Matthew Asɛmpa 19:1-30
19 Aber a Jesus kaa nsɛm yi wiei no, ofii Galilee baa Judea hye do wɔ Jordan Esutsen no n’ekyir.
2 Na nyimpadɔm bi so tui dzii n’ekyir, na ɔsaa hɔn yarba wɔ hɔ.
3 Na Phariseefo no yɛɛ hɔn adwen dɛ wɔrobɔsɔ no ahwɛ, ntsi wɔbaa ne nkyɛn bebisaa no dɛ: “Mbra ma kwan dɛ asɛm biara ntsi ɔbarimba bi gyaa ne yer anaa?”
4 Oyii hɔn ano dɛ: “Hom nnkenkaan dɛ obi a ɔbɔɔ hɔn ahyɛse no, ɔyɛɛ hɔn ɔbarimba na ɔbaa,
5 na ɔkaa dɛ: ‘Iyi ntsi na ɔbarimba begya ne papa na ne maame hɔ na ɔdze noho akɛfam ne yer ho, na hɔn beenu no ayɛ honankor’?
6 Dɛm ntsi wɔnnda ho nnyɛ beenu bio, mbom wɔyɛ honankor. Ntsi dza Nyankopɔn aka abɔ mu no, mma nyimpa biara nntsetsew mu.”
7 Wobisaa no dɛ: “Nna ɔnodze, ebɛnadze ntsi na Moses kaa dɛ obi botum dze awargyaa krataa ama ne yer dze egyaa no awar no?”
8 Nna oyii hɔn ano dɛ: “Hom akoma dzen ntsi na Moses kaa dɛ hom botum egyaa hom yernom no. Naaso ahyɛse no dze nna ɔnntse dɛm.
9 Mereka akyerɛ hom dɛ, sɛ ɔnnyɛ edwamambɔ* ntsi na sɛ obi gyaa ne yer kɔwar fofor a ɔasɛɛ awar.”
10 Esuafo no kaa kyerɛɛ no dɛ: “Sɛ dɛm na asɛm no tse wɔ ɔbarimba nye ne yer ntamu dze a, nna ɔno sɛ obi annwar a nkyɛ oye o.”
11 Ɔkaa kyerɛɛ hɔn dɛ: “Nnyɛ nyimpa nyinara na wotum yɛ dɛm, gyedɛ hɔn a wɔwɔ akyɛdze no nkotsee.
12 Nyimpa binom wɔ hɔ a worunntum nnwar osiandɛ dɛmara na wɔwoo hɔn, binom so wɔ hɔ a osiandɛ nyimpa edzi hɔn dzɛm ntsi wɔnnwar, na binom so wɔ hɔ a wɔnnwar osian ɔsor Ahendzi no ntsi. Obiara a obotum ayɛ dɛm no, ma ɔnyɛ.”
13 Afei wɔdze mbofra nkakraba brɛɛ no dɛ ɔmfa ne nsa ngu hɔn do na ɔmbɔ mpaa mma hɔn, naaso esuafo no twuuw hɔn enyim.
14 Nna Jesus kaa kyerɛɛ hɔn dɛ: “Hom mma mbofra nkakraba no kwan ma wɔmbra me nkyɛn, mma hom nnsiw hɔn kwan, na hɔn a wɔtse dɛm na ɔsor Ahendzi no yɛ hɔndze.”
15 Na ɔdze ne nsa guu hɔn do, na ofii hɔ kɔree.
16 Na hwɛ, obi baa ne nkyɛn bebisaa no dɛ: “Kyerɛkyerɛnyi, ebɛn adze papa na menyɛ ama meenya onnyiewiei nkwa?”
17 Ɔkaa kyerɛɛ no dɛ: “Ebɛnadze ntsi na ibisa me dza ɔyɛ papa ho asɛm? Ɔbaako na ɔyɛ papa. Naaso sɛ epɛ dɛ inya nkwa a, kɔ do ara dzi mbransɛm no do.”
18 Obisaa no dɛ: “No mu dza ɔwɔ hen?” Jesus kaa kyerɛɛ no dɛ: “Mma nndzi ewu, mma nnsɛɛ awar, mma nnwia adze, mma nndzi dase a ɔnnyɛ nokwar,*
19 dzi wo maame na wo papa nyi, na dɔ wo nyɛnko dɛ wankasa woho.”
20 Aberantsɛ no kaa kyerɛɛ no dɛ: “Iyinom nyinara midzi do. Ebɛnadze bio na wɔaka a ɔsɛ dɛ meyɛ?”
21 Jesus kaa kyerɛɛ no dɛ: “Sɛ epɛ dɛ idzi mu a, kɔtɔn dza ewɔ no na fa ma ehiafo, na ibenya egyapadze wɔ sor; na bra bedzi m’ekyir.”
22 Aber a aberantsɛ no tsee asɛm yi no, ɔdze awerɛhow kɔree, osiandɛ nna ɔwɔ egyapadze beberee.
23 Nna Jesus kaa kyerɛɛ n’esuafo no dɛ: “Nokwar mese hom dɛ ɔbɛyɛ dzen ama osikanyi dɛ ɔbɔkɔ ɔsor Ahenman no mu.
24 Mereka akyerɛ hom bio dɛ, ɔyɛ mberɛw ma efupɔnkɔ dɛ ɔbɛfa pandze n’enyiwa mu kyɛn dɛ osikanyi bɔkɔ Nyankopɔn n’Ahendzi no mu.”
25 Aber a esuafo no tsee dɛm no, ɔyɛɛ hɔn nwanwa paa, ntsi wobisaa dɛ: “Woana koraa na wobotum agye no nkwa?”
26 Jesus hwɛɛ hɔn dzinn na ɔkaa kyerɛɛ hɔn dɛ: “Nyimpa afamu dze iyi runntum nnyɛ yie, naaso wɔ Nyankopɔn afamu dze, adze nyinara botum ayɛ yie.”
27 Nna Peter bisaa no dɛ: “Hwɛ, yeegya ndzɛmba nyina hɔ ebedzi w’ekyir. Ebɛnadze na yebenya?”
28 Jesus kaa kyerɛɛ hɔn dɛ: “Nokwar mese hom dɛ, sɛ wɔyɛ ndzɛmba fofor, na nyimpa Ba no tsena n’enyimnyam ahengua no do a, hom a hom dzi m’ekyir yi bɛtsena nhengua 12 do ebu Israel mbusuakuw 12 no atsɛn.
29 Na obiara a osian me dzin ntsi oegya fie, anaa enuanom mbanyimfo, anaa enuanom mbasiafo, anaa papa, anaa maame, anaa mba, anaa nsaase no, obenya no mbɔho ɔha na oeenya onnyiewiei nkwa so aka ho.
30 “Naaso edzikamfo pii bɛka ekyir, na hɔn a wɔaka ekyir no ebedzi kan.”
