Mark Asɛmpa 13:1-37
13 Aber a orifi asɔrfie hɔ no, n’esuafo no mu kor kaa kyerɛɛ no dɛ: “Kyerɛkyerɛnyi, hwɛ! mbobaa na adan yi yɛ fɛw ae!”
2 Naaso Jesus kaa kyerɛɛ no dɛ: “Ehu dɛm adan akɛse yi nyina? Wobodwuruw ne nyina egu famu, na worinngya ɔbo kor mpo wɔ ɔbo fofor do.”
3 Na aber a ɔtsena Ngodua Bepɔw no do na n’enyi tua asɔrfie no, Peter, James, John na Andrew bisaa no wɔ nsumaa mu dɛ:
4 “Ka kyerɛ hɛn, ebɛn aber na iyinom besisi, na ebɛn asɛnkyerɛdze na ɔbɛma yeehu dɛ dɛm ndzɛmba yi nyina reba n’ewiei?”
5 Ntsi Jesus hyɛɛ ase kaa kyerɛɛ hɔn dɛ: “Hom nhwɛ yie na obiara aanndaadaa hom.
6 Nyimpa beberee dze me dzin bɛba abɛka dɛ, ‘Emi nye ɔno,’ na wɔbɛdaadaa dodowara.
7 Bio so sɛ hom tse akodzi nye ɔko ho amandzɛɛbɔ a, mma hom akoma nntu; osiandɛ otwar dɛ iyinom nyina sisi, naaso nna ɔno nnkyerɛ dɛ ewiei no aba.
8 “Na ɔman bɔsoɛr etsia ɔman, na ahendzi bɔsoɛr etsia ahendzi; na asaasewosow besisi wɔ mbeambea; afei so ɔkɔm bɛba. Iyinom yɛ awoo mu yaw* n’ahyɛse.
9 “Na hom dze, hom nda homho do. Nkorɔfo dze hom bɔkɔ atsɛmbuafo enyim, na emi ntsi wɔbɔhwe hom wɔ nhyiamudan mu na wɔdze hom eegyina ambradofo nye ahemfo enyim ama hom eedzi hɔn dase.
10 Afei so, ɔsɛ dɛ wodzi kan ka asɛmpa no wɔ amanaman nyina mu.
11 Na sɛ wɔdze hom rokɔ ekeyi hom ama a, mma hom nndwendwen dza hom bɛka ho; na mbom dza wɔdze bɛma hom dɛm aber no, ɔno ara na hom nka. Na nnyɛ homankasa na hom bɛkasa, na mbom sunsum krɔnkrɔn no na ɔbɛkasa.
12 Afei so, onua beyi onua ama dɛ wonku no, na papa eeyi ɔba ama, na mbofra bɔsoɛr etsia hɔn awofo na wɔaama woeku hɔn.
13 Na me dzin ntsi nyimpa nyina bɛtan hom. Naaso obi a obemia n’enyi* egyina mu ekodu ewiei no, ɔno na wɔbɛgye no nkwa.
14 “Naaso sɛ hom hu ekyiwadze a ɔsɛɛ ɔman no dɛ ogyina beebi a ɔnnsɛ dɛ ogyina a (ma obi a ɔrekenkan no mfa nhumu nyɛ edwuma), ɔno hɔn a wɔwɔ Judea no nhyɛ ase nguan nkɔ mbepɔw no do.
15 Na mma obi a ɔwɔ dan sor nnsian, na mma ɔnnkɔ ne fie no mu nnkɛfa biribiara.
16 Na mma obi a ɔwɔ haban mu no nnsan mmba ndzɛmba a oegya no wɔ ekyir no ho mmbɛfa n’atar ngugudo.
17 Dɛm aber no, mbaa a wonyinsen nye hɔn a wɔma mbofraba enumfo no ndue!
18 Hom nkɔ do mbɔ mpaa na woeennsi wɔ awɔwber mu;
19 osiandɛ dɛm aber no bɛyɛ ahohiahia ber. Na ofitsi aber a Nyankopɔn hyɛɛ ase bɔɔ ndzɛmba besi dɛm aber no bi mmbaa da na bi so remmba bio da.
