Mark Asɛmpa 14:1-72
-
Asɔfo no bɔɔ pɔw dɛ woboku Jesus (1, 2)
-
Ɔbaa bi huee ngohuam guu Jesus ne tsirmu (3-9)
-
Judas yii Jesus mae (10, 11)
-
Apaho afahyɛ a otwa tun (12-21)
-
Ɔdze Ewuradze Edzidzi no sii hɔ (22-26)
-
Jesus kaa dɛ Peter bɛka dɛ onnyim no (27-31)
-
Jesus kɔbɔɔ mpaa wɔ Getsemane (32-42)
-
Wɔkyeer Jesus (43-52)
-
Sanhedrin no dzii Jesus n’asɛm (53-65)
-
Peter kaa dɛ onnyim Jesus (66-72)
14 Nna wɔaka nda ebien ma Apaho na Paanoo A Ɔnnkawee* Afahyɛ no aso. Na asɔfompanyimfo no nye akyerɛwfo no hwehwɛɛ nyansakwan bi a wɔbɛfa do akyer no na woeeku no;
2 na wɔkaa dɛ: “Ɔnnsɛ dɛ ɔyɛ afahyɛ no ase, osiandɛ annhwɛ a amamfo no bɛyɛ begyabegya.”
3 Na aber a oridzidzi* wɔ Simon ɔkwatanyi no ne fie wɔ Betani no, ɔbaa bi a okitsa alabasta bɔdambɔ baa ne nkyɛn. Nna nard ngohuam papabi a no bo yɛ dzen paa wɔ bɔdambɔ no mu. Ɔbɔɔ alabasta bɔdambɔ no ano, na ɔhyɛɛ ase huei guu Jesus ne tsirmu.
4 Ɔbaa no dɛm no binom hɔn bo fuwii, na wɔkekaa kyerɛɛ hɔnho dɛ: “Ebɛnadze ntsi na ɔasɛɛ dɛm ngohuam yi?
5 Nkyɛ wobotum atɔn dɛm ngohuam yi ma wɔaabor denare* 300 na wɔdze sika no ama ehiafo!” Na hɔn bo fuuw ɔbaa no paa.*
6 Naaso Jesus kaa kyerɛɛ hɔn dɛ: “Hom ngyaa ɔbaa no. Ebɛnadze ntsi na hom pɛ dɛ hom tseetsee no? Dza ɔayɛ ama me yi yɛ adze pa.
7 Osiandɛ ehiafo dze wɔwɔ hom nkyɛn daa, na aber biara a hom pɛ dɛ hom yɛ hɔn papa no hom botum ayɛ, naaso emi dze, merenntsena hom nkyɛn daa.
8 Ɔayɛ dza obotum; oedzi kan ehue ngohuam egu mo do dze esiesie me nyimpadua ama da a wobesie me.
9 Nokwar mese hom dɛ, wiadze yi mu beebiara a wɔbɛka asɛmpa no, dza ɔbaa yi ayɛ yi so, wɔbɛka dze akaa no.”
10 Na Duebien no mu kor a wɔfrɛ no Judas Iskariot kɔr asɔfompanyimfo no nkyɛn, na ɔkaa kyerɛɛ hɔn dɛ ɔbɔboa hɔn ma wɔaakyer Jesus.
11 Aber a wɔtsee no, hɔn enyi gyee paa na wɔhyɛɛ no bɔ dɛ wɔbɛma no dwetɛ sika. Ntsi ɔhyɛɛ ase hwehwɛɛ kwan a ɔbɛfa do eyi no ama.
12 Na da a odzi kan a wodzi Paanoo A Ɔnnkawee* Afahyɛ no, aber a nna wɔtaa dze Apaho abowa no bɔ afɔr no, n’esuafo no bebisaa no dɛ: “Henfa na epɛ dɛ yekesiesie ma ikedzi Apaho no?”
13 Ntsi ɔsomaa n’esuafo no mu beenu na ɔkaa kyerɛɛ hɔn dɛ: “Hom nkɔ kurow no mu, na ɔbarimba bi a ɔso nsuhina behyia hom. Hom ndzi n’ekyir,
14 na fie biara a obowura mu no, hom nka nkyerɛ fiewura no dɛ, ‘Kyerɛkyerɛnyi no se: “Ahɔhodan a menye m’esuafo no bedzi Apaho no wɔ mu no wɔ hen?”’
