Mark Asɛmpa 6:1-56
6 Afei ofii hɔ baa nankasa no kurow mu, na n’esuafo no dzii n’ekyir.
2 Na odur Ahomgyeda no, ɔhyɛɛ ase kyerɛkyerɛe wɔ nhyiamudan no mu, na hɔn a woritsie no no mu dodowara ho dwuruuw hɔn ma wɔkaa dɛ: “Dɛm ndzɛmba yi, okosuaa no wɔ hen? Na ebɛnadze ntsi na wɔdze nyansa a ɔtse dɛm ama no, na wɔnam no do reyɛ anwanwadze ahorow a ɔtse dɛm yi?
3 Ɔnnyɛ oyi na ɔyɛ kapentanyi no a? Ɔnnyɛ Mary ne ba no a no nuanom nye James, Josef, Judas na Simon no anaa? Na nnyɛ yɛnye no nuanom mbasiafo no nyina wɔ ha bi a?” Ntsi ɔbɛyɛɛ fintsidua maa hɔn.
4 Naaso Jesus kaa kyerɛɛ hɔn dɛ: “Wodzi nkɔnhyɛnyi nyi wɔ beebiara, naaso nankasa no kurow mu, n’ebusuafo mu, anaa nankasa ne fie dze wommbu no hwee.”*
5 Ntsi oenntum annyɛ anwanwadze pii wɔ hɔ, mbom nyimpa kakraabi na ɔdze ne nsa guu hɔn do saa hɔn yarba.
6 Nokwasɛm nye dɛ ɔyɛɛ no nwanwa dɛ wonnyi gyedzi. Na okekyinkyiin nkurobaase kɛkyerɛkyerɛe.
7 Afei ɔfrɛɛ Duebien no na ɔsomaa hɔn beenu beenu, na ɔmaa hɔn tum a wɔdze bedzi esunsum fi do.
8 Afei ɔkaa kyerɛɛ hɔn dɛ mma wɔmmfa hwee nntu kwan no. Mma wɔmmfa paanoo anaa edziban kotoku nnkɔ, na mma wɔmmfa sika* so nnhyɛ hɔn abɔdo mu. Na mbom poma nkotsee na wɔmfa nkɔ.
9 Na wɔnhyɛ mpaboa naaso mma wɔnnhyɛ ntar ebien.*
10 Ɔsaan so kaa kyerɛɛ hɔn dɛ: “Fie biara a hom bɔkɔ mu wɔ kurow bi mu no, hom ntsena hɔ nkesi dɛ hom befi dɛm kurow no mu akɔ.
11 Na beebiara a wɔanngye hom anaa woenntsie hom no, sɛ hom rifi hɔ akɔ a, hom mporoporow hom ananadze huntuma ngu hɔ ama wɔaayɛ dasedzi ama hɔn.”
12 Afei wosii mu kɔree na wɔkɛkaa kyerɛɛ nkorɔfo dɛ wonnu hɔnho,
13 na wotutuu esunsum fi pii na wɔseraa nyimpa pii a wɔyar no ngo na wɔsaa hɔn yarba.
14 Na Ɔhen Herod tsee iyi ho asɛm, osiandɛ nna wɔrobɔ Jesus ne dzin wɔ beebiara, na nna nkorɔfo reka dɛ: “Woenyan John Onumanyi no efi ewufo mu, ntsi na otum yɛ dɛm anwanwadze ahorow yi.”
15 Naaso nna binom so reka dɛ: “Ɔyɛ Elijah a.” Binom so dze nna wɔreka dɛ: “Ɔyɛ nkɔnhyɛnyi tse dɛ tsetse nkɔnhyɛfo no mu kor.”
16 Na aber a Herod tsee no, ɔkaa dɛ: “John a mutwaa ne tsir no, ɔno na woenyan no efi ewufo mu no.”
17 Nna Herod awar no nua Philip ne yer Herodias, na osian dɛm ɔbaa yi ntsi Herod nankasa somae ma wɔkɛkyeer John dze nkɔnsɔnkɔnsɔn guu no dze no kɔtoo efiadze.
18 Osiandɛ nna John taa ka kyerɛ no dɛ: “Mbra mma kwan dɛ ewar wo nua ne yer no.”
19 Iyi ntsi Herodias faa John no ho tan, na nna ɔpɛ dɛ oku no, naaso nna onntum.
20 Nna Herod suro John osiandɛ nna onyim dɛ ɔyɛ ɔtseneneenyi na ɔyɛ nyimpa krɔnkrɔn, ne dɛm ntsi ɔbɔɔ no ho ban. Aber biara a obetsie John ne nsɛm no nna n’adwen etu afora, naaso ɔkɔr do dze enyigye tsiee no.