20 Nokwasɛm nye dɛ, gyedɛ Jehovah* twa nda no do, annyɛ dɛm a ɔhonam biara nnyi hɔ a wɔbɛgye no nkwa. Naaso osian hɔn a oeyi hɔn no ntsi, oetwa nda no do.
21 “Na obiara a ɔbɛka akyerɛ hom dɛ, ‘Hwɛ! Christ no wɔ ha,’ anaa ‘Hwɛ! Ɔwɔ hɔ’ no, mma hom nngye nndzi.
22 Osiandɛ ator Christ nye ator nkɔnhyɛfo bɛba, na wɔbɛyɛ nsɛnkyerɛdze nye anwanwadze, na sɛ ɔbɛyɛ yie mpo a wɔdze adaadaa hɔn a woeyi hɔn no.
23 Hom dze, hom mma hom enyi nda hɔ. Osiandɛ medzi kan aka iyinom nyina akyerɛ hom.
24 “Na ahohiahia a ɔbɛba wɔ dɛm nda no n’ekyir no, ewia bɛdan sum, na bosoom rennhyerɛn.
25 Nworaba befi sor abɔhwehwe famu, na wɔbɔwosow etum a ɔwɔ sor no.
26 Na afei wobohu dɛ nyimpa Ba no nam mununkum mu dze tum nye enyimnyam kɛse reba.
27 Na afei ɔbɔsoma abɔfo no ma wɔaakɔboaboa hɔn a woeyi hɔn no ano efi mframa anan no mu, ofi asaase ano kesi ɔsor ano.
28 “Hom nsua biribi mfi adɔmbadua ho mfatoho yi mu: Sɛ no nkorbata fefɛw na oyi haban ara pɛ a, hom hu dɛ ɔhyewber abɛn.
29 Dɛmara na hom so, sɛ hom hu dɛ dɛm ndzɛmba yi risisi a, hom nhu dɛ ɔabɛn na ogyina abow no ano.
30 Nokwar mese hom dɛ dɛm ebusuasantsen yi runntwa mu nnkɔ da, gyedɛ iyinom nyina esisi ansaana.
31 Ɔsor na asaase botwa mu akɔ, naaso me nsɛm dze orunntwa mu nnkɔ dabiarada.
32 “Na da no anaa dɔn* no dze obiara nnyim, abɔfo a wɔwɔ sor nye Ɔba no mpo nnyim, gyedɛ Egya no.
33 Hom nkɔ do mma hom enyi nda hɔ, na hom nkɔ do nweɔn, osiandɛ hom nnyim ber a wɔahyɛ no.
34 Ɔtse dɛ ɔbarimba bi a orutu kwan akɔ ekyirekyir na ɔdze ne fie gyaa no nkowaa, na ɔmaa hɔn tum dɛ wɔnhwɛ fie no do. Ɔmaa hɔn mu biara edwuma na ɔkaa kyerɛɛ obi a ɔhwɛ abow no ano no dɛ ɔnkɔ do nweɔn.
35 Dɛm ntsi hom nkɔ do nweɔn, osiandɛ hom nnyim ber a ofiewura no bɛba, sɛ ɔyɛ ewimbir o, esuom o, ahanamakye* o, anaa anapatutuutu o,
36 amma ɔaammba awerɛfirmu ammbɔto hom dɛ hom adeda.
37 Na dza mereka akyerɛ hom yi, mereka akyerɛ nyimpa nyina: Hom nkɔ do nweɔn.”
Ase Hɔ Nsɛm
^ Ɔkyerɛ “yaw a ɔpemfo bi fa mu aber a ɔrobɔwo no.”
^ Anaa “oemia n’enyi.”
^ Hwɛ Nke. A5.
^ Anaa “ber.”
^ Greek, “akokɔbɔnee.”