15 Na ɔbɛkyerɛ hom abansor dan kɛse bi a woesiesie mu kama. Hom nyɛ Apaho no ho ntotoe wɔ hɔ mma hɛn.”
16 Ntsi esuafo no sii mu kɔr kurow no mu, na wokohun dza ɔkaa kyerɛɛ hɔn no pɛpɛɛpɛ, na wɔtotoo ndzɛmba yie maa Apaho no.
17 Odur ewimbir no, ɔnye Duebien no bae.
18 Na aber a wɔtsena pon ho ridzidzi no, Jesus kaa dɛ: “Nokwar mese hom dɛ, hom a hom nye me ridzidzi yi, hom mu kor beyi me ama.”
19 Na hɔn werɛ hyɛɛ ase howee, na wobisabisaa no nkorkor dɛ: “Ɔyɛ emi anaa?”
20 Ɔkaa kyerɛɛ hɔn dɛ: “Ɔyɛ Duebien no mu kor, obi a ɔnye me to nsa dzidzi wɔ kyɛnse kor mu no.
21 Na nyimpa Ba no rokɔ, dɛ mbrɛ wɔakyerɛw afa no ho no, naaso obi a wɔnam no do beyi nyimpa Ba no ama no dze, ondue! Sɛ wɔannwo no mpo a nkyɛ oye.”
22 Na aber a wogu do ridzidzi no, ɔfaa paanoo na ohyiraa do, na obubuu mu dze maa hɔn, na ɔkaa dɛ: “Hom ngye; iyi gyina hɔ ma me nyimpadua.”
23 Afei ɔfaa kɔɔpow a nsa wɔ mu no, na ɔdaa ase na ɔdze maa hɔn, na hɔn nyina noom bi.
24 Na ɔkaa kyerɛɛ hɔn dɛ: “Nsa yi gyina hɔ ma mo ‘bɔgyaa a wɔdze reyɛ apam’ no, ɔno na wobohue egu ama nyimpa pii.
25 Nokwar mese hom dɛ, moronnom nsa* yi bio dze ekesi da a mobɔnom nsa fofor wɔ Nyankopɔn n’Ahendzi* no mu.”
26 Afei aber a wɔtoow ayɛyindwom wiei no, wopuei kɔr Ngodua Bepɔw no do.
27 Na Jesus kaa kyerɛɛ hɔn dɛ: “Asɛm a obesi no bɔto hom nyina fintsidua, osiandɛ wɔakyerɛw dɛ: ‘Mobɔbɔ oguanhwɛfo no, na nguan no bɔbɔ apetse.’
28 Naaso sɛ wonyan me fi ewufo mu a, mibedzi hom enyim kan akɔ Galilee.”
29 Naaso Peter kaa kyerɛɛ no dɛ: “Sɛ ɔto hɔn nyina fintsidua mpo a, emi dze ɔronnto me fintsidua.”
30 Ɔkaa dɛm no Jesus kaa kyerɛɛ no dɛ: “Nokwar mese wo dɛ ndɛ, nyew ndɛ anafua yi ara, ansaana akokɔ bɔbɔn mpɛn ebien no, nna aka no mpɛn ebiasa dɛ innyim me.”
31 Naaso nna ka ara na Peter reka dɛ: “Sɛ ɔsɛ dɛ menye wo wu mpo a, merennka dɛ minnyim wo da.” Na dɛmara na hɔn a wɔaka no nyina so kae.
32 Afei, wɔbaa beebi a wɔfrɛ hɔ Getsemane, na ɔkaa kyerɛɛ n’esuafo no dɛ: “Hom ntsena ha na morokɔbɔ mpaa.”
33 Na ɔfaa Peter, James na John kaa noho kɔree, na ɔyɛɛ hahaaha na noho yerɛɛw no papaapa.
34 Na ɔkaa kyerɛɛ hɔn dɛ: “Awerɛhow ahyɛ mo do* araa rokɔ owu mu. Hom ntsena ha na hom nkɔ do nweɔn.”
35 Na ɔkɔr n’enyim kakra, na obutuuw famu na ɔhyɛɛ ase bɔɔ mpaa dɛ sɛ ɔbɛyɛ yie a, nkyɛ dɛm ɔhaw* no mpa no ho nkɔ.
36 Na ɔkaa dɛ: “Abba,* Egya, itum adze nyina yɛ; yi dɛm kɔɔpow yi fi mo do. Naaso, nnyɛ dɛ mbrɛ mepɛ, mbom dɛ mbrɛ ɔwo epɛ.”
