Matthew Asɛmpa 13:1-58
-
AHENDZI NO HO MFATOHO (1-52)
-
Okuafo no (1-9)
-
Siantsir a nna Jesus dze mfatoho kasa (10-17)
-
Mfatoho a ɔfa okuafo ho no ho nkyerɛkyerɛmu (18-23)
-
Hwiit na efuw no (24-30)
-
Sinapi aba na nkaweedur no (31-33)
-
Mfatoho a Jesus dze yɛɛ edwuma no maa nkɔnhyɛ bi baa mu (34, 35)
-
Hwiit na efuw ho mfatoho no ho nkyerɛkyerɛmu (36-43)
-
Egudze bi a wɔdze kesiei na ahondze pa (44-46)
-
Eboa no (47-50)
-
Egyapadze afofor na adadaw (51, 52)
-
-
Wɔpoow Jesus wɔ noara no kurow mu (53-58)
13 Dɛm da no Jesus fii fie hɔ kɛtsenaa mpoano.
2 Na nyimpadɔm pii botwaa no ho hyiae, ntsi ɔfoow hɛmba bi kɛtsenaa mu, na nyimpadɔm no nyinara gyinagyinaa mpoano hɔ.
3 Afei ɔdze mfatoho kyerɛkyerɛɛ hɔn ndzɛmba pii, ɔkaa dɛ: “Hwɛ, okuafo bi kɔr dɛ orukogu n’aba.
4 Na aber a orugu aba no, bi koguu kwan nkyɛn, na nnoma bae bɔsosɔwee.
5 Bi so koguu abotan do, hɔ dze nna dɛtse pii nnyi hɔ, na osiandɛ dɛtse pii nnyi hɔ ntsi ntsɛmara na ofifirii.
6 Naaso aber a ewia puei no, ɔhyee no, na osiandɛ onnyi ndwow ntsi, ɔkyenkyenee.
7 Bi so koguu nsoɛ mu, na nsoɛ no nyinii na omiaa no.
8 Na bi so koguu asaase pa mu, na ɔhyɛɛ ase soow aba. Bi soow mbɔho 100, bi mbɔho 60, na bi so mbɔho 30.
9 Obi a ɔwɔ asowa no, ma ontsie.”
10 Ntsi esuafo no baa ne nkyɛn bebisaa no dɛ: “Ebɛnadze ntsi na edze mfatoho kasa kyerɛ hɔn yi?”
11 Nna oyii hɔn ano dɛ: “Hom na wɔdze ama hom dɛ hom ntse esumasɛm krɔnkrɔn a ɔfa ɔsor Ahendzi ho no ase, naaso hɔn dze wɔmmfae mmaa hɔn.
12 Na obiara a ɔwɔ ntseasee no, Nyankopɔn bɛma no bi aka ho ma wɔaabor do; na obi a onnyi ntseasee no dze, ntseasee kakra mpo a ɔwɔ no, Nyankopɔn bɛgye efi ne nsamu.
13 Dɛm ntsi na medze mfatoho kasa kyerɛ hɔn no; osiandɛ wɔhwɛ a, wɔhwɛ no kwa, na wɔtse so a, wɔtse no kwa, na wɔnntse ase.
14 Na Isaiah no nkɔnhyɛ no aba mu wɔ hɔn do. Ɔkaa dɛ: ‘Tse dze hom bɛtse naaso hom renntse ase ara da, na hwɛ dze hom bɔhwɛ naaso hom runnhu ara da.
15 Osiandɛ ɔman yi hɔn akoma yɛ dzen, na wɔdze hɔn asowa tsiei naaso wɔammfa annyɛ edwuma, na wɔakatakata hɔn enyiwa, mbrɛ ɔbɛyɛ a wɔremmfa hɔn enyiwa nnhu koraa, na wɔremmfa hɔn asowa nntsie, na wɔremmfa hɔn akoma nntse ase; na wɔannsakyer amma mannsa hɔn yarba.’
16 “Naaso, hom enyi ngye dɛ hom enyiwa hu adze na hom asowa tse asɛm.
17 Nokwar mese hom dɛ, nna nkɔnhyɛfo nye atseneneefo pii pɛ dɛ wohu ndzɛmba a hom hu yi naaso woennhu, na wɔtse dza hom tse yi, naaso wɔanntse.
18 “Afei mfatoho a ɔfa ɔbarimba a okoguu aba ho no, hom ntsie dza ɔkyerɛ.
19 Obiara a ɔtse Ahendzi no ho asɛm na ɔnntse ase no, ɔbɔnfo no ba bohwim dza woduaa no wɔ n’akoma mu no kɔ; iyi nye dza okoguu kwan nkyɛn no.
