Mark Asɛmpa 7:1-37
7 Na Farisiifo no nye akyerɛwfo no mu bi a wofi Jerusalem bae no baa ne nkyɛn.
2 Na wohun dɛ n’esuafo no bi dze nsa a no ho nntsew ridzidzi, kyerɛ dɛ, wɔannhohor hɔn nsa ho.*
3 (Osiandɛ Farisiifo no na Jewfo no nyina, nna wɔhohor hɔn nsa ho besi hɔn abatwɛr ansaana woedzidzi. Nna wokitsa hɔn egyanom atsetsesɛm mu dzendzenndzen.
4 Sɛ wofi guado ba a, gyedɛ wɔhohor hɔnho ansaana woedzidzi. Nna amambra afofor pii so wɔ hɔ a wokitsa mu dzendzenndzen; bi nye dɛ wonuma nkɔɔpow nkakraba na akɛse nye nkyɛnse a wɔdze kɔɔber ayɛ.)
5 Ntsi Farisiifo na akyerɛwfo yi bisaa no dɛ: “Ebɛnadze ntsi na w’esuafo no nndzi hɛn egyanom amambra do, na wɔdze nsa a no ho nntsew dzidzi?”
6 Nna ɔkaa kyerɛɛ hɔn dɛ: “Hom nyaatwemfo, sɛ Isaiah hyɛɛ hom ho nkɔm a, ɔfata. Ɔkyerɛɛw dɛ, ‘Ɔman yi dze hɔn ano na wɔdze dzi me nyi, naaso hɔn akoma dze wɔatwe efi mo ho kɔ ekyirekyir.
7 Wɔsom me kwa, osiandɛ wɔkyerɛkyerɛ nyimpa ahyɛdze dɛ ɔyɛ Nyankopɔn ne nkyerɛkyerɛ.’
8 Hom dze Nyankopɔn ne mbrasɛm no ato beebi, nna hom esuo nyimpa amambra mu dzendzenndzen.”
9 Bio so ɔkaa kyerɛɛ hɔn dɛ: “Hom fa nyansakwan bi do dze Nyankopɔn ne mbra to nkyɛn mbrɛ ɔbɛyɛ a hom bedzi hom amambra do.
10 Dɛ mfatoho no, Moses kaa dɛ, ‘Dzi wo maame na wo papa nyi,’ na ‘Obiara a ɔbɛkasa etsia ne maame anaa ne papa* no, wonku no.’
11 Naaso hom dze hom ka dɛ, ‘Sɛ obi ka kyerɛ ne maame anaa ne papa dɛ: “Adze biara a mowɔ a nkyɛ mubotum dze aboa wo no yɛ kɔɔban a (kyerɛ dɛ, akyɛdze a woehyira do ama Nyankopɔn),”’
12 hom mma no kwan mma ɔnnyɛ biribiara mma ne maame anaa ne papa bio.
13 Osian hom amambra a hom dze kyerɛkyerɛ ntsi, hom mmfa Nyankopɔn n’asɛm no nnyɛ hwee. Na hom yɛ ndzɛmba ahorow pii so a ɔtsetse dɛm.”
14 Ntsi ɔfrɛɛ nyimpadɔm no nyina baa ne nkyɛn bio, na ɔkaa kyerɛɛ hɔn dɛ: “Hom nyina hom ntsie m’asɛm yi na hom ntse ase.
15 Adze biara nnyi hɔ a ɔkɔ nyimpa no mu a obotum egu no ho fi; mbom dza ofi nyimpa no mu ba no, ɔno na ogu no ho fi.”
16 * ——
17 Na aber a ofii nyimpadɔm no nkyɛn kɔr fie no, n’esuafo no hyɛɛ ase bisaa no mfatoho no ho asɛm.
18 Nna ɔkaa kyerɛɛ hɔn dɛ: “Ntsi hom so hom nntse asɛm yi ase tse dɛ nyimpadɔm no ara? Hom nnyim dɛ adze biara nnyi hɔ a ɔkɔ nyimpa no mu a obotum egu no ho fi a?
19 Osiandɛ biribiara a ɔkɔ nyimpa no mu no, ɔnnkɔ n’akoma mu, mbom ɔkɔ ne yafun mu na ofi hɔ kogu tseafi mu.” Ɔkaa dɛm dze kyerɛɛ dɛ edziban nyina ho tsew.
