Matthew Asɛmpa 11:1-30
11 Aber a Jesus maa n’esuafo 12 no akwankyerɛ wiei no, osii mu dɛ ɔrekɛkyerɛkyerɛ na ɔaaka asɛm no wɔ hɔn nkurow ahorow mu.
2 Na aber a John da efiadze na ɔtsee ndwuma a Christ reyɛ no ho asɛm no, ɔsomaa n’esuafo no
3 dɛ wonkebisa no dɛ: “Ɔwo nye Obi A Ɔreba no, anaadɛ yɛnhwɛ obi fofor kwan?”
4 Jesus yii hɔn ano dɛ: “Hom nkɔ na hom nkɛka dza hom hu nye dza hom tse yi ho asɛm nkyerɛ John:
5 Seseiara enyifurafo ruhu adze na ebubuafo renantsew, wɔresa akwatafo yarba na hɔn a hɔn asowa esiw no retse asɛm, worinyan ewufo na wɔreka asɛmpa no kyerɛ ehiafo.
6 Enyigye nye obi a monnto no fintsidua.”
7 Na aber a John n’esuafo no rokɔ no, Jesus hyɛɛ ase kaa John no ho asɛm kyerɛɛ nyimpadɔm no dɛ: “Ebɛnadze na hom kɔr sar no do kɔhwɛe? Ndzɛmbir* a mframa rihim no anaa?
8 Ɔnodze, ebɛnadze na hom puei kɔhwɛe? Ɔbarimba a ofura tam pa anaa? Hwɛ, hɔn a wofura tam pa no, ahemfie na wɔwɔ.
9 Ntsi, ebɛnadze koraa ntsi na hom puei? Hom kɔhwɛɛ nkɔnhyɛnyi anaa? Nyew, ɔyɛ nkɔnhyɛnyi, na ɔkyɛn nkɔnhyɛnyi mpo.
10 Oyi nye obi a wɔakyerɛw noho asɛm dɛ: ‘Hwɛ, morosoma mo somafo ma oeedzi w’enyim kan, ɔno na obesiesie kwan mu ama wo!’
11 Nokwar mese hom dɛ, nyimpa a mbaa awo hɔn no mu biara nnyi hɔ a ɔyɛ kɛse sen John Onumanyi no, naaso obi a osuar koraa wɔ ɔsor Ahendzi no mu no yɛ kɛse sen no.
12 Ofitsi John Onumanyi no n’aber do besi ndɛ, nyimpa dze esi hɔn enyi do dɛ wɔbɛper akɔ ɔsor Ahendzi no mu, na hɔn a wɔyer hɔnho dzendzenndzen no, hɔn nsa ka.
13 Osiandɛ, Nkɔnhyɛfo no na Mbra no nyina hyɛɛ nkɔm besii John n’aber do.
14 Na sɛ hom bɛgye ato mu dze a, ɔno nye ‘Elijah a wɔkaa dɛ ɔbɛba no.’
15 Obi a ɔwɔ asowa no, ma ontsie.
16 “Woana na medze ebusuasantsen yi bɔtoto no ho? Wɔtse dɛ mbofra a wɔtsenatsena gua mu a wɔretsea mu aka akyerɛ hɔn anyɛnkofo dɛ:
17 ‘Yɛhɛɛn atɛntɛbɛn maa hom, naaso hom annsaw; yɛtseatseaa mu sui, naaso hom enndzi awerɛhow.’
18 Dɛmara so na John bae no oenndzidzi na ɔannom, eso nkorɔfo ka dɛ, ‘Ɔwɔ sunsum fi.’
19 Nyimpa Ba no aba, odzidzi na ɔnom, naaso nkorɔfo se, ‘Hwɛ, ɔbarimba tumfur kɔwensanyi a ɔfa atowgyefo nye ndzebɔnyɛfo nyɛnko.’ Naaso nyansa nam no ndwuma* do kyerɛ dɛ odzi bem.”*
20 Na ɔhyɛɛ ase twuuw nkurow a ɔyɛɛ anwanwadze pii wɔ mu no enyim osiandɛ woennu hɔnho.
21 Ɔkaa dɛ: “Chorazin due! Bethsaida due! Osiandɛ anwanwadze a wɔyɛɛ no wɔ hom mu no, sɛ wɔyɛɛ no wɔ Tyre na Sidon a, nkyɛ woenu hɔnho wɔ awerɛhow tam na nso mu dadaada.
22 Ntsi mereka akyerɛ hom dɛ, dza ɔbɛba hom do wɔ Atsɛmbu Da no, ɔbɛkyɛn Tyre na Sidon koraa.
23 Na ɔwo Capernaum, wɔbɛma wo do akɔ sor anaa? Wɔbɛbrɛ wo adze akɔ Adakamona mu; osiandɛ anwanwadze a wɔyɛɛ no wɔ wo mu no, sɛ wɔyɛɛ no wɔ Sodom a, nkyɛ besi ndɛ da yi ɔda ho ara wɔ hɔ.
24 Ntsi mereka akyerɛ hom dɛ, dza ɔbɛba hom do wɔ Atsɛmbu Da no, ɔbɛkyɛn Sodom koraa.
25 Dɛm aber no Jesus kaa dɛ: “Egya, ɔsor na asaase Wura, miyi wo ayɛw wɔ bagua mu, osiandɛ edze dɛm ndzɛmba yi esuma enyansafo na enyimdzefo na ada no edzi akyerɛ mbofra nkakraba.
26 Ampaara, O Egya, osiandɛ iyi nye kwan a ɔsɔ w’enyi.
27 M’Egya dze biribiara ahyɛ me nsa, na obiara nnyim Ɔba no yie gyedɛ Egya no; na dɛmara so na obiara nnyim Egya no yie gyedɛ Ɔba no nye obiara a Ɔba no pɛ dɛ ɔda Egya no edzi kyerɛ no no.
28 Hom a hom aberɛ na wɔasoa hom ndzesoa a ɔyɛ dur nyinara, hom mbra me nkyɛn, na mebɛma homho atɔ hom.
29 Hom mfa mo kɔndua nto hom do na hom nsua me, osiandɛ modwe na mebrɛ moho adze wɔ akoma mu, na homho bɔtɔ hom.*
30 Osiandɛ ɔnnyɛ dzen dɛ obi bɔsoa mo kɔndua, na m’adzesoa so yɛ har.”
Ase Hɔ Nsɛm
^ Efuw bi a ɔtse dɛ mfea anaa ahwer.
^ Anaa “nam dza ɔyɛ.”
^ Anaa “dzi konyim.”
^ Anaa “hom kra bɛgye n’ahom.”
