Matthew Asɛmpa 15:1-39
15 Na Phariseefo nye akyerɛwfo no fi Jerusalem baa Jesus hɔ bebisaa no dɛ:
2 “Ebɛnadze ntsi na w’esuafo no bu hɛn egyanom hɔn amambra do? Dɛ mfatoho no, sɛ woribedzidzi a wɔnnhohor hɔn nsa ho.”*
3 Ɔkaa kyerɛɛ hɔn dɛ: “Ebɛnadze ntsi na hom so hom bu Nyankopɔn ne mbrasɛm do osian hom amambra ntsi?
4 Dɛ mfatoho no, Nyankopɔn kaa dɛ, ‘Dzi wo maame na wo papa nyi,’ na ‘Obiara a ɔbɛkasa etsia ne maame anaa ne papa* no wonku no.’
5 Naaso hom ka dɛ, ‘Sɛ obi ka kyerɛ ne papa anaa ne maame dɛ: “Adze biara a mowɔ a nkyɛ mubotum dze aboa wo no mehyira do ama Nyankopɔn” a,
6 ɔnnsɛ dɛ odzi ne papa nyi koraa.’ Hom amambra ntsi hom dze Nyankopɔn n’asɛm ato nkyɛn.
7 Nyaatwemfo, ɔfata dɛ Isaiah hyɛɛ hom ho nkɔm dɛ:
8 ‘Ɔman yi dze hɔn ano na wɔdze dzi me nyi, naaso hɔn akoma dze wɔatwe efi me nkyɛn kɔ ekyirekyir.
9 Wɔsom me kwa, osiandɛ wɔkyerɛkyerɛ nyimpa ahyɛdze dɛ ɔyɛ Nyankopɔn ne nkyerɛkyerɛ.’”
10 Afei ɔfrɛɛ nyimpadɔm no baa ne nkyɛn na ɔkaa kyerɛɛ hɔn dɛ: “Hom ntsie na hom ntse ase:
11 Ɔnnyɛ dza ɔkɔ nyimpa n’anomu na ogu no ho fi, mbom dza ofi n’anomu ba no na ogu no ho fi.”
12 Afei esuafo no bae bebisaa no dɛ: “Inyim dɛ aber a Phariseefo no tsee dza ekae no, ɔtoo hɔn fintsidua?”
13 Nna ɔkaa kyerɛɛ hɔn dɛ: “Dua biara a ɔnnyɛ m’Egya a ɔwɔ sor no na oduae no, wobotu.
14 Hom ngyaa hɔn. Wɔyɛ akwankyerɛfo enyifurafo. Na sɛ nyifuranyi kyerɛ nyifuranyi kwan a, hɔn beenu nyinara bɔtɔ amona mu.”
15 Nna Peter kaa kyerɛɛ no dɛ: “Kyerɛkyerɛ mfatoho yi mu kyerɛ hɛn.”
16 Dɛm ntsi obisaa hɔn dɛ: “Hom so hom nnyae nntsee ase?
17 Ntsi hom nnyim dɛ biribiara a ɔkɔ nyimpa n’anomu no, okogu ne yafun mu, na ofi ne nyimpadua mu kogu tseafi mu anaa?
18 Naaso biribiara a ofi nyimpa n’anomu ba no, ofi n’akoma mu, na dɛm ndzɛmba no na ogu nyimpa ho fi.
19 Dɛ mfatoho no, ndzɛmba a ofi akoma mu ba no, bi nye adwembɔn, ewudzi, awarsɛɛ, edwamambɔ,* adzewia, dase a ɔnnyɛ nokwar,* nye ebususɛm.
20 Dɛm ndzɛmba yi na ogu nyimpa ho fi; na sɛ obi annhohor ne nsa ho na odzidzi a onngu no ho fi.”
21 Afei Jesus fii hɔ, na ɔkɔr Tyre na Sidon mantɔw no mu.
22 Na hwɛ, Finisianyi ɔbaa bi a ofi dɛm mantɔw no mu bae, na ɔtseatseaa mu serɛɛ no dɛ: “Ewuradze, David ne Ba, hu me mbɔbɔr na esunsum fi retseetsee me babaa paa.”