21 Naaso da kor, kwan bi buei maa Herodias. Dɛm da no, nna Herod ridzi n’awoda, ntsi dɛm ewimbir no ɔtoo pon maa ne man mu etsitsir nye asogyafo mpanyimfo* na Galilee mpanyimfo no.
22 Na Herodias ne babaa bɛsawee wɔ ase, na ɔyɛɛ Herod nye hɔn a wɔnye no ridzidzi* no fɛw. Ntsi ɔhen no kaa kyerɛɛ akataasia no dɛ: “Bisa me adze biara a epɛ, na medze bɛma wo.”
23 Nyew, ɔkaa ntam kyerɛɛ no dɛ: “Adze biara a ibebisa me no, sɛ m’ahendzi no mu fa mpo a, medze bɛma wo dodo.”
24 Ntsi akataasia no kɔree kebisaa ne maame dɛ: “Ebɛnadze na mimbisa?” Ne maame kaa kyerɛɛ no dɛ: “John Onumanyi no ne tsir.”
25 Ntsi ntsɛmara ɔdze mbirika kɔr ɔhen no nkyɛn na ɔdze kɔtoo n’enyim dɛ: “Mepɛ dɛ edze John Onumanyi no ne tsir to apampa do ma me seseiara.”
26 Asɛm yi maa ɔhen no yɛɛ basaa paa, naaso osian ntam a nna ɔaka nye ahɔho a wɔwɔ hɔ* no ntsi, nna ɔmmpɛ dɛ ɔka kyerɛ akataasia no dɛ ɔrennyɛ dza oebisa no.
27 Ntsi ntsɛmara na ɔhen no somaa ɔweɔmfo bi dɛ onkotwa John ne tsir mbra, na ɔkɔree kotwaa ne tsir wɔ efiadze hɔ,
28 na ɔdze too apampa do bae. Ɔdze maa akataasia no, na akataasia no dze kɛmaa ne maame.
29 Aber a John n’esuafo no tsee asɛm a woesi no, wɔbae bɛfaa no fun no kesiee no wɔ nda* bi mu.
30 Na asomafo no boaa hɔnho ano baa Jesus ne nkyɛn, na wɔbɛkaa dza wɔyɛe nye dza wɔkyerɛkyerɛe nyina kyerɛɛ no.
31 Na ɔkaa kyerɛɛ hɔn dɛ: “Hom mma yɛnkɛpɛ beebi nhyɛ ngye hɛn ahom kakra.” Osiandɛ nna nyimpa pii ridzi hɔn nkyɛn akɔnaaba ma wonnya adagyer mpo nndzidzi.
32 Ntsi wɔfaa hɛmba na wosii mu dɛ wɔrokɔ beebi a obiara nnyi hɔ na hɔn nkotsee wɔaakɛhyɛ hɔ.
33 Naaso wɔrokɔ no, binom hun hɔn na binom so tsee ho asɛm, na hɔn nyina fifi nkurow no nyina mu dze mbirika faa famu dzii hɔn enyim kan kɔr beebi a wɔrokɔ no.
34 Aber a ofii hɛmba no mu sianee no, ohun nyimpadɔm kɛse bi, na hɔn ho yɛɛ no mbɔbɔr osiandɛ nna wɔtse dɛ nguan a wonnyi hwɛfo. Ntsi ɔhyɛɛ ase kyerɛkyerɛɛ hɔn ndzɛmba pii.
35 Na odur ewimbir no, n’esuafo no baa ne nkyɛn bɛkaa kyerɛɛ no dɛ: “Ha mmbɛn kurow mu na adze so resa.
36 Ntsi gya nkorɔfo yi kwan ma wɔnkɔ nkurow na nkuraase a ɔbembɛn ha yi mu ma wɔnkɔtɔ biribi ndzi.”
37 Nna ɔkaa kyerɛɛ hɔn dɛ: “Homara hom mma hɔn biribi ma wondzi.” Nna hɔn so wobisaa no dɛ: “Yɛnkɔtɔ paanoo denare* 200 na yɛmfa mbrɛ hɔn ma wondzi anaa?”
