Jacob Nyankopɔn.’
27 Ɔnnyɛ ewufo hɔn Nyankopɔn, mbom ɔyɛ atseasefo hɔn Nyankopɔn. Hom afom koraa.”
28 Na akyerɛwfo no mu kor baa hɔ bɛtsee dɛ wɔregye kyim, na ohun dɛ Jesus ebua hɔn asɛm no yie, ntsi obisaa no dɛ: “Mbransɛm no nyina, no mu hendze na odzi kan?”*
29 Jesus yii no ano dɛ: “Dza odzi kan nye yi, ‘O Israel tsie, Jehovah* hɛn Nyankopɔn yɛ Jehovah* kor.
30 Na fa w’akoma nyinara, nye wo kra* nyinara nye w’adwen nyinara nye w’ahoɔdzen nyinara dɔ Jehovah* wo Nyankopɔn.’
31 Na dza otsia ebien nye dɛ, ‘Dɔ wo nyɛnko dɛ wankasa woho.’ Mbrasɛm biara nnyi hɔ a ɔso kyɛn iyinom.”
32 Nna ɔkyerɛwfo no kaa kyerɛɛ no dɛ: “Kyerɛkyerɛnyi, nokwar no ara na aka no, ‘Nyankopɔn yɛ kor, na obiara nnyi hɔ bio ka no ho’;
33 na sɛ obi dze n’akoma nyinara, n’adwen nyinara, nye n’ahoɔdzen nyinara dɔ Nyankopɔn, na ɔdɔ ne nyɛnko dɛ nankasa no ho a, mfaso wɔ do koraa kyɛn ɔhyew afɔr na afɔrbɔ nyina.”
34 Jesus hun dɛ oebua no yie, ntsi ɔkaa kyerɛɛ no dɛ: “Enye Nyankopɔn n’Ahendzi* no ntamu kwan nnwar.” Na obiara enntum ennsi no bo dɛ obebisa no asɛm biara bio.
35 Na Jesus toaa do kyerɛkyerɛe wɔ asɔrfie hɔ, na obisaa dɛ: “Ebɛnadze ntsi na akyerɛwfo no ka dɛ Christ no yɛ David ne ba?
36 Osiandɛ sunsum krɔnkrɔn no maa David nankasa kaa dɛ, ‘Jehovah* kaa kyerɛɛ mo Wura dɛ: “Tsena me nsa nyimfa kesi dɛ medze w’atamfo bogu w’ananadze.”’
37 Ntsi sɛ David nankasa frɛɛ no Owura dze a, osi dɛn yɛ ne ba ma ɔyɛ yie?”
Na nyimpadɔm beberebe no nyina dze enyigye tsiee no.
38 Na ogu do rekyerɛkyerɛ no ɔkaa dɛ: “Hom nhwɛ yie wɔ akyerɛwfo no ho, osiandɛ dza wɔpɛ ara nye dɛ wɔbɛhyɛ ntar atsentsen ekyinkyin, na nkorɔfo dze nkyia soronko bi bɛma hɔn wɔ guado.
39 Wɔkɔ nhyiamudan mu a, wɔpɛ ngua a ɔwɔ enyim,* na sɛ wɔkɔ aponto ase so a, wɔpɛ beebi a mpanyimfo tsena.
40 Wɔgye ekunafo hɔn efie* fi hɔn nsamu, na apɛbiakyerɛ ntsi sɛ wosuo mu dɛ wɔrobɔ mpaa a, wonnwie da.* Woyinom benya atsɛmbu a no mu yɛ dzen.”*
41 Afei ɔtsenaa ase, na nna n’enyi tua sika ndaka no. Na ɔhyɛɛ ase hwɛɛ nyimpadɔm a nna wɔdze sika rugu ndaka no mu no, na esikafo beberee dze sika pii boguu mu.
42 Na ɔbaa kunafo hianyi bi so bae na ɔdze nkapɛrmba ebien a ɔnnsom bo ahen biara* boguu mu.
43 Ntsi ɔfrɛɛ n’esuafo no baa ne nkyɛn na ɔkaa kyerɛɛ hɔn dɛ: “Nokwar mese hom dɛ dza ɔbaa kunafo hianyi yi dze egu mu no, ɔdɔɔ so kyɛn sika a nkorɔfo nkaa no nyina dze ebogu sika ndaka no mu no.
44 Osiandɛ hɔn nyina dza wɔwɔ ma abor hɔn do no na wɔdze bi ebogu mu. Naaso ɔbaa yi dze, ofi ne hia mu dze dza ɔwɔ nyina na dza ɔdze bɔhwɛ noho nyina ebogu mu.”
Ase Hɔ Nsɛm
^ Kyerɛ dɛ, kutuwdo-bo.
^ Hwɛ Nke. A5.
^ Anaa “ɔfata.”
^ Hwɛ Nke. B14.
^ Anaa “no ho hia paa.”
^ Hwɛ Nke. A5.
^ Hwɛ Nke. A5.
^ Hwɛ Nkyerɛkyerɛmu Ɔfa hɔ.
^ Hwɛ Nke. A5.
^ Anaa “n’Ahenman; n’Aban.”
^ Hwɛ Nke. A5.
^ Anaa “beebi a ɔyɛ papa.”
^ Anaa “egyapadze.”
^ Anaa “wɔhyɛ da ara bɔ mpaa atsentsen mbrɛ ɔbɛyɛ a nkorɔfo bohu.”
^ Anaa “no mu yɛ dur.”
^ Greek, “lepta ebien. Lepta ebien yɛ kwadran kor.” Hwɛ Nke. B14.