20 Na ɔsanee kaa kyerɛɛ hɔn dɛ: “Dza ofi nyimpa no mu ba no, ɔno na ogu no ho fi.
21 Dza ofi nyimpa no mu, kyerɛ dɛ, dza ofi n’akoma mu ba no, bi nye adwembɔn, edwamambɔ,* adzewia, ewudzi,
22 awarsɛɛ, edzifodzepɛ, etsirmɔdzensɛm, ndaadaasɛm, ɔbrafun,* enyiber, ebususɛm, ahantan nye nkwaseasɛm.
23 Dɛm ndzɛmba bɔn yi nyina fi nyimpa no mu ba, na iyinom na ogu no ho fi.”
24 Afei ofii hɔ, na ɔdze n’enyi kyerɛɛ Taya na Sidon mantɔw no mu. Na odur hɔ no ɔkɔr fie bi mu. Nna ɔmmpɛ dɛ obiara bohu no naaso nkorɔfo hun no.
25 Ntsɛmara na ɔbaa bi a ne babaa kakraba wɔ sunsum fi tsee ne nka, na ɔbae bɔkotoow n’enyim.
26 Nna ɔbaa no yɛ Greeknyi a wɔwoo no wɔ Finisia a ɔwɔ Siria no, na ɔkɔr do serɛɛ no dɛ ontu sunsum fi no mfi ne babaa no mu.
27 Naaso Jesus kaa kyerɛɛ no dɛ: “Ɔsɛ dɛ mbofra no dzi kan dzidzi mee, osiandɛ ɔnnyɛ papa dɛ wɔdze mbofra no hɔn paanoo bɛma mbɔdɔmmba.”
28 Nna ɔbaa no kaa kyerɛɛ no dɛ: “Nyew, owura, dza ereka no dze noara nye no, naaso nkyɛ mbɔdɔmmba a wɔdeda pon ase mpo, wodzi mbofra nkakraba no hɔn paanoo no mporoporoba a ogu famu no.”
29 Aber a ɔkaa dɛm no, Jesus kaa kyerɛɛ no dɛ: “Kɔ, na osian dza aka yi ntsi sunsum fi no efi wo babaa no mu.”
30 Ntsi osii mu kɔr fie na ɔkɔtoo dɛ abofra kakraba no da mpa do na sunsum fi no efi no mu kɔ.
31 Aber a Jesus fii Taya mantɔw no mu no, okoduaduaa Sidon dze kɛfaa Dekapolis mantɔw* no mu baa Galilee po no ho.
32 Na wɔdze ɔbarimba bi a n’asowa esisiw na onntum nnkasa yie brɛɛ no, na wɔserɛɛ no dɛ ɔmfa ne nsa ngu no do.
33 Na ɔfaa no fii nyimpadɔm no mu kɔr nkyɛn beebi. Afei ɔdze ne nsa hyehyɛɛ ɔbarimba no n’asowa mu, ɔtoo ntafi, na ɔdze ne nsa kaa ɔbarimba no ne tɛkyerɛma.
34 Afei ɔhwɛɛ sor, na oguu ahom kɛse na ɔkaa kyerɛɛ no dɛ: “Ephphatha,” n’asekyerɛ nye dɛ, “Bue.”
35 Ɔkaa dɛm no, n’asowa buebuei, na adze a nna ɔmma onntum nnkasa yie no fii hɔ, na ɔhyɛɛ ase dɛ ɔrekasa yie.
36 Na ɔbɔɔ hɔn ano dɛ mma wɔnnka nnkyerɛ obiara, naaso ogu do robɔ hɔn ano mpo no, nna afei na wɔreka no kɛse.
37 Nokwasɛm nye dɛ, hɔnho dwuruuw hɔn papaapa, na wɔkaa dɛ: “Ɔayɛ adze nyina yie. Ɔma hɔn a wɔnntse asɛm mpo tse asɛm na mmum so kasa.”
Ase Hɔ Nsɛm
^ Nna Farisiifo no na Jewfo binom hohor hɔn nsa ho dɛ mbrɛ Jewfo hɔn amambra tse.
^ Anaa “Obiara a obogu ne maame anaa ne papa n’enyim ase pɔtɔɔ.”
^ Hwɛ Nke. A3.
^ Greek, porneia. Hwɛ Nkyerɛkyerɛmu Ɔfa hɔ.
^ Anaa “ndzeyɛɛ a ɔyɛ enyito.” Greek, aselgeia. Hwɛ Nkyerɛkyerɛmu Ɔfa hɔ.
^ Anaa “Ɔmantɔw A Nkurow Du Na Wɔwɔ Mu.”
