Mark Asɛmpa 15:1-47
15 Na ahanamakye no ara na asɔfompanyimfo no nye ɔman no mu mpanyimfo no nye akyerɛwfo no, kyerɛ dɛ, Sanhedrin no nyina kaa hɔn tsir paam ho na wɔkyekyeer Jesus ne nsa na wɔdze no kɛmaa Pilate.
2 Nna Pilate bisaa no dɛ: “Ɔwo nye Jewfo hɔn Hen no anaa?” Oyii no ano dɛ: “Woara aka.”
3 Nna asɔfompanyimfo no robɔ no sombo ahorow pii.
4 Afei Pilate hyɛɛ ase dɛ oribisabisa no nsɛm bio. Obisaa no dɛ: “Innyi anoyi biara? Hwɛ nsɛm pii a wɔreka to wo do.”
5 Naaso Jesus amma no mbuae biara, na iyi yɛɛ Pilate nwanwa.
6 Sɛ odu Apaho afahyɛ biara a, nna ɔtaa gyaa hɔn a wɔda efiadze no mu kor ma hɔn. Nna hɔn na wɔkyerɛ obi a wɔpɛ dɛ ogyaa no ma hɔn.
7 Dɛm aber no, nna ɔbarimba bi wɔ hɔ a wɔfrɛ no Barabbas. Nna ɔnye nyimpa binom asoɛr etsia aban no, na hɔn etuatsew no mu no wokunkum nyimpa. Ntsi wɔdze hɔn kɔtoo efiadze.
8 Na nyimpadɔm no bae bɛserɛɛ Pilate dɛ ɔnyɛ dza ɔtaa yɛ ma hɔn no.
9 Nna Pilate bisaa hɔn dɛ: “Hom pɛ dɛ migyaa Jewfo hɔn Hen no ma hom anaa?”
10 Nna onyim dɛ ɔtan hun ntsi na asɔfompanyimfo no dze no aba n’enyim no.
11 Naaso asɔfompanyimfo no tutui guu nyimpadɔm no asowa mu dɛ wɔmma ongyaa Barabbas mbom.
12 Nna Pilate sanee bisaa hɔn dɛ: “Na nyia hom frɛ no Jewfo hɔn Hen no ɛ, ɔno menyɛ no dɛn?
13 Na wɔsanee tseatseaa mu bio dɛ: “Bɔ no asɛndua mu!”
14 Naaso Pilate sanee bisaa hɔn bio dɛ: “Ebɛnadze ntsi a? Ebɛn bɔn paa na ɔayɛ?” Naaso nna tsea ara na wɔretseatsea mu dzendzenndzen dɛ: “Bɔ no asɛndua mu!”
15 Na osiandɛ nna Pilate pɛ dɛ ɔyɛ dza nyimpadɔm no pɛ ma hɔn ntsi, ogyaa Barabbas maa hɔn; na ɔmaa wɔhwee Jesus, na afei ɔdze no maa hɔn dɛ wɔnkɔbɔ no asɛndua mu.
16 Na asogyafo no dze no kɔr yaad* a ɔwɔ ambrado no ne fie hɔ no mu, na wɔfrɛfrɛɛ asogyafo no nyina ma wobehyiae.
17 Na wɔhyɛɛ no atar bi a ɔyɛ ɔberdum, na wɔdze nsoɛ ween ahenkyɛw hyɛɛ no.
18 Na wɔhyɛɛ ase kyiaa no dɛ: “Jewfo hɔn Hen, Asomdwee nka wo o!”
19 Afei so wɔdze ndzɛmbir* hwehwee ne tsirmu na wɔtotoo ntafi guu no do, na wobuu ntwɛr bɔɔ hɔn mu adze wɔ n’enyim.
20 Ekyir yi aber a wodzii no ho fɛw wiei no, woyii ɔberdum atar a wɔdze hyɛɛ no no, na wɔdze n’atar ngugudo no hyɛɛ no, na wɔdze no puee dɛ wɔrokɔbɔ no asɛndua mu.
21 Nna ɔbarimba bi a wɔfrɛ no Simon a ofi Sirene, Alexander na Rufus hɔn papa no rutwa mu. Nna ofi ekuraase reba kurow no mu, na wɔhyɛɛ no dɛ ɔnsoa Jesus n’asɛndua* no.
22 Ntsi wɔdze no baa beebi a wɔfrɛ hɔ Golgotha, n’asekyerɛ nye “Tsidwerba.”
23 Na ha na wɔyɛɛ dɛ wɔbɛma no nsa a wɔdze mɛɛr* afora mu, naaso ɔannom.
24 Na wɔbɔɔ no asɛndua mu, na wɔtwee tonto dze kyɛɛ n’atar ngugudo no, mbrɛ ɔbɛyɛ a wobohu dza obiara bɛfa.
25 Dɛm aber yi, nna ɔyɛ dɔn a otsia ebiasa,* na dɛm aber yi na wɔbɔɔ no asɛndua mu.
26 Wɔkyerɛɛw sombo a wɔdze bɔɔ no no dɛ: “Jewfo hɔn Hen.”
27 Bio so wɔbɔɔ epoobɔfo beenu bi asɛndua mu kaa no ho, nna kor wɔ ne nsa nyimfa, na kor so wɔ ne nsa bankum.
28 * ——
29 Na hɔn a worutwa mu wɔ hɔ no kasae tsiaa no, na wɔwosowosoow hɔn tsir, na wɔkaa dɛ: “Ewuo! Ɔnnyɛ ɔwo na ekaa dɛ ibodwuruw asɔrfie no egu na edze nda ebiasa esi yi bi a?