23 Naaso ɔannka hwee annkyerɛ no. Na n’esuafo no bae bɛserɛɛ no dɛ: “Ma ɔnkɔ, na tsea ara na ɔtseatsea mu dzi hɛn ekyir.”
24 Ɔkaa dɛ: “Wɔannsoma me wɔ obiara nkyɛn gyedɛ Israel fie nguan a wɔayew no.”
25 Naaso ɔbaa no bae bɔkotoow no, na ɔkaa dɛ: “Ewuradze, boa me!”
26 Nna ɔkaa kyerɛɛ no dɛ: “Ɔnnyɛ papa dɛ wɔdze mbofra hɔn paanoo bɛma mbɔdɔmba.”
27 Nna ɔbaa no kaa dɛ: “Nyew, Ewuradze, naaso nokwasɛm nye dɛ mbɔdɔmba no dzi mporoporoba a ofi hɔn wuranom pon do gu famu no bi.”
28 Nna Jesus kaa kyerɛɛ no dɛ: “Ao ɔbaa, wo gyedzi so. Dza epɛ no nyɛ hɔ mma wo.” Na dɛm aber no ara na ne babaa no ho tɔɔ no.
29 Na Jesus fii hɔ baa Galilee po no ho, na ɔfoow bepɔw no kɛtsenaa ase wɔ hɔ.
30 Afei nyimpadɔm pii baa ne nkyɛn, na wɔdze mbubuafo, hɔn a woedzi dzɛm, enyifurafo, mmum, nye ayarfo afofor pii brɛɛ no* na ɔsaa hɔn yarba.
31 Na aber a nyimpadɔm no hun dɛ mmum rekasa, hɔn a woedzi dzɛm no atse apɔw, ebubuafo renantsew na enyifurafo ruhu adze no, hɔn ho dwuruuw hɔn, na wɔhyɛɛ Israel Nyankopɔn enyimnyam.
32 Naaso Jesus frɛɛ n’esuafo no baa ne nkyɛn na ɔkaa kyerɛɛ hɔn dɛ: “Nyimpadɔm yi ho yɛ me mbɔbɔr, osiandɛ wɔabɛhyɛ me nkyɛn ndaansa nye yi na wonnyi hwee a wobedzi. Kɔm dze hɔn, na memmpɛ dɛ mibegya hɔn kwan ma wɔakɔ dɛmara,* osiandɛ annhwɛ a na woekotwitwa ahwe wɔ kwan mu.”
33 Nna esuafo no kaa kyerɛɛ no dɛ: “Ha mmbɛn kurow mu, ntsi henfa na yebenya paanoo a ɔbɔso dɛm nyimpadɔm beberebe yi?”
34 Nna Jesus bisaa hɔn dɛ: “Paanoo ahen na hom wɔ?” Woyii no ano dɛ: “Esuon, nye nam nketsenketse kakraabi.”
35 Ntsi ɔkaa kyerɛɛ nyimpadɔm no dɛ wɔntsenatsena famu, na ɔno ekyir no,
36 ɔfaa paanoo esuon no nye nam no, na ɔdaa ase. Afei obubuu mu na ɔdze maa esuafo no, na esuafo no so kyekyɛe maa nyimpadɔm no.
37 Na hɔn nyinara dzidzii mee, na wɔboaboaa dza ɔkae no ano no, ɔyɛɛ nkɛntsɛn akɛse esuon amaama.
38 Mbarimba 4,000 na wodzii edziban no, wɔannkan mbaa nye mbofraba annka ho.
39 Afei ogyaa nyimpadɔm no kwan ma wɔkɔree, na ɔkɛtsenaa hɛmba no mu na ɔbaa Magadan mantɔw no mu.
Ase Hɔ Nsɛm
^ Nna Phariseefo no na Jewfo binom hohor hɔn nsa ho dɛ mbrɛ Jewfo hɔn amambra tse.
^ Anaa “Obiara a obogu ne maame anaa ne papa n’enyim ase pɔtɔɔ.”
^ Greek, porneia.
^ Anaa “dasewia.”
^ Anaa “boguu n’ananadze.”
^ Anaa “ma wɔdze kɔm akɔ.”
