Mark Asɛmpa 9:1-50
-
Jesus sesae wɔ n’esuafo no enyim (1-13)
-
Ɔsaa banyimba bi a ɔwɔ sunsum fi yarba (14-29)
-
Obi a ɔwɔ gyedzi no, adze biara botum ayɛ yie ama no (23)
-
-
Jesus sanee kaa no wu ho asɛm (30-32)
-
Esuafo no gyee obi a ɔyɛ kɛse wɔ hɔn mu no ho kyim (33-37)
-
Obiara a ɔnnsoɛr nntsia hɛn no, ɔwɔ hɛn afa (38-41)
-
Fintsidua (42-48)
-
“Hom nnya nkyen wɔ hom mu” (49, 50)
9 Afei so ɔkaa kyerɛɛ hɔn dɛ: “Nokwar mese hom dɛ hɔn a wogyinagyina ha yi mu bi wɔ hɔ a, wɔrennka owu nnhwɛ koraa kesi dɛ wobohu dɛ Nyankopɔn n’Ahendzi* no ridzi tum.”
2 Nda esia ekyir no, Jesus faa Peter, James na John, na ɔnye hɔn nkotsee kɔr bepɔw tsentsenntsen bi do. Na ɔsesae wɔ hɔn enyim;
3 n’atar ngugudo no hyɛɛ ase hyerɛnee na ɔyɛɛ fitaa. Obiara nnyi asaase do a obotum ahor tam ma wɔayɛ fitaa dɛm da.
4 Afei so, wohun Elijah na Moses dɛ wɔnye Jesus rekasa.
5 Nna Peter kaa kyerɛɛ Jesus dɛ: “Rabbi, oye dɛ yɛwɔ ha. Ntsi ma yensi ntamadan ebiasa; wodze kor, Moses nedze kor, nna Elijah so nedze kor.”
6 Nokwasɛm nye dɛ nna Peter nnhu dza ɔnyɛ, osiandɛ nna hɔn baasa no nyina abɔ hu paa.
7 Na mununkum bi bɛkataa hɔn do, na ndze bi fi mununkum no mu kaa dɛ: “Oyi nye me Ba a modɔ no. Hom ntsie no.”
8 Na amonmu hɔ ara wɔtotoo hɔn enyi, naaso woennhu obiara wɔ hɔn nkyɛn gyedɛ Jesus nkotsee.
9 Na aber a worisian bepɔw no, ɔhyɛɛ hɔn dzendzenndzen dɛ mma wɔnnka dza woehu no ho asɛm nnkyerɛ obiara kesi dɛ wobenyan nyimpa Ba no efi ewufo mu.
10 Ntsi wɔannka annkyerɛ obiara,* naaso nna woribisabisa hɔnho dɛ: “Ewufo mu a wobenyan no efi no kyerɛ dɛn?”
11 Nna wobisaa no dɛ: “Ebɛnadze ntsi na akyerɛwfo no ka dɛ ɔsɛ dɛ Elijah dzi kan ba ansaana no?”
12 Nna ɔkaa kyerɛɛ hɔn dɛ: “Ɔyɛ ampa dɛ Elijah bedzi kan aba, na ɔaabɔtoto ndzɛmba nyina yie. Naaso ebɛnadze ntsi na wɔakyerɛw afa nyimpa Ba no ho dɛ obohu amandze pii na woeebu no enyimtsia no?
13 Nokwar mese hom dɛ Elijah aba dada, na wɔyɛɛ no dza wɔpɛ biara, dɛ mbrɛ wɔakyerɛw afa no ho no.”
14 Aber a wɔbaa esuafo a wɔaka no nkyɛn no, wohun dɛ nyimpadɔm pii etwa hɔn ho ehyia, na nna akyerɛwfo no mu bi nye hɔn regye kyim.
15 Naaso aber a nyimpadɔm no nyina enyi bɔɔ no do ara pɛ no, hɔnho dwuruuw hɔn na wotutuu mbirika kehyiaa no.
16 Ntsi obisaa hɔn dɛ: “Ebɛnadze na hom nye hɔn regye ho kyim no?”
17 Na obi fi nyimpadɔm no mu yii no ano dɛ: “Kyerɛkyerɛnyi, medze me babanyin brɛɛ wo osiandɛ ɔwɔ sunsum fi bi a ɔmma onntum nnkasa.