20 Na dza okoguu abotan do nye obi a ɔtse asɛm no na ɔdze enyigye gye to mu ntsɛmara.
21 Naaso osiandɛ asɛm no anngye ndwow papa biara wɔ no mu ntsi, ɔtsena hɔ kakra, na sɛ asɛm no ntsi no ho hiahia no anaa wɔtan n’enyi a, ɔto no fintsidua ntsɛmara.
22 Na dza okoguu nsoɛ mu no, ɔno nye obi a ɔtse asɛm no, naaso wiadze yi* mu dadwen nye ahonyadze ndaadaa mia asɛm no ma dɛm ntsi ɔnnsow aba.
23 Na dza okoguu asaase pa mu no, ɔno nye obi a ɔtse asɛm no na ɔtse ase, na ɔsow aba ankasa. Bi sow mbɔho 100, bi mbɔho 60, na bi so mbɔho 30.”
24 Ɔmaa hɔn mfatoho fofor dɛ: “Ɔsor Ahendzi no tse dɛ ɔbarimba bi a oduaa hwiit wɔ n’ahaban mu.
25 Na aber a nyimpa dedae no, ne tamfo bae na oboduaa efuw wɔ hwiit no mu na ɔkɔree.
26 Na aber a hwiit no yii haban na ɔsoow aba no, nna efuw no so yii no ho edzi.
27 Ntsi ahaban no wura no no nkowaa bae bebisaa no dɛ, ‘Yewura o, ɔnnyɛ hwiit na iduae wɔ w’ahaban no mu bi a? Na efuw yi so fi hen?
28 Nna ɔkaa kyerɛɛ hɔn dɛ, ‘Ɔtamfo bi na ɔbɛyɛɛ dɛm.’ No nkowaa no bisaa no dɛ, ‘Ntsi epɛ dɛ yekotutu anaa?’
29 Ɔkaa kyerɛɛ hɔn dɛ, ‘Oho, osiandɛ annhwɛ a aber a hom rututu efuw no, hom botutu hwiit no so aka ho.
30 Hom mma ne nyinara mbɔ mu nnyin nkesi twaber, na sɛ twaber no so a, mebɛka akyerɛ hɔn a worutwa ndɔbaa no dɛ: Hom ndzi kan mboaboa efuw no ano na hom nkyekyer na hom nhyew no; ɔno ekyir no hom mboaboa hwiit no ano nkogu m’adzekoradan no mu.’”
31 Ɔsanee maa hɔn mfatoho fofor dɛ: “Ɔsor Ahendzi no tse dɛ sinapi aba a ɔbarimba bi fae koduae wɔ n’ahaban mu.
32 Nokwasɛm nye dɛ, ɔno na osuar kyɛn aba nyinara. Naaso sɛ onyin a ɔyɛ kɛse kyɛn nduadzewa nyinara, na ekyir yi ɔbɛyɛ dua, na wimu nnoma begyinagyina no nkorbata no do.”
33 Ɔsanee maa hɔn mfatoho fofor dɛ: “Ɔsor Ahendzi no tse dɛ nkaweedur bi a ɔbaa bi dze foraa isiam esusudze akɛse ebiasa ma ne nyinara kawee.”
34 Jesus dze mfatoho kyerɛkyerɛɛ nyimpadɔm no dɛm ndzɛmba yi nyinara. Nokwasɛm nye dɛ, ɔannkasa annkyerɛ hɔn a ɔannyɛ mfatoho,
35 ama asɛm a wɔnam nkɔnhyɛnyi no do kae no aaba mu. Ɔkaa dɛ: “Mubobue m’ano na medze mfatoho akasa; mebɛpaa mu aka nsɛm a woesuma fi ahyɛse.”*
36 Aber a ogyaa nyimpadɔm no kwan no, ɔkɔr fie. Na n’esuafo no baa ne nkyɛn bɛkaa kyerɛɛ no dɛ: “Kyerɛ hɛn haban no mu efuw ho mfatoho no ase.”
37 Ɔkaa kyerɛɛ hɔn dɛ: “Okuafo a oduaa hwiit no nye onyimpa Ba no;
38 haban no nye wiadze. Hwiit no nye Ahendzi no mba, na efuw no nye ɔbɔnfo no ne mba,
39 ɔtamfo a oduaa efuw no nye Abɔnsam. Twaber no nye wiadze* n’ewiei, na hɔn a wobotwa ndɔbaa no nye abɔfo.
