Matthew Asɛmpa 17:1-27
17 Nda esia ekyir no, Jesus faa Peter nye James na no nua John na ɔnye hɔn nkotsee kɔr bepɔw tsentsenntsen bi do.
2 Na ɔsesae wɔ hɔn enyim; na n’enyim hyerɛɛn dɛ ewia, na n’atar ngugudo yɛɛ hyerɛnn* dɛ kan.
3 Na hwɛ, Moses na Elijah yii hɔnho edzi kyerɛɛ hɔn. Nna wɔnye Jesus rekasa.
4 Afei Peter kaa kyerɛɛ Jesus dɛ: “Ewuradze, oye dɛ yɛwɔ ha. Sɛ epɛ a, mibesi ntamadan ebiasa wɔ ha. Wodze kor, Moses nedze kor, nna Elijah so nedze kor.”
5 Aber a ogu do rekasa no, hwɛ, mununkum hyɛnhyɛn bi bɛkataa hɔn do. Na hwɛ, ndze bi fi mununkum no mu kaa dɛ: “Oyi nye me Ba a modɔ no, na magye no ato mu. Hom ntsie no.”
6 Aber a esuafo no tsee no, hɔn akoma tui papaapa na wɔdze hɔn enyim butubutuuw famu.
7 Afei Jesus baa hɔn nkyɛn bosusuoo hɔn mu, na ɔkaa kyerɛɛ hɔn dɛ: “Hom nsoɛr. Mma hom akoma nntu.”
8 Aber a wɔmaa hɔn tsir do no, woennhu obiara gyedɛ Jesus nkotsee.
9 Na aber a worisian bepɔw no, Jesus kaa kyerɛɛ hɔn dɛ: “Mma hom nnka enyido-adzehu no ho asɛm nnkyerɛ obiara kesi dɛ wobenyan nyimpa Ba no efi ewufo mu.”
10 Naaso esuafo no bisaa no dɛ: “Sɛ dɛm a, nna ɔno ebɛnadze ntsi na akyerɛwfo no ka dɛ ɔsɛ dɛ Elijah dzi kan ba ansaana no?”
11 Nna oyii hɔn ano dɛ: “Ɔyɛ nokwar dɛ Elijah reba, na ɔbɔtoto ndzɛmba nyinara yie.
12 Naaso mereka akyerɛ hom dɛ Elijah aba dada, naaso woennhu dɛ ɔyɛ ɔno, na wɔyɛɛ no dza wɔpɛ biara. Dɛmara so na nyimpa Ba no bohu amandze wɔ hɔn nsa ano.”
13 Nna esuafo no hun dɛ ɔyɛ John Onumanyi no ho asɛm na ɔreka kyerɛ hɔn no.
14 Aber a wɔbaa nyimpadɔm no nkyɛn no, ɔbarimba bi baa ne nkyɛn bobuu ntwɛr wɔ n’enyim, na ɔkaa dɛ:
15 “Ewuradze, hu me babanyin yi mbɔbɔr na ɔyar paa. Otwa yarba wɔ no do.* Ɔtaa tɔ gya mu na ɔtaa so tɔ nsu mu.
16 Medze no brɛɛ w’esuafo no, naaso woenntum annsa no yarba.”
17 Jesus kaa dɛ: “Ao ebusuasantsen ndzebɔnyɛfo a hom nnyi gyedzi, menye hom ntsena nkodu dabɛn? Na minnya hom ho abotar nkesi dabɛn? Fa no brɛ me wɔ ha.”
18 Afei Jesus twuuw sunsum fi no enyim, na ofii no mu, na amonmu hɔ ara banyimba no noho tɔɔ no.
19 Na esuafo no baa Jesus ne nkyɛn wɔ nsumaa mu bebisaa no dɛ: “Ebɛnadze ntsi na yeenntum enntu sunsum fi no?”
20 Nna ɔkaa kyerɛɛ hɔn dɛ: “Hom gyedzi suar ntsi a. Nokwar mese hom dɛ, sɛ hom wɔ gyedzi a ne kɛse tse dɛ sinapi aba a, nkyɛ hom bɛka akyerɛ bepɔw yi dɛ, ‘Tutu fi ha kɔ noho,’ na obotutu, na biribiara nnyi hɔ a hom runntum nnyɛ.”
21— —
22 Ɔyɛ aber a wohyiaa mu wɔ Galilee no na Jesus kaa kyerɛɛ hɔn dɛ: “Wobeyi nyimpa Ba no ahyɛ nyimpa nsa,
23 na woboku no, na da a otsia ebiasa no wobenyan no.” Na hɔn werɛ hoow papaapa.
24 Aber a wɔbaa Capernaum no, hɔn a wɔgyegye drakma ebien tow no baa Peter ne nkyɛn na wobisaa no dɛ: “Hom kyerɛkyerɛnyi no tua drakma ebien tow no anaa?”
25 Ɔkaa dɛ: “Nyew.” Naaso aber a Peter baa fie hɔ no, Jesus dzii kan bisaa no dɛ: “Simon, edwen ho dɛn? Asaase do ahemfo gyegye hɔn tow ahorow no fi woananom hɔ? Hɔn mba hɔ anaa nyimpa afofor hɔ?”
26 Aber a ɔkaa dɛ nyimpa afofor hɔ no, Jesus kaa kyerɛɛ no dɛ: “Sɛ dɛm dze a, nna ɔno onnyi dɛ mba no tua tow.
27 Naaso mbrɛ ɔbɛyɛ a yɛronnto hɔn fintsidua ntsi, kɔtow nkwaba wɔ po no mu, na nam a ibedzi kan apa no no, sɛ ibue n’anomu a ibohu dwetɛ sika* wɔ mu. Yi na fa kotua ma emi na ɔwo.”
Ase Hɔ Nsɛm
^ Anaa “yɛɛ fitaa.”
^ Kyerɛ dɛ, Otwa ehim.
^ Greek, “stater.” Wosusu dɛ ɔyɛ drakma anan.