38 Nna ɔkaa kyerɛɛ hɔn dɛ: “Hom nkɔhwɛ dɛ paanoo dodow ahen na hom wɔ.” Na wɔkɔhwɛe no, wɔbɛkaa kyerɛɛ no dɛ: “Ɔyɛ enum na nam ebien.”
39 Na ɔkaa kyerɛɛ nkorɔfo no nyina dɛ wɔntsenatsena sar no do ekuwekuw.
40 Ntsi wɔtsenatsenaa ekuwekuw. Nna kuw no bi yɛ 100 na bi so yɛ 50.
41 Afei ɔfaa paanoo enum nye nam ebien no, na ɔhwɛɛ sor na ohyiraa do. Na obubuu paanoo no mu, na ɔhyɛɛ ase dze maa n’esuafo no dɛ wɔmfa mma nkorɔfo no, na obubuu nam ebien no so mu maa hɔn nyina.
42 Ntsi hɔn nyina dzidzii mee,
43 na aber a wɔboaboaa paanoo a ɔkae no ano no, wonyaa nkɛntsɛn 12 amaama; nam a ɔkae no nnka ho.
44 Mbarimba 5,000 na wodzii paanoo no.
45 Afei ntsɛmara na ɔmaa n’esuafo no foow hɛmba no, na ɔkaa kyerɛɛ hɔn dɛ wondzi n’enyim kan ntwa po no nkɔ Betsaida mpoano, na ɔno dze ogyaa nyimpadɔm no kwan ma wɔkɔree.
46 Na aber a ogyaa hɔn kwan wiei no, ɔkɔr bepɔw bi do kɔbɔɔ mpaa.
47 Na odur ewimbir no, nna hɛmba no wɔ po no ne finimfin, naaso ɔno dze nna nankotsee da ho ara wɔ beebi a ɔrobɔ mpaa no.
48 Na ohun dɛ wɔayɛ dzen ama n’esuafo no dɛ wɔbɔkwan hɛmba no, osiandɛ nna mframa no robɔ hyia hɔn. Na bɛyɛ ahanamakye no mu hɔ beebi no,* ɔnantseew po no do baa hɔn nkyɛn, naaso ɔyɛɛ dɛ ɔrepa hɔn ho.
49 Aber a wohun dɛ ɔnam po no do no, wɔkaa dɛ: “Yɛroso daa anaa?” Na wɔtseatseaa mu.
50 Osiandɛ hɔn nyina hun no no, hɔn akoma tui. Na ntsɛmara na Jesus kaa kyerɛɛ hɔn dɛ: “Hom nka hom akoma nto hom yamu! Ɔyɛ mara a, mma hom nnsuro.”
51 Na ɔkɔr hɔn nkyɛn wɔ hɛmba no mu, na mframa no gyaae. Na iyi maa hɔnho dwuruuw hɔn papaapa,
52 osiandɛ wɔanntse paanoo no ho asɛm no ase. Nna hɔn akoma nnyae nntsee ase.
53 Aber a wotwaa po no, wɔbaa Genesaret, na wɔtoo hɛmba no sekyɛ wɔ mpoano hɔ beebi.
54 Na aber a wosianee fii hɛmba no mu ara pɛ na nkorɔfo hun no.
55 Na wotuu mbirika kɔr apaamu hɔ nyina, na wɔhyɛɛ ase dze hɔn a wɔyar no guu mpa do baa beebi a wɔtsee dɛ ɔwɔ no.
56 Na kurow anaa ekuraase biara a wɔbɔkɔ mu no, nna wɔdze ayarfo bogu guado na wɔserɛ no dɛ ɔmma wɔmfa hɔn nsa nka n’atar ngugudo no n’ano ndwow ara kɛkɛ. Na hɔn a wɔdze hɔn nsa kae no nyina ho tɔɔ hɔn.
Ase Hɔ Nsɛm
^ Anaa “wonndzi no nyi.”
^ Greek, “kɔɔber.”
^ Kyerɛ dɛ, hɔn atar a wɔhyɛ no ara na wɔmfa nkɔ, na onnyi dɛ wɔfa fofor biara ka ho.
^ Anaa “asafohemfo.”
^ Anaa “wɔnye no tsena pon ho ridzidzi.”
^ Anaa “wɔnye no tsena pon ho ridzidzi.”
^ Anaa “nkaa nda.”
^ Hwɛ Nke. B14.
^ Greek, “bɛyɛ dasu a otsia anan.” Kyerɛ dɛ, bɛyɛ ahanamakye 3:00 kesi anapa 6:00 aber a ewia rupue.