30 Gye woho fi asɛndua* no do si famu ɛ.”
31 Asɔfompanyimfo no nye akyerɛwfo no so dzii no ho fɛw dɛmara. Wɔkaa dɛ: “Ɔgyee nkorɔfo, naaso nankasa dze onntum nngye noho!
32 Sɛ ɔno nye Christ, Israelhen no a, ma onsian mfi asɛndua* no do, na sɛ yehu a yɛbɛgye no edzi.” Na epoobɔfo a wɔbɔɔ hɔn asɛndua mu kaa no ho no so mpo hyehyɛɛ no ahorba.
33 Na odur dɔn a otsia esia* no, sum baa asaase no nyina do kesii dɔn a otsia akron* no.
34 Na dɔn a otsia akron no, Jesus dze ndze kɛse tseaa mu dɛ: “Eli, Eli, lama sabachthani?” N’asekyerɛ nye dɛ, “Me Nyankopɔn, me Nyankopɔn, ebɛnadze ntsi na apow me yi?”
35 Na aber a hɔn a wogyinagyina hɔ no mu binom tsee dza ɔkae no, wɔhyɛɛ ase kaa dɛ: “Hwɛ, ɔrefrɛ Elijah.”
36 Afei obi tuu mbirika kɛfaa sapɔw dze bɔɔ nsa a wɔakaw mu, na ɔdze sɛɛn ndzɛmbir do brɛɛ no dɛ ɔnnom, na ɔkaa dɛ: “Hom ngyaa no! Hom mma yɛnhwɛ dɛ Elijah bɛba ebesian no efi dua no do a.”
37 Na Jesus dze ndze kɛse tseaa mu, na owui.*
38 Na ntwamutam a ɔwɔ asɔrdan no mu hɔ no mu tseew ebien, ofi sor kesi ase.
39 Dɛm aber no, nna sogyanyi panyin bi gyina hɔ a n’enyi tua Jesus, na aber a ohun dza osisii na afei ohun dɛ Jesus ewu no, ɔkaa dɛ: “Nyimpa yi yɛ Nyankopɔn ne Ba ampa.”
40 Afei so, nna mbaa bi so gyinagyina ekyir a wɔrohwɛ dza ɔrokɔ do no. Hɔn mu bi nye Mary Magdalene, Salome, nye James Kakraba no na Joses hɔn maame Mary.
41 Hɔn na wodzii n’ekyir na wɔsoom no aber a nna ɔwɔ Galilee no. Afei so mbaa afofor pii a wɔnye no fowee baa Jerusalem no, nna hɔn so wɔ hɔ bi.
42 Nna dɛm da no yɛ Ahosiesieda, kyerɛ dɛ da a odzi hɔ no yɛ Ahomgyeda, na osian iyi ntsi ɔdze rokɔ ewimbir no,
43 Josef a ofi Arimatea no baa hɔ. Nna ɔyɛ Bagua* no munyi a nkorɔfo bu no paa, na nna ɔno so rotweɔn Nyankopɔn n’Ahendzi* no. Onyaa akokodur kɔr Pilate n’enyim, na ɔkɛserɛɛ Jesus no fun no.
44 Naaso nna Pilate nntum nnhu sɛ Jesus ewu o, ntsi ɔfrɛɛ sogyanyi panyin no na obisaa no dɛ Jesus ewu anaa.
45 Na aber a Pilate tsee fii sogyanyi panyin no hɔ dɛ oewu no, ɔdze fun no maa Josef.
46 Afei Josef kɔtɔɔ tam* pa bi, na oyii fun no fii dua no do, na ɔdze tam pa no kyekyeer fun no ho, na ɔdze no kɔtoo nda* bi a woetwa no wɔ ɔbotan bi mu no mu, na opiaa ɔbo bi dze kataa nda no ano.
47 Naaso Mary Magdalene nye Joses ne maame Mary kɔr do hwɛɛ beebi a wɔdze no toe no.
Ase Hɔ Nsɛm
^ Anaa “abangua.”
^ Efuw bi a ɔtse dɛ mfea anaa ahwer.
^ Hwɛ Nkyerɛkyerɛmu Ɔfa hɔ.
^ Hwɛ Nkyerɛkyerɛmu Ɔfa hɔ.
^ Kyerɛ dɛ, bɛyɛ anapa 9:00.
^ Hwɛ Nke. A3.
^ Hwɛ Nkyerɛkyerɛmu Ɔfa hɔ.
^ Hwɛ Nkyerɛkyerɛmu Ɔfa hɔ.
^ Kyerɛ dɛ, bɛyɛ ewiaber 12:00.
^ Kyerɛ dɛ, bɛyɛ ewiaber 3:00.
^ Anaa “oguu n’ahom a otwa tun.”
^ Anaa “Sanhedrin.”
^ Anaa “n’Ahenman; n’Aban.”
^ Anaa “ndwera.”
^ Anaa “nkaa nda.”