18 Beebiara a sunsum fi no bɛba no do no, sɛ ɔwɔ hen o, sɛ ɔhyɛ hen o, otwa no hwe famu, n’ano twa ehur, ɔdze ne se twutwuw ne se enyim,* na ɔgogow. Mekaa kyerɛɛ w’esuafo no dɛ nkyɛ wontu no, naaso woenntum annyɛ.”
19 Nna ɔkaa kyerɛɛ hɔn dɛ: “Ao ebusuasantsen a hom nnyi gyedzi, menye hom ntsena nkodu dabɛn? Na minnya hom ho abotar nkesi dabɛn? Fa no brɛ me.”
20 Ntsi wɔdze banyimba no brɛɛ Jesus. Na aber a sunsum no n’enyi bɔɔ Jesus do no, prɛko pɛ na ɔmaa abofra no ho wosoow gidzigidzi. Na otwaa no hwee famu, ɔmaa omunumunumii, na n’ano twaa ehur.
21 Nna Jesus bisaa papa no dɛ: “Ebɛn aber na dɛm adze yi hyɛɛ ase dɛ ɔreyɛ no?” Ɔkaa kyerɛɛ no dɛ: “Fitsi no mbofrase pɛɛ,
22 ɔtaa ma otwa hwe gya na nsu mu mbrɛ ɔbɛyɛ a oboku no. Sɛ ibotum ayɛ ho biribi a, hu hɛn mbɔbɔr na boa hɛn.”
23 Jesus kaa kyerɛɛ no dɛ: “Iribisa me dɛ, mubotum a? Hwɛ, obi a ɔwɔ gyedzi no, adze biara botum ayɛ yie ama no.”
24 Hɔ no ara na abofra no ne papa tseaa mu dɛ: “Mowɔ gyedzi! Boa me ma me gyedzi nyɛ kɛse!”
25 Aber a Jesus hun dɛ nyimpadɔm dze mbirika reba hɔn nkyɛn no, otwuuw sunsum fi no n’enyim, na ɔkaa kyerɛɛ no dɛ: “Ɔwo sunsum a ama abofra yi ayɛ mmum na tsiw, mehyɛ wo dɛ fi no mu pue, na mma nnkɔ no mu bio!”
26 Na sunsum no tseaa mu na ɔmaa abofra no ho wosoow mpɛn pii. Afei ofii no mu, na abofra no yɛɛ dɛ mbrɛ oewu. Ntsi nyimpa pii kaa dɛ: “Oewu!”
27 Naaso Jesus suoo ne nsamu maa no do, na ɔsoɛree gyinaa hɔ.
28 Iyi ekyir no ɔkɔr fie bi mu, na n’esuafo no bisaa no wɔ nsumaa mu dɛ: “Ɔyɛ dɛn ntsi na yeenntum enntu sunsum fi no?”
29 Nna ɔkaa kyerɛɛ hɔn dɛ: “Sunsum fi a ɔtse dɛm dze, mpaabɔ nkotsee na obotum etu no.”
30 Wofii hɔ na wɔkɛfaa Galilee, naaso nna ɔmmpɛ dɛ obiara bɛtse dɛ ɔaba hɔ,
31 osiandɛ nna ɔrekyerɛkyerɛ n’esuafo no. Asɛm a nna ɔreka kyerɛ hɔn nye dɛ: “Wobeyi nyimpa Ba no ahyɛ nyimpa nsa, na woeeku no. Naaso sɛ woku no mpo a, nda ebiasa ekyir no ɔbɔsoɛr.”
32 Ɔwɔ mu dɛ nna wɔnntse dza ɔreka no ase dze, naaso nna wosuro dɛ wobebisa no ho asɛm.
33 Afei wɔbaa Kapernaum. Na aber a ɔwɔ fie no mu no, obisaa hɔn dɛ: “Nna ebɛnadze na hom regye ho kyim wɔ kwan no mu no?”
