Mark Asɛmpa 2:1-28
2 Naaso nda bi ekyir no ɔsanee kɔr Kapernaum, na nkorɔfo tsee dɛ ɔwɔ fie.
2 Ntsi nyimpa pii baa fie hɔ, na wɔbɔe pee do wɔ hɔ araa ma nna kwan mpo nnda abow no ano, na ɔhyɛɛ ase kyerɛkyerɛɛ hɔn.
3 Na mbarimba baanan bi dze ɔbarimba bi a oebubu brɛɛ no.
4 Naaso osian nyimpadɔm no ntsi, nna wonntum mmfa no mmba Jesus ne nkyɛn. Ntsi beebi a nna Jesus tsena wɔ dan no mu no, wɔpaa n’etsifi, na wɔbɔɔ tokur wɔ hɔ. Afei wogyaagyaa kɛtɛ a ɔbarimba a oebubu no da do no mu kɔr famu.
5 Na aber a Jesus hun hɔn gyedzi no, ɔkaa kyerɛɛ ɔyarfo no dɛ: “Ɔba, wɔdze wo bɔn akyɛ wo.”
6 Dɛm aber no, nna akyerɛwfo no mu binom tsenatsena hɔ, na nna worususu ho wɔ hɔn akoma mu dɛ:
7 “Asɛm a ɔbarimba yi reka yi n’enyi hwɛ hen? Ɔreka ebususɛm. Sɛ yeyi Nyankopɔn fi hɔ a, woana bio na obotum dze bɔn akyɛ?”
8 Na ntsɛmara na Jesus hun* adwen a wɔrodwen. Ntsi obisaa hɔn dɛ: “Ebɛnadze ntsi na hom rususu dɛm ndzɛmba yi ho wɔ hom akoma mu?
9 Dza ɔwɔ hen na ne ka yɛ mberɛw, dɛ wɔbɛka akyerɛ ɔyarfo yi dɛ, ‘Wɔdze wo bɔn akyɛ wo,’ anaa wɔbɛka akyerɛ no dɛ, ‘Soɛr fa wo kɛtɛ na nantsew’?
10 Naaso mbrɛ ɔbɛyɛ a hom bohu dɛ nyimpa Ba no wɔ tum dɛ ɔdze bɔn kyɛ wɔ asaase do ntsi—” ɔkaa kyerɛɛ ɔyarfo no dɛ:
11 “Mese wo dɛ, Soɛr, fa wo kɛtɛ, na kɔ wo fie.”
12 Na ɔsoɛree, na ntsɛmara ɔfaa ne kɛtɛ no, na ɔnantsewee faa hɔn nyina hɔn enyim kɔree. Iyi maa hɔn nyina hɔnho dwuruuw hɔn na wɔhyɛɛ Nyankopɔn enyimnyam. Wɔkaa dɛ: “Yennhun biribi a ɔtse dɛm da.”
13 Bio so opuei kɔr mpoano, na nyimpadɔm pii baa ne nkyɛn, na ɔhyɛɛ ase kyerɛkyerɛɛ hɔn.
14 Na aber a orutwa mu no, ohun Alfios ne ba Levi dɛ ɔtsena beebi a wɔgyegye tow no, na ɔkaa kyerɛɛ no dɛ: “Bedzi m’ekyir.” Ɔkaa dɛm ara pɛ na ɔsoɛree dzii n’ekyir.
15 Ekyir yi nna Jesus ridzidzi* wɔ Levi ne fie. Dɛm aber no nna hɔn a wɔgyegye tow nye ndzebɔnyɛfo pii ka Jesus nye n’esuafo no ho ma woridzidzi,* osiandɛ nna hɔn mu pii dzi n’ekyir.
16 Naaso aber a akyerɛwfo a wɔyɛ Farisiifo no hun dɛ ɔnye ndzebɔnyɛfo na hɔn a wɔgyegye tow ridzidzi no, wobisaa n’esuafo no dɛ: “Ntsi ɔnye hɔn a wɔgyegye tow nye ndzebɔnyɛfo dzidzi a?”
