Mark Asɛmpa 3:1-35
3 Da bi so, Jesus kɔr nhyiamudan bi mu, na nna ɔbarimba bi wɔ hɔ a ne nsa adwedwe.*
2 Ntsi nna Farisiifo no rohwɛ no dzinn dɛ ɔbɛsa ɔbarimba no yarba wɔ Ahomgyeda no a, ama wɔaabɔ no sombo.
3 Na ɔkaa kyerɛɛ ɔbarimba a ne nsa adwedwe* no dɛ: “Soɛr begyina finimfin ha.”
4 Nna obisaa hɔn dɛ: “Mbra ma kwan dɛ Ahomgyeda wɔbɛyɛ adze pa anaa adze bɔn? Anaadɛ wɔbɛgye obi nkwa* anaa woboku obi?” Naaso hɔn nyina yɛɛ dzinn.
5 Ntsi ɔdze ebufuw hwɛɛ hɔn nyina hɔn enyim, na osian hɔn akomadzen no ntsi, no werɛ hoow paa. Nna ɔkaa kyerɛɛ ɔbarimba no dɛ: “Tsen wo nsa.” Na ɔtsenee, na ne nsa no yɛɛ yie.
6 Ntsi Farisiifo no puei, na ntsɛmara wɔnye Herod n’ekyirdzifo no kɔbɔɔ no ho pɔw, mbrɛ ɔbɛyɛ a woboku no.
7 Naaso Jesus nye n’esuafo no fii hɔ kɔr mpoano, na nyimpadɔm pii a wofi Galilee na Judea dzii n’ekyir.
8 Nyimpadɔm bi mpo fi Jerusalem, Idumea, Jordan Esutsen no n’ekyir nye nkurow a woetwa Taya na Sidon ho ehyia no baa ne nkyɛn, osiandɛ wɔtsee ndzɛmba akɛse a nna ɔreyɛ no ho asɛm.
9 Na ɔkaa kyerɛɛ n’esuafo no dɛ wɔnhwehwɛ hɛmba kakraba bi mma no amma nyimpadɔm no aannkyer no do.
10 Osiandɛ ɔsaa nyimpa pii yarba ntsi, hɔn a wɔwɔ nyarba ahorow a no mu yɛ dzen nyina so bofum no ho, na nna obiara pɛ dɛ ɔdze ne nsa ka no.
11 Aber biara a nna esunsum fi mpo bohu no no, nna wɔhwehwe ase wɔ n’enyim, na wɔtseatsea mu ka dɛ: “Ɔwo nye Nyankopɔn ne Ba no.”
12 Naaso ɔbɔɔ hɔn ano mpɛn pii dɛ mma wɔmma nkorɔfo nnhu nyimpa kor a ɔyɛ.
13 Afei ɔfowee kɔr bepɔw bi do na ɔfrɛɛ hɔn a ɔpɛ no, na wɔbaa ne nkyɛn.
14 Na oyii hɔn mu 12 yɛɛ hɔn kuw kor na ɔfrɛɛ hɔn asomafo. Nna woyinom na wɔbɛka no ho na ɔaasoma hɔn ma wɔaakɛka asɛm no,
15 na woeenya tum a wɔdze botu esunsum fi.
16 Na 12 a oyii hɔn dɛ kuw no nye: Simon a ɔsanee frɛɛ no Peter,
17 Zebedee ne ba James, nye James no nua John (ɔsanee frɛɛ hɔn Boanerges, ne nkyerɛase nye “Asenaman Mba”),
18 Andrew, Philip, Batolomew, Matthew, Thomas, Alfios ne ba James, Tadios, Nsiyɛfo Simon,
19 nye Judas Iskariot a ekyir yi oyii no mae no.
Afei ɔkɔr fie bi mu.
20 Na dɛm aber yi so, nyimpadɔm pii behyiaa mu wɔ hɔ ma woenntum enndzidzi mpo.
21 Na ber a n’ebusuafo tsee no, wɔkɔr dɛ wɔrekɛkyer no, osiandɛ wɔkaa dɛ: “Ɔabɔ dam.”
22 Afei so, akyerɛwfo a wofi Jerusalem bae no kaa dɛ: “Ɔwɔ Beelzebub,* na ɔnam esunsum fi hɔn panyin no tum do na otu esunsum fi.”
23 Ntsi ɔfrɛɛ hɔn baa ne nkyɛn, na ɔdze mfatoho kaa kyerɛɛ hɔn dɛ: “Ɔbɛyɛ dɛn na Satan etu Satan?
24 Sɛ ahenman bi soɛr tsia noho a, dɛm ahenman no runntum nngyina;
25 na sɛ fie bi soɛr tsia noho a, dɛm fie no runntum nngyina.
26 Ntsi sɛ Satan asoɛr etsia noho na ɔroko etsia noho a, orunntum nngyina, nna n’ewiei ara na ɔreba no.
27 Nokwasɛm nye dɛ, obiara nnyi hɔ a obotum ewura ɔbarimba a noho yɛ dzen ne fie ekowia ne ndzɛmba. Gyedɛ odzi kan kyekyer ɔhoɔdzenfo no ansaana oetum asesaw ndzɛmba a ɔwɔ ne fie hɔ no akɔ.
28 Nokwar mese hom dɛ, adze biara a nyimpa mba bɛyɛ no, wɔdze bɛkyɛ hɔn; ɔmmfa ho bɔn biara a wɔbɛyɛ anaa ebususɛm biara a wɔbɛka no, wɔdze bɛkyɛ hɔn.
29 Naaso obiara a ɔbɛka ebususɛm etsia sunsum krɔnkrɔn no dze, wɔremmfa nnkyɛ no da, na mbom no bɔn no ho afɔbu bɛda no do daa.”
30 Jesus kaa dɛm osiandɛ nna wɔreka dɛ: “Ɔwɔ sunsum fi.”
31 Afei ne maame nye no nuanom mbanyimfo bae begyinaa abowano na wɔsomaa obi dɛ ɔnkɛfrɛ no mbra.
32 Dɛm aber no nna nyimpa pii tsenatsena ne nkyɛn, na wɔkaa kyerɛɛ no dɛ: “Hwɛ! Wo maame nye wo nuanom mbanyimfo gyina abowano rohwehwɛ wo.”
33 Naaso obisaa hɔn dɛ: “Woana nye me maame, na woananom nye mo nuanom mbanyimfo?”
34 Na ɔtoo n’enyi hwɛɛ hɔn a wɔtsenatsena ne nkyɛn no nyina hɔn enyim, na ɔkaa dɛ: “Hom nhwɛ, me maame nye mo nuanom mbanyimfo nye yi.
35 Obiara a ɔyɛ Nyankopɔn n’apɛdze no, ɔno nye mo nuabanyin, nye m’akyerɛbaa nye me maame.”
