Matthew Asɛmpa 12:1-50
-
Jesus yɛ “Ahomgyeda no no Wura” (1-8)
-
Ɔbarimba bi a ne nsa adwedwe nyaa ayarsa (9-14)
-
Nyankopɔn n’akowaa a ɔdɔ no (15-21)
-
Ɔdze sunsum krɔnkrɔn tutuu esunsum fi (22-30)
-
Bɔn a wɔmmfa nnkyɛ (31, 32)
-
Dua n’aba na wɔdze bohu dua kor no (33-37)
-
Jonah n’asɛnkyerɛdze (38-42)
-
Sɛ sunsum bɔn san ba a (43-45)
-
Jesus ne maame nye no nuanom mbanyimfo (46-50)
12 Na dɛm aber no Jesus kɛfaa haban bi mu wɔ Ahomgyeda. Nna ɔkɔm dze n’esuafo no, ntsi wɔtsetseew ndɔbaa* no bi dzii.
2 Aber a Phariseefo no hun iyi no wɔkaa kyerɛɛ no dɛ: “Hwɛ! W’esuafo no reyɛ biribi a mbra mma kwan dɛ wɔyɛ no Ahomgyeda.”
3 Ɔkaa kyerɛɛ hɔn dɛ: “Ntsi hom nnkenkaan dza David yɛe, aber a ɔkɔm dzee ɔno nye mbarimba a nna wɔka no ho no?
4 Ɔkɔr Nyankopɔn ne fie na ɔnye mbarimba a wɔka no ho no kedzii paanoo a wɔdze ba Nyankopɔn n’enyim* no, nna mbra mma kwan dɛ ɔno anaa mbarimba a wɔka no ho no dzi bi gyedɛ asɔfo no nkotsee. Ntsi dɛm asɛm yi hom nnkenkanee a?
5 Anaaso hom nnkenkanee wɔ Mbra no mu dɛ sɛ odu Ahomgyeda a nna asɔfo a wɔwɔ asɔrfie hɔ no bu Ahomgyeda no do naaso wonndzi fɔ?
6 Na mereka akyerɛ hom dɛ obi a ɔso sen asɔrfie no wɔ ha.
7 Naaso sɛ hom tsee kyerɛwsɛm no a ɔka dɛ, ‘Mepɛ mbɔbɔrhu na nnyɛ afɔrbɔ’ no ase a, nkyɛ hom emmbu hɔn a asɛm biara nnyi hɔnho no fɔ.
8 Osiandɛ nyimpa Ba no nye Ahomgyeda no no Wura.”
9 Afei ofii hɔ na ɔkɔr hɔn nhyiamudan mu,
10 na hwɛ, ɔbarimba bi wɔ hɔ a ne nsa adwedwe.* Ntsi wobisaa Jesus dɛ, “Mbra ma kwan dɛ wɔsa yarba Ahomgyeda?” Wobisaa no dɛm mbrɛ ɔbɛyɛ a wɔbɔbɔ no sombo.
11 Nna ɔno so bisaa hɔn dɛ: “Hom mu woana na sɛ ɔwɔ oguan kortsee, na sɛ dɛm oguan no kɔtɔ amona mu wɔ Ahomgyeda a orunnsuo no mu na onnyi no mmfi mu?
12 Nyimpa ho nnhia koraa nnkyɛn oguan anaa? Dɛm ntsi mbra ma kwan dɛ obi bɛyɛ adze pa wɔ Ahomgyeda.”
13 Afei ɔkaa kyerɛɛ ɔbarimba no dɛ: “Tsen wo nsa.” Na ɔtsenee, na ne nsa no yɛɛ yie dɛ ne nsa kor no ara.
14 Naaso Phariseefo no puei na wɔkɔbɔɔ no ho pɔw dɛ woboku no.
15 Aber a Jesus hun no dɛm no, ofii hɔ kɔree. Na nyimpa pii so dzii n’ekyir, na ɔsaa hɔn nyinara yarba.
16 Naaso ɔbɔɔ hɔn ano dɛ mma wɔnnka no ho asɛm nnkyerɛ obiara,
17 mbrɛ ɔbɛyɛ a asɛm a wɔnam nkɔnhyɛnyi Isaiah do kae no bɛba mu dɛ:
18 “Hwɛ, m’akowaa a meyi no, obi a modɔ no na magye* no ato mu! Mubohue mo sunsum egu no do, na ɔbɛma amanaman no atse dza atsɛntsenenee kyerɛ ase yie.