34 Naaso wɔyɛɛ dzinn, osiandɛ wɔ kwan no mu no, nna wɔregye obi a ɔyɛ kɛse wɔ hɔn mu no ho kyim.
35 Ntsi ɔtsenaa ase na ɔfrɛɛ Duebien no na ɔkaa kyerɛɛ hɔn dɛ: “Obiara a ɔpɛ dɛ odzi kan no, ɔsɛ dɛ odzi ekyir koraa na ɔsom hom nyina.”
36 Nna ɔfrɛɛ abofra kakraba bi dze no begyinaa hɔn finimfin, na ɔdze ne nsa too no kɔn mu na ɔkaa kyerɛɛ hɔn dɛ:
37 “Obiara a me dzin ntsi ɔbɛgye mbofra nkakraba yi mu kor no, ɔagye mara so; na obiara a ɔgye me no, nnyɛ mankotsee na ɔgye me, mbom ɔgye Obi a ɔsomaa me no so.”
38 John kaa kyerɛɛ no dɛ: “Kyerɛkyerɛnyi, yehun dɛ obi dze wo dzin rutu esunsum fi, na yɛyɛɛ dɛ yebesiw no kwan osiandɛ onndzi hɛn ekyir.”
39 Naaso Jesus kaa dɛ: “Mma hom nnyɛ dɛ hom besiw no kwan, osiandɛ obiara nnyi hɔ a ɔdze me dzin bɛyɛ anwanwadze, na hɔ no ara obotwa noho aka mo ho asɛmbɔn.
40 Siantsir nye dɛ, obiara a ɔnnsoɛr nntsia hɛn no, ɔwɔ hɛn afa.
41 Na obiara a ɔbɛma hom nsu kɔɔpow kor ma hom anom osiandɛ hom yɛ Christ dze ntsi no, nokwar mese hom dɛ n’akatua rommbɔ no dabiarada.
42 Naaso obiara a ɔbɔto mbofra nkakraba a wɔwɔ gyedzi yi mu kor fintsidua no, sɛ wɔdze ewuyambo* a asoasopɔnkɔ twe sɛɛn no kɔn mu dze no kɔtoo po mu mpo a, nkyɛ oye.
43 “Sɛ wo nsa to wo fintsidua a, twa fi hɔ. Na oye dɛ ibedzi dzɛm na eenya nkwa, kyɛn dɛ edze wo nsa ebien bɔkɔ Gehenna* gya a onndum da no mu.
44 * ——
45 Na sɛ wo nan to wo fintsidua a, twa fi hɔ. Na oye dɛ ebɛyɛ apakye na eenya nkwa, kyɛn dɛ ewɔ anan ebien na wɔbɔtow wo akyen Gehenna.*
46 * ——
47 Na sɛ w’enyiwa kor to wo fintsidua a, tow kyen. Na oye dɛ edze enyiwa kor bɔkɔ Nyankopɔn n’Ahendzi no mu, kyɛn dɛ ewɔ enyiwa ebien na wɔbɔtow wo akyen Gehenna.*
48 Hɔ dze, nsaamaa a wɔwɔ hɔ no nnwu na ogya no so nndum da.
49 “Ɔsɛ dɛ wɔdze gya hyɛ nyimpa biara nkyen.
50 Nkyen dze oye, naaso sɛ nkyen ne dɛw fi mu a, wobesi dɛn ama wɔaayɛ dɛw bio? Hom nnya nkyen wɔ hom mu, na hom nye homho ntsena wɔ asomdwee mu.”
Ase Hɔ Nsɛm
^ Anaa “n’Ahenman; n’Aban.”
^ Anaa “Ntsi wɔdze asɛm no too hɔn akoma do.”
^ Anaa “ɔtwɛr ne se.”
^ Ɔkyerɛ “bobaa kɛse bi a nna wɔdze yam hwiit.”
^ Hwɛ Nkyerɛkyerɛmu Ɔfa hɔ.
^ Hwɛ Nke. A3.
^ Hwɛ Nkyerɛkyerɛmu Ɔfa hɔ.
^ Hwɛ Nke. A3.
^ Hwɛ Nkyerɛkyerɛmu Ɔfa hɔ.
