Mark Asɛmpa 16:1-8
-
Wonyaan Jesus (1-8)
16 Ntsi aber a Ahomgyeda no baa n’ewiei no, Mary Magdalene, James ne maame Mary, nye Salome kɔtɔɔ nduhuam baa dɛ wɔdze rebɛserasera Jesus no fun no ho.
2 Na da a odzi kan wɔ dapɛn no mu no, wɔkɔr nda* no do anapatutuutu aber a ewia epue no.
3 Asɛm a nna woribisa hɔnho nye dɛ: “Woana mpo na obepia ɔbo no efi nda no ano ama hɛn?”
4 Ɔwɔ mu dɛ nna ɔbo no yɛ kɛse paa dze, naaso aber a wɔmaa hɔn enyi do no, wohun dɛ woepia efi hɔ dada.
5 Na aber a wɔkɔr nda no mu no, wohun aberantsɛ bi a ɔhyɛ atar tsentsen fitaa dɛ ɔtsena enyimfa wɔ nda no mu, na hɔn akoma tui.
6 Na ɔkaa kyerɛɛ hɔn dɛ: “Mma hom akoma nntu. Hom rohwehwɛ Nazaretnyi Jesus a wɔbɔɔ no asɛndua mu kum no no. Woenyan no. Onnyi ha. Hom nhwɛ, ha na wɔdze no bɔtoe.
7 Dɛm ntsi hom nkɔ nkɛka nkyerɛ n’esuafo no nye Peter dɛ, ‘Oedzi hom enyim kan rokɔ Galilee. Hom bohu no wɔ hɔ dɛ mbrɛ ɔkaa kyerɛɛ hom no.’”
8 Ntsi aber a wopuei no, wɔdze mbirika guanee fii nda no do. Nna hɔnho popo, na awɔse guu hɔn. Na wɔannka hwee annkyerɛ obiara, osiandɛ nna wɔabɔ hu.*
Ase Hɔ Nsɛm
^ Anaa “nkaa nda.”
^ Nsaano nkyerɛwee ahorow bi a wɔakyɛr paa na wɔagye ato mu ma yehu dɛ Mark Asɛmpa no pem tsir 16 nyiyimu 8. Hwɛ Nke. A3.