19 Ɔnye obiara rennham na ɔrenntseatsea mu, na obiara so renntse ne ndze wɔ abɔntsen.
20 Ndzɛmbir* biara a no mu akom no orummbu mu. Na tam a ɔda kandzea mu a orupun wusiw no so orunndum no, kesi dɛ ɔbɛma atsɛntsenenee aba beebiara.
21 Ampa, amanaman dze hɔn enyi bɔto ne dzin do.”
22 Na wɔdze ɔbarimba bi a ɔwɔ sunsum fi a n’enyi efura na ɔyɛ mmum brɛɛ no, na ɔsaa no yarba. Ntsi ɔbarimba a ɔyɛ mmum no tumii kasae na ohun adze.
23 Iyi yɛɛ nyimpadɔm no nyinara nwanwa na wɔkaa dɛ: “Nnyɛ David ne Ba no nye yi bi a?”
24 Aber a Phariseefo no tsee iyi no, wɔkaa dɛ: “Ɔbarimba yi nam esunsum fi hɔn panyin Beelzebub* no tum do na otu esunsum fi.”
25 Aber a ohun hɔn adwen no, ɔkaa kyerɛɛ hɔn dɛ: “Ahendzi biara a ɔsoɛr tsia noho no, ɔbɛsɛɛ, na kurow anaa fie biara a ɔsoɛr tsia noho no rinngyina.
26 Dɛmara so na sɛ Satan tu Satan a, nna ɔrosoɛr etsia noho; na sɛ ɔba no dɛm a, n’ahendzi no besi dɛn egyina?
27 Na sɛ menam Beelzebub do na mutu esunsum fi a, ɔno woana na hom mba nam no do tu hɔn? Iyi ntsi na hom mba no bobu hom atsɛn no.
28 Naaso sɛ menam Nyankopɔn no sunsum do na mutu esunsum fi a, ɔno Nyankopɔn n’Ahendzi* no aba naaso hom ennhu.
29 Anaaso dɛ ɔbɛyɛ dɛn na obi akɔ ɔbarimba bi a noho yɛ dzen ne fie akɛsesaw ne ndzɛmba? Gyedɛ odzi kan kyekyer ɔbarimba no, ansaana oetum asesaw ndzɛmba a ɔwɔ ne fie hɔ akɔ.
30 Obiara a onnyi m’afa no soɛr tsia me, na obiara a ɔnnye me mmboaboa ano no hotse mu.
31 “Dɛm ntsi mereka akyerɛ hom dɛ, wɔdze bɔn nye ebususɛm biara bɛkyɛ nyimpa, naaso ebususɛm a otsia sunsum no dze, wɔremmfa nnkyɛ nyimpa.
32 Dɛ mfatoho no, obiara a ɔbɛka asɛm bi etsia nyimpa Ba no, wɔdze bɛkyɛ no; naaso obiara a ɔbɛkasa etsia sunsum krɔnkrɔn no dze, wɔremmfa nnkyɛ no wɔ wiadze yi* mu, na wɔremmfa nnkyɛ no wɔ wiadze a ɔreba no so mu.
33 Sɛ hom bɛma dua no ayɛ dua pa na n’aba so ayɛ aba pa a, hom nyɛ, naaso sɛ hom bɛma dua no aprɔw na n’aba so aprɔw a, hom nyɛ, osiandɛ dua biara n’aba na wɔdze bohu dua kor a ɔyɛ.
34 Nhurutsia mba, hom bɛyɛ dɛn aka nsɛm a ɔyɛ papa aber a hom yɛ ndzebɔnyɛfo? Osiandɛ dza woebu do wɔ akoma mu no na ano ka.
35 Nyimpa pa yi adze pa fi ndzɛmba pa a ɔaboaboa ano no mu, naaso nyimpa bɔn dze, oyi adze bɔn fi ndzɛmba bɔn a ɔaboaboa ano no mu.
