Mark Asɛmpa 8:1-38
8 Dɛm aber no, nyimpadɔm kɛse bi baa Jesus ne nkyɛn, na nna wonnyi edziban biara a wobedzi. Ntsi ɔfrɛɛ n’esuafo no na ɔkaa kyerɛɛ hɔn dɛ:
2 “Nyimpadɔm yi ho yɛ me mbɔbɔr, osiandɛ wɔatsena me nkyɛn nda ebiasa na wonnyi biribiara a wobedzi.
3 Sɛ migya hɔn kwan dɛ wɔmfa yafun pan* nkɔ a, wobotwitwa ahwehwe wɔ kwan mu, na hɔn mu binom so fi ekyir.”
4 Naaso n’esuafo no bisaa no dɛ: “Ha mmbɛn kurow mu, ntsi henfa na obi botum enya paanoo a ɔbɔso dɛm nyimpadɔm yi nyina?”
5 Nna ɔno so bisaa hɔn dɛ: “Paanoo ahen na hom wɔ?” Woyii no ano dɛ: “Esuon.”
6 Ntsi ɔkaa kyerɛɛ nyimpadɔm no dɛ wɔntsenatsena famu. Afei ɔfaa paanoo esuon no, na ɔdaa ase. Na obubuu mu dze maa esuafo no dɛ wɔnkyekyɛ, na esuafo no kyekyɛe maa nyimpadɔm no.
7 Nna wɔwɔ nam kakraabi so, ntsi ohyiraa do, na ɔkaa kyerɛɛ esuafo no dɛ wɔnkyekyɛ ɔno so.
8 Ntsi wodzidzii mee, na wɔboaboaa dza ɔkae no ano no, ɔyɛɛ nkɛntsɛn akɛse esuon amaama.
9 Mbarimba a wodzii edziban no, nna hɔn dodow yɛ bɛyɛ 4,000. Afei ogyaa hɔn kwan ma wɔkɔree.
10 Na hɔ no ara na ɔnye n’esuafo no foow hɛmba no, na wɔbaa Dalmanuta mantɔw no mu.
11 Na Farisiifo no baa hɔ, na wɔhyɛɛ ase nye no gyee kyim. Nna wɔpɛ dɛ wɔsɔ no hwɛ, ntsi wɔkaa kyerɛɛ no dɛ ɔnyɛ asɛnkyerɛdze bi a ofi sor nkyerɛ hɔn.
12 Iyi maa no werɛ hoow paa na ɔkaa dɛ: “Ebɛnadze ntsi na dɛm ebusuasantsen yi rohwehwɛ asɛnkyerɛdze? Nokwar mese hom dɛ wɔremma dɛm ebusuasantsen yi asɛnkyerɛdze biara.”
13 Ɔkaa dɛm no ogyaa hɔn hɔ, na ɔsanee kɔfoow hɛmba no kɔr nsu no n’ekyir.
14 Naaso hɔn werɛ fiir dɛ wɔbɛfa paanoo. Nna wonnyi hwee wɔ hɛmba no mu gyedɛ paanoo kor pɛ.
15 Na ɔkaa kyerɛɛ hɔn pen dɛ: “Hom mma hom enyi nda hɔ na hom nhwɛ homho yie wɔ Farisiifo no hɔn nkaweedur* nye Herod ne nkaweedur no ho.”
16 Ntsi wɔhyɛɛ ase dɛ wɔrekasakasa wɔ paanoo a wɔammfa ammba no ho.
17 Aber a ohun no dɛm no, ɔkaa kyerɛɛ hɔn dɛ: “Ebɛnadze ntsi na hom rekasakasa wɔ paanoo a hom ammfa ammba no ho? Ntsi dza mereka ho asɛm akyerɛ hom no hom nnyae nnhunii, na hom nnyae nntsee ase a? Ntsi hom akoma nnyae nntsee ase?
18 ‘Hom wɔ enyiwa, naaso hom nnhu adze; hom wɔ asowa, naaso hom nntse asɛm.’ Ntsi hom werɛ efir a?
19 Aber a mububuu paanoo enum mu maa mbarimba 5,000 no, dza ɔkae ma hom tasee no, ɔyɛɛ nkɛntsɛn dodow ahen amaama?” Woyii no ano dɛ: “Duebien.”
20 Ɔsanee bisaa hɔn dɛ: “Aber a mububuu paanoo esuon mu maa mbarimba 4,000 no so, dza ɔkae ma hom tasee no, ɔyɛɛ nkɛntsɛn akɛse dodow ahen amaama?” Woyii no ano dɛ: “Esuon.”