37 Na ɔsanee bae bɔtoo hɔn dɛ wɔadeda, na ɔkaa kyerɛɛ Peter dɛ: “Simon, ereda? Ntsi ennya ahoɔdzen ammfa annweɔn dɔnhwer kor mpo?
38 Hom nkɔ do nweɔn na hom mbɔ mpaa daa, amma hom aannkɔ nsɔhwɛ mu. Ampa sunsum no dze ɔpɛ, naaso honam no yɛ mberɛw.”
39 Na ɔsanee kɔr bio kɔbɔɔ mpaa, na ɔkaa asɛm kor no ara.
40 Na ɔsanee baa bio bɔtoo hɔn dɛ wɔadeda, osiandɛ nna hɔn enyiwa akom paa, ntsi nna wonnhu asɛm mpo a wɔnka nkyerɛ no.
41 Na ɔsanee baa hɔn nkyɛn ne mpɛn ebiasa do, na ɔkaa kyerɛɛ hɔn dɛ: “Mber a ɔtse dɛm mu na hom ada regye hom ahom yi? Wɔayɛ yie! Ber no aso! Hwɛ, woriyi nyimpa Ba no ahyɛ ndzebɔnyɛfo nsa.
42 Hom nsoɛr ma yɛnkɔ. Hwɛ! Obi a obeyi me ama no edu hɛn nkyɛn ha yi ara.”
43 Na ogu do rekasa no ara na Duebien no mu kor a wɔfrɛ no Judas no bae, na nyimpadɔm a wokitsakitsa sekan na mpɔtsibaa ka no ho. Asɔfompanyimfo no na akyerɛwfo no nye ɔman no mu mpanyimfo no na wɔsomaa hɔn.
44 Nna obi a obeyi no ama no ama hɔn asɛnkyerɛdze bi dɛ: “Obi a mibefew n’ano no, ɔyɛ ɔno; hom nkyer no, na hom nhwɛ no do yie mfa no nkɔ.”
45 Na ɔkɔr Jesus ne nkyɛn tsenn na ɔkaa dɛ, “Rabbi!” na ofeew n’ano.
46 Nna wɔbɛkyeer no dɛ wɔdze no rokɔ.
47 Na hɔn a wogyinagyina hɔ no mu kor twee ne sekan na otwaa ɔsɔfopanyin no n’akowaa n’asowa fii hɔ.
48 Na Jesus kaa kyerɛɛ hɔn dɛ: “Meyɛ ewi* na hom dze sekan na mpɔtsibaa aba mo do rebɛkyer me yi a?
49 Da biara nna menye hom wɔ asɔrfie hɔ a mekyerɛkyerɛ, eso hom annkyer me. Naaso mbrɛ ɔbɛyɛ a Kyerɛwnsɛm no bɛba mu ntsi na iyinom risisi.”
50 Na hɔn nyina guanee gyaa no hɔ.
51 Naaso aberantsɛ bi a nna ofura tam* pa dze akata n’adagyaw do hyɛɛ ase dzii n’ekyir, na wɔyɛɛ dɛ wɔrekyer no,
52 naaso ogyaa ne tam no hɔ, na ɔdze n’adagyaw* guanee.
53 Afei wɔdze Jesus kɔr ɔsɔfopanyin no n’enyim, na asɔfompanyimfo no nye ɔman no mu mpanyimfo no nye akyerɛwfo no nyina behyiaa mu wɔ hɔ.
54 Naaso Peter dzii n’ekyir wɔ ekyirekyir, na ɔbaa araa bodur ɔsɔfopanyin no ne yaad no mu;* na ɔkɛtsenaa asomfo a wɔwɔ fie hɔ no hɔn nkyɛn dɛ ɔroto gya.
55 Nna asɔfompanyimfo no nye Sanhedrin no nyina rohwehwɛ dase etsia Jesus ama woeegyina do eku no, naaso nna wonnya bi.
56 Nokwasɛm nye dɛ nyimpa pii dzii dase a ɔnnyɛ nokwar tsiaa no, naaso nna hɔn dasee no nnhyia.
57 Binom so soɛree gyinae, na wodzii dase a ɔnnyɛ nokwar tsiaa no. Wɔkaa dɛ:
58 “Yɛtsee dɛ ɔreka dɛ, ‘Mubobubu asɔrfie a wɔdze nsa sii no, na medze nda ebiasa esi fofor a wɔammfa nsa ennsi.’”