17 Aber a Jesus tsee no, ɔkaa kyerɛɛ hɔn dɛ: “Hɔn a wɔwɔ ahoɔdzen no, wonnhia ɔyarsafo, mbom hɔn a wɔyar no na wohia. Mammbɛfrɛ atseneneefo, na mbom mebɛfrɛɛ ndzebɔnyɛfo.”
18 Dɛm aber no, nna John n’esuafo no nye Farisiifo no taa yɛ akɔnkyen. Ntsi wɔbaa no hɔ bebisaa no dɛ: “Ebɛnadze ntsi na John n’esuafo no nye Farisiifo no hɔn esuafo no taa yɛ akɔnkyen, naaso w’esuafo no dze wɔnnyɛ akɔnkyen?”
19 Nna Jesus kaa kyerɛɛ hɔn dɛ: “Aber a ayeforkun no wɔ n’anyɛnkofo nkyɛn no, nkyɛ onnhia dɛ wɔyɛ akɔnkyen, anaa? Ber tsentsen a ayeforkun no wɔ hɔn nkyɛn no, worunntum nnyɛ akɔnkyen.
20 Naaso nda bi bɛba a wɔbɛfa ayeforkun no efi hɔn nkyɛn, na dɛm aber no na wɔbɛyɛ akɔnkyen.
21 Obiara nnyi hɔ a ɔdze tam fofor taa atar dadaw mu. Sɛ ɔyɛ dɛm a, tam fofor no bɛtsew efi atar dadaw no mu, na ekyir yi mpo dze beebi a ɔtsewee no bɛtsew kɛse.
22 Dɛmara so na obiara mmfa nsa fofor nngu nsa kotoku dadaw mu. Osiandɛ sɛ ɔyɛ dɛm a, nsa no bɛpaa kotoku no, ma nsa no eegu famu na kotoku no so aasɛɛ. Mbom wɔdze nsa fofor gu nsa kotoku fofor mu.”
23 Afei ɔkɛfaa haban bi mu wɔ Ahomgyeda, na wɔrokɔ no nyina nna n’esuafo no retsetsew nduadzewa* no bi.
24 Ntsi Farisiifo no bisaa no dɛ: “Hwɛ! Ebɛnadze ntsi na wɔreyɛ dza mbra mma kwan dɛ wɔyɛ no Ahomgyeda yi?”
25 Nna ɔkaa kyerɛɛ hɔn dɛ: “Dza David yɛe aber a n’edziban sae na ɔkɔm dzee ɔno na mbarimba a nna wɔka no ho no, hom nnkenkaan no da?
26 Kyerɛwtohɔ no ma yehu dɛ, aber a Abiata yɛ sɔfopanyin no, David kɔr Nyankopɔn ne fie hɔ kedzii paanoo a wɔdze ba Nyankopɔn n’enyim no.* Na ɔdze bi maa mbarimba a nna wɔka no ho no. Nna mbra mma kwan dɛ obiara bedzi dɛm paanoo no gyedɛ asɔfo no nkotsee. Ntsi dɛm asɛm yi hom nnkenkanee a?”
27 Afei ɔkaa kyerɛɛ hɔn dɛ: “Nyimpa ntsi na Ahomgyeda wɔ hɔ, na ɔnnyɛ Ahomgyeda ntsi na nyimpa wɔ hɔ.
28 Mereka akyerɛ hom dɛ Ahomgyeda no mpo, no Wura nye nyimpa Ba no.”
Ase Hɔ Nsɛm
^ Greek, “hunii wɔ no sunsum mu.”
^ Anaa “Jesus tsena pon ho ridzidzi.”
^ Anaa “ma wɔtsena pon ho ridzidzi.”
^ Iyi yɛ eduadzewa bi a nna wodua wɔ tsetse Israel. Nna wotum dze yɛ paanoo.
^ Anaa “paanoo a wɔdze kyerɛ no.”