21 Wɔkaa dɛm no ɔkaa kyerɛɛ hɔn dɛ: “Ntsi hom nnyae nntsee ase a?”
22 Afei wɔbaa Betsaida, na wɔdze ɔbarimba bi a n’enyi efura brɛɛ no, na wɔpaa no kyɛw dɛ ɔmfa ne nsa nka no.
23 Ntsi osuoo nyifuranyi no ne nsa mu, na ɔnye no puei fii kurow no mu. Afei ɔtoo ntafi guu n’enyiwa do na ɔdze ne nsa guu no do na obisaa no dɛ: “Ihu biribi a?”
24 Ɔbarimba no maa n’enyi do na ɔkaa dɛ: “Muhu nkorɔfo dɛ wɔnenam hɔ, naaso muhu hɔn tse dɛ ndua.”
25 Ntsi ɔdze ne nsa guu ɔbarimba no n’enyiwa do bio, na ɔbarimba no hun adze yie. N’enyiwa no buei, na ohun biribiara pɛpɛɛpɛ dɛ mbrɛ ɔtse.
26 Na Jesus gyaa no kwan dɛ ɔnkɔ ne fie, naaso ɔkaa kyerɛɛ no dɛ: “Mma nnkɔ dɛm kurow yi mu.”
27 Afei Jesus nye n’esuafo no fii hɔ na wɔdze hɔn enyi kyerɛɛ nkuraase a ɔwɔ Sesarea Philippi no. Na aber a wɔnam kwan do rokɔ no, obisaa n’esuafo no dɛ: “Nkorɔfo ka dɛ meyɛ woana?”
28 Woyii no ano dɛ: “Binom ka dɛ eyɛ John Onumanyi no, naaso binom so se eyɛ Elijah, na dɛmara na binom so ka dɛ eyɛ nkɔnhyɛfo no mu kor.”
29 Nna obisaa hɔnara so dɛ: “Hom so ɛ, hom ka dɛ meyɛ woana?” Peter yii no ano dɛ: “Ɔwo nye Christ no.”
30 Na ɔhyɛɛ hɔn dzendzenndzen dɛ mma wɔnnka no ho asɛm nnkyerɛ obiara.
31 Bio so, ɔhyɛɛ ase kyerɛkyerɛɛ hɔn dɛ ɔsɛ dɛ nyimpa Ba no hu amandze pii. Na ɔsɛ dɛ mpanyimfo no, nye asɔfompanyimfo no, nye akyerɛwfo no pow no na woku no, na ɔsoɛr da a otsia ebiasa no.
32 Nokwasɛm nye dɛ, ɔkaa dɛm asɛm yi ma obiara tsee, naaso Peter dze no kɔr nkyɛn, na ɔhyɛɛ ase kasaa n’enyim.
33 Nna Jesus daan noho hwɛɛ n’esuafo no, na otwuuw Peter n’enyim dɛ: “Fi mo do kɔ, Satan! Osiandɛ enndwen Nyankopɔn adwen, mbom edwen nyimpa adwen.”
34 Afei ɔfrɛɛ nyimpadɔm no nye n’esuafo no baa ne nkyɛn na ɔkaa kyerɛɛ hɔn dɛ: “Sɛ obi pɛ dɛ odzi m’ekyir a, ɔnnsɛ dɛ ɔyɛ dza noara pɛ, mbom ɔsɛ dɛ ɔfa n’asɛndua* na ɔkɔ do dzi m’ekyir.
35 Na obiara a ɔpɛ dɛ ɔbɔ no nkwa* ho ban no, obefi ne nsa. Naaso obiara a ɔbɔhwer no nkwa* osian emi nye asɛmpa no ntsi no, ne nsa bɛka.
36 Sɛ nyimpa nya wiadze yi mu ndzɛmba nyina, na sɛ ɔhwer no nkwa* a, ebɛn mfaso paa na obenya?
37 Ebɛn adze paa na nyimpa wɔ a obotum dze asesa no nkwa?*
38 Na obiara a emi anaa me nsɛm bɛyɛ no enyito wɔ dɛm ebusuasantsen awarsɛɛfo* na ndzebɔnyɛfo yi mu no, sɛ nyimpa Ba no ba wɔ n’Egya n’enyimnyam mu a n’abɔfo krɔnkrɔn no ka no ho a, dɛm nyimpa no so ho bɛyɛ no enyito.”
Ase Hɔ Nsɛm
^ Anaa “kɔm.”
^ Hwɛ Nkyerɛkyerɛmu Ɔfa hɔ.
^ Hwɛ Nkyerɛkyerɛmu Ɔfa hɔ.
^ Anaa “ne kra.”
^ Anaa “ne kra.”
^ Anaa “ne kra.”
^ Anaa “ne kra.”
^ Kyerɛ dɛ, wonndzi Nyankopɔn nokwar.