40 Na dɛ mbrɛ wotutuu efuw no na wɔdze gya hyeew no no, dɛmara na ɔbɛyɛ wɔ wiadze* n’ewiei ber no mu so.
41 Onyimpa Ba no bɔsoma n’abɔfoe ma wɔaakɔboaboa biribiara a ɔto fintsidua nye hɔn a wɔyɛ ndzɛmba bɔn no ano efi n’Ahendzi no mu.
42 Na wɔbɔtow hɔn egu ogya fononoo a ɔredzɛw no mu. Hɔ na wobosu na wɔaaka hɔn se esi do dzendzenndzen.*
43 Dɛm aber no atseneneefo bɛhyerɛn paa dɛ ewia wɔ hɔn Egya n’Ahendzi no mu. Obi a ɔwɔ asowa no, ma ontsie.
44 “Ɔsor Ahendzi no tse dɛ egudze bi a wɔdze kesiee haban mu a ɔbarimba bi kohunii na ɔdze siei; na n’enyi gyee, ntsi ɔkɔree kɔtɔɔn dza ɔwɔ nyinara kɔtɔɔ dɛm asaase no.
45 “Afei so ɔsor Ahendzi no tse dɛ oguadzinyi bi a otutu akwan kɔhwehwɛ ahondze pa.
46 Aber a ohun ahondze pa kor a ɔsom bo no, ntsɛmara ɔkɔree kɔtɔɔn dza ɔwɔ nyinara na ɔkɔtɔe.
47 “Bio so ɔsor Ahendzi no tse dɛ eboa bi a wɔtowee guu po mu a ɔpaa nam ahorow nyinara bi.
48 Ber a ɔyɛɛ ma no, wɔtwee baa mpoano, na wɔtsenaa ase boaboaa dza oye no ano guu adze mu, na dza ɔnnyɛ no wɔtowee gui.
49 Dɛmara so na ɔbɛyɛ wɔ wiadze* n’ewiei ber no mu. Abɔfo bɔkɔ ekeyiyi nyimpa bɔn efi atseneneefo no mu,
50 na wɔbɔtow hɔn egu ogya fononoo a ɔredzɛw no mu. Hɔ na wobosu na wɔaaka hɔn se esi do dzendzenndzen.*
51 Afei obisaa hɔn dɛ: “Hom atse iyinom nyinara ase?” Woyii no ano dɛ: “Nyew.”
52 Nna ɔkaa kyerɛɛ hɔn dɛ: “Sɛ dɛm na ɔtse dze a, nna ɔno kyerɛkyerɛnyi biara a wɔakyerɛ no ɔsor Ahendzi* ho adze no, ɔtse dɛ fiewura bi a oyi ndzɛmba fi dan a ɔdze n’egyapadze sie mu no mu. Oyi ndzɛmba afofor na adadaw nyinara pue.”
53 Aber a Jesus yɛɛ mfatoho ahorow yi wiei no, ofii hɔ kɔree.
54 Na ɔbaa nankasa no kurow mu, na ɔhyɛɛ ase kyerɛkyerɛɛ hɔn wɔ hɔn nhyiamudan mu ma hɔn ho dwuruuw hɔn na wɔkaa dɛ: “Ɔbarimba yi nyaa nyansa na tum a ɔdze yɛ anwanwadze yi fii hen?
55 Ɔnnyɛ kapentanyi no ne ba no nye yi bi a? Ɔnnyɛ ne maame na wɔfrɛ no Mary no a? Na ɔnnyɛ no nuanom nye James, Joseph, Simon na Judas a?
56 Na nnyɛ ne nkyerɛbaa na hɔn nyinara nye hɛn wɔ ha yi a? Sɛ dɛm a, nna ɔno henfa na onyaa iyinom nyina fii?”
57 Ntsi iyi too hɔn fintsidua. Nna Jesus kaa kyerɛɛ hɔn dɛ: “Wodzi nkɔnhyɛnyi nyi wɔ beebiara, naaso nankasa no kurow mu anaa ne fie dze wonndzi no nyi.”
58 Na osiandɛ wonnyi gyedzi ntsi ɔannyɛ anwanwadze pii wɔ hɔ.
Ase Hɔ Nsɛm
^ Anaa “ndɛ mber yi.”
^ Obotum so akyerɛ, “wiadze ahyɛse.”
^ Anaa “ndɛ mber yi.”
^ Anaa “ndɛ mber yi.”
^ Kyerɛ dɛ, hɔn bo bofuw na hɔn enyidado nyina so bɛsa.
^ Anaa “ndɛ mber yi.”
^ Kyerɛ dɛ, hɔn bo bofuw na hɔn enyidado nyina so bɛsa.
^ Anaa “ɔsor Aban.”
