Matthew Asɛmpa 16:1-28
16 Na Phariseefo nye Sadduceefo no baa ne nkyɛn. Nna wɔpɛ dɛ wɔsɔ no hwɛ, ntsi wɔkaa kyerɛɛ no dɛ ɔnyɛ asɛnkyerɛdze bi a ofi sor nkyerɛ hɔn.
2 Nna ɔkaa kyerɛɛ hɔn dɛ: “Sɛ odu ewimbir a hom ka dɛ, ‘wimu bɛtsew, osiandɛ wimu ayɛ kɔɔ.’
3 Na odu anapa so a hom ka dɛ, ‘ndɛ wimu bɛyɛ awɔw na nsu bɔtɔ, osiandɛ wimu ayɛ kɔɔ na woemuna.’* Sɛ hom hwɛ wimu a hom tum hu dza obesi, naaso mber no ho asɛnkyerɛdze dze, hom nntum nnkyerɛ ase.
4 Ebusuasantsen ndzebɔnyɛfo na awarsɛɛfo* kɔ do hwehwɛ asɛnkyerɛdze, naaso wɔremma hɔn asɛnkyerɛdze biara gyedɛ Jonah n’asɛnkyerɛdze no.” Ɔkaa dɛm no, ogyaa hɔn hɔ kɔree.
5 Afei esuafo no twae kɔr nsu no ekyir, na hɔn werɛ fiir dɛ wɔbɛfa paanoo.
6 Jesus kaa kyerɛɛ hɔn dɛ: “Hom mma hom enyi nda hɔ na hom nhwɛ homho yie wɔ Phariseefo nye Sadduceefo no hɔn nkaweedur ho.”
7 Ntsi wɔnye hɔnho susuu asɛm yi ho dɛ: “Yɛammfa paanoo biara ammba.”
8 Jesus hun no dɛm no, ɔkaa dɛ: “Ebɛnadze ntsi na hom rodwen paanoo a hom ammfa ammba ho? Hom a hom gyedzi suar.
9 Ntsi hom nnyae nntsee ase? Hom nnkaa paanoo enum a yɛdze maa nyimpa 5,000 ma wodzii nye nkɛntsɛn dodow a ɔkae ma hom sesawee no a?
10 Anaa paanoo esuon a yɛdze maa nyimpa 4,000 nye nkɛntsɛn akɛse dodow a ɔkae ma hom sesawee no a?
11 Ntsi ɔbaa no dɛn na hom ennhu dɛ ɔnnyɛ paanoo ho asɛm na mereka, na mbom Phariseefo nye Sadduceefo no hɔn nkaweedur na mereka dɛ hom nhwɛ homho yie wɔ ho no?”
12 Nna wohun dɛ ɔnnyɛ nkaweedur a wɔdze yɛ paanoo ho asɛm na ɔreka dɛ wɔnhwɛ hɔnho yie wɔ ho, mbom ɔyɛ Phariseefo na Sadduceefo no hɔn nkyerɛkyerɛ ho.
13 Aber a Jesus baa Caesarea Philippi mantɔw no mu no, obisaa n’esuafo no dɛ: “Nkorɔfo ka dɛ nyimpa Ba no nye woana?”
14 Woyii no ano dɛ: “Binom ka dɛ ɔyɛ John Onumanyi no, binom so se ɔyɛ Elijah, na binom so ka dɛ ɔyɛ Jeremiah anaa nkɔnhyɛfo no hɔn mu kor.”
15 Nna obisaa hɔn dɛ: “Hom so ɛ, hom ka dɛ meyɛ woana?”
16 Simon Peter yii no ano dɛ: “Ɔwo nye Christ no, Nyankopɔn tseasefo no ne Ba no.”
17 Nna Jesus see no dɛ: “Simon, Jonah ne ba, ma w’enyiwa ngye, osiandɛ ɔnnyɛ honam na bɔgya* na oyii kyerɛɛ wo, na mbom m’Egya a ɔwɔ sor no na oyii kyerɛɛ wo.
18 Afei so mereka akyerɛ wo dɛ: Ɔwo nye Peter, na ɔbotan yi do na mibesi m’asafo, na Adakamona* abow rinndzi do konyim.
19 Mebɛma wo ɔsor Ahendzi no ne nsaafee, na adze biara a ebɛkyekyer wɔ asaase yi do no, ɔbɛyɛ biribi a woedzi kan akyekyer no wɔ sor dada, na adze biara a ebɛsan no wɔ asaase yi do no, ɔbɛyɛ biribi a woedzi kan asan no wɔ sor dada.”
20 Afei ɔbɔɔ esuafo no ano dɛ mma wɔmmbɔ do nnkyerɛ obiara dɛ ɔno nye Christ no.
21 Na ofitsi dɛm aber no rokɔ no, Jesus hyɛɛ ase kyerɛkyerɛɛ mu kyerɛɛ n’esuafo no dɛ, ɔsɛ dɛ ɔkɔ Jerusalem na okohu amandze pii wɔ mpanyimfo no nye asɔfo mpanyimfo no nye akyerɛwfo no nsa ano. Na woboku no, na da a otsia ebiasa no woeenyan no.
22 Ɔkaa dɛm no Peter frɛɛ no kɔr nkyɛn na ɔhyɛɛ ase twuuw n’enyim dɛ: “Ewuradze, ka asɛm papa ma woho; iyi remmba wo do da.”
23 Naaso ɔdaan noho kaa kyerɛɛ Peter dɛ: “Fi mo do kɔ, Satan! Eyɛ fintsidua ma me, osiandɛ enndwen Nyankopɔn adwen, mbom edwen nyimpa adwen.”
24 Afei Jesus kaa kyerɛɛ n’esuafo no dɛ: “Sɛ obi pɛ dɛ odzi m’ekyir a, ɔnnsɛ dɛ ɔyɛ dza noara pɛ, mbom ɔsɛ dɛ ɔfa n’asɛndua na ɔkɔ do dzi m’ekyir.
25 Na obiara a ɔpɛ dɛ ɔbɔ no nkwa* ho ban no, obefi ne nsa. Naaso obiara a osian emi ntsi ɔbɔhwer no nkwa no, ne nsa bɛka.
26 Sɛ nyimpa nya wiadze yi mu ndzɛmba nyinara, na sɛ ɔhwer no nkwa a, ebɛn mfaso paa na obenya? Anaaso dɛ ebɛnadze na nyimpa wɔ a obotum dze asesa no nkwa?*
27 Na nyimpa Ba no bɛba wɔ n’Egya n’enyimnyam mu a n’abɔfoe ka no ho, na obotua obiara kaw dɛ mbrɛ no ndwuma tse.
28 Nokwar mese hom dɛ hɔn a wogyinagyina ha yi mu bi wɔ hɔ a wɔrennka owu nnhwɛ koraa kesi dɛ wobohu dɛ nyimpa Ba no reba wɔ n’Ahendzi mu.”
Ase Hɔ Nsɛm
^ Palestine nsaase do no, sɛ nna wimu yɛ kɔɔ anapa a, nna obotum akyerɛ dɛ ehum botu, ɔbɛyɛ awɔw anaa nsu bɔtɔ.
^ Kyerɛ dɛ, wonndzi Nyankopɔn nokwar.
^ Anaa “osiandɛ ɔnnyɛ nyimpa.”
^ Anaa “Hades.”
^ Anaa “ne kra.”
^ Anaa “ne kra.”