36 Mereka akyerɛ hom dɛ nsɛnhun biara a nyimpa bɛka no, wobobu ho akontaa wɔ Atsɛmbu Da no;
37 osiandɛ wobegyina wo nsɛm do ebu wo bem anaa woebu wo fɔ.”
38 Afei akyerɛwfo no nye Phariseefo no mu binom kaa kyerɛɛ no dɛ: “Kyerɛkyerɛnyi, yɛpɛ dɛ eyɛ asɛnkyerɛdze bi ma yɛhwɛ.”
39 Ɔkaa kyerɛɛ hɔn dɛ: “Ebusuasantsen ndzebɔnyɛfo na awarsɛɛfo* kɔ do hwehwɛ asɛnkyerɛdze, naaso wɔremma hɔn asɛnkyerɛdze biara gyedɛ nkɔnhyɛnyi Jonah n’asɛnkyerɛdze no.
40 Na dɛ mbrɛ Jonah kedzii ndaansa wɔ nam kɛse no ne yamu adzekyee na adzesaa no, dɛmara so na nyimpa Ba no bedzi ndaansa wɔ asaase tsirmu adzekyee na adzesaa.
41 Atsɛmbu no mu no, nyimpa a wɔwɔ Nineveh no nye ebusuasantsen yi bɔsoɛr na woebu ebusuasantsen yi fɔ, osiandɛ aber a Jonah kaa asɛm no kyerɛɛ hɔn no, wonuu hɔnho. Naaso hwɛ, obi a ɔso sen Jonah wɔ ha.
42 Anaafo afamu hembaa no nye ebusuasantsen yi bɔsoɛr na oebu ebusuasantsen yi fɔ wɔ atsɛmbu no mu, osiandɛ ofi ekyirekyir tɔnn betsiee Solomon ne nyansaa. Naaso hwɛ, obi a ɔso sen Solomon wɔ ha.
43 “Sɛ sunsum bɔn* fi obi no mu a, okekyinkyin asaase wesee do kɔhwehwɛ beebi a ɔbɛgye n’ahom, na sɛ oennya bi a,
44 ɔka dɛ, ‘Mebɛsan akɔ me fie a mifii mu bae no mu,’ na sɛ okodu hɔ na ohu dɛ obiara nntse mu naaso wɔaprapra hɔ esiesie hɔ kama a,
45 ɔkɔ kɛfa esunsum fi esuon a wɔnnyɛ koraa kyɛn no ma wɔkɛtsena fie no mu. Sɛ ɔba no dɛm a, asetsena a nyimpa no bɔkɔ mu no bɛkyɛn dza nna ɔwɔ mu dada no. Dɛmara na ɔbɔto ebusuasantsen ndzebɔnyɛfo yi so.”
46 Aber a ogu do nye nyimpadɔm no rekasa no, ne maame nye no nuanom mbanyimfo begyinaa abowano dɛ wɔpɛ dɛ wɔnye no kasa.
47 Ntsi obi kaa kyerɛɛ no dɛ: “Hwɛ! Wo maame nye wo nuanom mbanyimfo gyina abowano, na wɔpɛ dɛ wɔnye wo kasa.”
48 Nna ɔkaa kyerɛɛ nyimpa no dɛ: “Woana nye me maame, na woananom nye mo nuanom mbanyimfo?”
49 Na ɔtseen ne nsa wɔ n’esuafo no do, na ɔkaa dɛ: “Hwɛ! Me maame nye mo nuanom mbanyimfo nye yi!
50 Na obiara a ɔyɛ dza m’Egya a ɔwɔ sor no pɛ no, ɔno nye mo nuabanyin nye mo nuabasia nye me maame.”
Ase Hɔ Nsɛm
^ Iyi yɛ eduadzewa bi a nna wodua wɔ tsetse Israel. Nna wotum dze yɛ paanoo.
^ Anaa “paanoo a wɔdze kyerɛ.”
^ Anaa “ne nsa ewu.”
^ Anaa “na me kra agye.”
^ Efuw bi a ɔtse dɛ mfea anaa ahwer.
^ Wɔdze dɛm dzin yi gyina hɔ ma Satan.
^ Anaa “Nyankopɔn n’Aban.”
^ Anaa “ndɛ mber yi.”
^ Kyerɛ dɛ, wonndzi Nyankopɔn nokwar.
^ Anaa “sunsum fi.”