59 Naaso dɛm dase yi a wodzii yi so mpo, nna ɔno so nnsisi enyim.
60 Nna ɔsɔfopanyin no soɛree gyinaa hɔn finimfin, na obisaa Jesus dɛ: “Dza wɔreka yi, eka ho dɛn? Dza mbarimba yi reka tsia wo yi, ɔyɛ nokwar a?”
61 Naaso ɔyɛɛ dzinn na oennyi no ano. Na ɔsɔfopanyin no sanee bisaa no bio dɛ: “Ɔwo nye Christ no, Nyia Oehyira No no ne Ba no anaa?”
62 Nna Jesus kaa dɛ: “Ɔyɛ mara; na hom bohu nyimpa Ba no dɛ ɔtsena Otumfo no ne nsa nyimfa na ɔnam ɔsor mununkum mu reba.”
63 Ɔkaa dɛm no, ɔsɔfopanyin no tseew n’atar mu na ɔkaa dɛ: “Ebɛn adasefo bio na yehia?
64 Hom atse ebususɛm no. Hom dwen ho dɛn?”* Na hɔn nyina buu no fɔ dɛ ɔsɛ dɛ woku no.
65 Na binom hyɛɛ ase totoo ntafi guu no do, na wɔkataa n’enyim, na wɔbobɔɔ no ekutuku, na wɔkaa kyerɛɛ no dɛ: “Sɛ eyɛ nkɔnhyɛnyi ampa a, kyerɛ hɛn obi a ɔbɔɔ wo no!” Na asomfo a wɔwɔ asɛndzibea hɔ no so bobɔɔ no asotɔr, na wɔdze no kɔree.
66 Na aber a Peter wɔ ase hɔ wɔ yaad no mu no, ɔsɔfopanyin no ne mbaawa no mu kor bae.
67 Na aber a ohun dɛ Peter roto gya no, ɔhwɛɛ n’enyim dzinn na ɔkaa kyerɛɛ no dɛ: “Nkyɛ nna woara so ka Nazaretnyi Jesus no ho!”
68 Naaso ɔanngye annto mu. Ɔkaa dɛ: “Minnyim no, asɛm a ereka yi mpo menntse ase,” na okegyinaa yaad no n’abow no ano hɔ.
69 Aber a okegyinaa hɔ no so abaawa no hun no, na ɔhyɛɛ ase kaa kyerɛɛ hɔn a wogyinagyina hɔ no bio dɛ: “Oyi ka hɔn ho.”
70 Dɛm aber yi so ɔanngye annto mu. Na ɔyɛɛ kakra no, hɔn a wogyinagyina hɔ no so hyɛɛ ase kaa kyerɛɛ Peter bio dɛ: “Biribiara kyerɛ dɛ eka hɔn ho. Nokwasɛm nye dɛ, eyɛ Galileenyi.”
71 Naaso Peter hyɛɛ ase kaa ntam dzii nsew dɛ: “Minnyim nyimpa a hom reka no ho asɛm yi!”
72 Amonmu hɔ ara na akokɔ bɔɔn ne mpɛn ebien, na Peter kaa asɛm a Jesus kaa kyerɛɛ no no dɛ: “Ansaana akokɔ bɔbɔn mpɛn ebien no, nna aka no mpɛn ebiasa dɛ innyim me.” Na no werɛ howee na otuu su.
Ase Hɔ Nsɛm
^ Anaa “Paanoo A Nkaweedur Nnyi Mu.”
^ Anaa “ɔtsena pon ho ridzidzi.”
^ Hwɛ Nke. B14.
^ Anaa “wɔdze ebufuw kasaa kyerɛɛ no; wotwuuw n’enyim.”
^ Anaa “Paanoo A Nkaweedur Nnyi Mu.”
^ Anaa “wenyin.”
^ Anaa “n’Ahenman; n’Aban.”
^ Anaa “me kra do.”
^ Greek, dɔn.
^ Ɔyɛ Aramaic kasafua bi a n’asekyerɛ nye “O Egya!”
^ Anaa “epoobɔnyi.”
^ Anaa “ndwera.”
^ Kyerɛ dɛ, dza ɔhyɛ no wɔ ase no, ɔno ara nye no, ɔnnhyɛ atar biara nngu do.
^ Anaa “abangua no do.”
^ Anaa “Ebɛn gyinae na hom besi?”
