Matthew Asɛmpa 2:1-23
2 Aber a wɔwoo Jesus wɔ Bethlehem a ɔwɔ Judea no, nna Herod na ɔyɛ ɔhen. Na hwɛ, nworaba mu ahwɛfo* bi fi Boka baa Jerusalem,
2 na wobisaa dɛ: “Henfa na Jewfo hɔn hen no a wɔawo no no wɔ? Yehun no nworaba aber a nna yɛwɔ Boka no, ntsi yɛaba dɛ yɛrobɔkotow no.”
3 Aber a Ɔhen Herod tsee dɛm asɛm yi no, n’akoma tui, na hɔn a wɔwɔ Jerusalem nyinara so hɔn akoma tui.
4 Ntsi Herod frɛfrɛɛ asɔfo mpanyimfo nye akyerɛwfo no nyinara boaa ano, na obisaa hɔn beebi a wɔbɔwo Christ* no.
5 Na wɔkaa kyerɛɛ no dɛ: “Ɔyɛ Bethlehem a ɔwɔ Judea, osiandɛ wɔnam nkɔnhyɛnyi no do akyerɛw dɛ:
6 ‘Na ɔwo Bethlehem a ewɔ Judah asaase do, ennyɛ kurow kakraba wɔ Judah asafohemfo mu koraa, osiandɛ wo mu na ɔkandzifo bi befi aba. Ɔno na ɔbɔhwɛ me man Israel do.’”
7 Afei Herod frɛɛ nworaba mu ahwɛfo no wɔ nsumaa mu, na ɔtɔɔ no bo ara bisaa hɔn ber a wohun nworaba no.
8 Iyi ekyir no ɔsomaa hɔn wɔ Bethlehem na ɔkaa kyerɛɛ hɔn dɛ: “Hom nkɔhwehwɛ abofra kakraba no yie, na sɛ hom hu no a, hom mbɛka nkyerɛ me na mara so monkɔkotow no bi.”
9 Aber a wotsiee ɔhen no n’asɛm no wiei no, wosii mu kɔree, na hwɛ, nworaba no a wohunii wɔ Boka no dzii hɔn enyim araa kegyinaa beebi a abofra kakraba no wɔ no.
10 Na aber a wohun dɛ nworaba no egyina no, wodzii ehurusi kɛsenara.
11 Na wɔkɔr fie no mu no, wohun abofra kakraba no nye ne maame Mary, na wɔbɔɔ hɔn mu adze kotoow no. Woyii sika kɔkɔɔ, ehyɛ na mɛɛr fii hɔn ndzɛmba mu dze kyɛɛ abofra no.
12 Naaso Nyankopɔn bɔɔ hɔn kɔkɔ wɔ adaaso mu dɛ mma wɔnnsan nnkɔ Herod hɔ, ntsi wɔfaa beebi fofor kɔr hɔn kurow mu.
13 Wɔkɔree no ekyir no, hwɛ, Jehovah no bɔfoe yii noho edzi kyerɛɛ Joseph wɔ adaaso mu, na ɔkaa kyerɛɛ no dɛ: “Soɛr, fa abofra kakraba no na ne maame, na hom nguan nkɔ Egypt, na hom ntsena hɔ nkesi dɛ mebɛka akyerɛ hom dɛ hom mfi hɔ, osiandɛ Herod robɔhwehwɛ abofra kakraba no eku no.”
14 Ntsi Joseph soɛɛr anafua na ɔfaa abofra kakraba no nye ne maame na wosii mu kɔr Egypt.
15 Na wɔtsenaa hɔ araa kesii dɛ Herod wui. Iyi maa asɛm a Jehovah nam no nkɔnhyɛnyi do kae no baa mu. Ɔkaa dɛ: “Mefrɛɛ me ba fii Egypt.”
16 Aber a Herod hun dɛ nworaba mu ahwɛfo no adaadaa no no, no bo fuuw paa. Ntsi ɔsomae ma wokokunkum mbanyimba a wɔwɔ Bethlehem nye nkurow nkurow a ɔbembɛn hɔ no nyinara mu, ofi hɔn a wɔawo hɔn fofor do araa kesi hɔn a woedzi mfe ebien do. Dza nworaba mu ahwɛfo no kae no na ogyinaa do dze n’adwen buu dɛ abofra no edzi mfe bi dɛm.
17 Iyi maa asɛm a wɔnam nkɔnhyɛnyi Jeremiah do kae no baa mu. Ɔkaa dɛ:
18 “Wɔtsee ndze bi wɔ Rama, osu na nkekamu dzendzenndzen. Nna ɔyɛ Rachel a orusu ne mba. Nna ɔmmpen koraa dɛ wɔbɛkyekye no werɛ, osiandɛ nna ne mba no nnyi hɔ bio.”
19 Aber a Herod wui no, hwɛ, Jehovah no bɔfoe yii noho edzi kyerɛɛ Joseph wɔ adaaso mu wɔ Egypt,
20 na ɔkaa kyerɛɛ no dɛ: “Soɛr, fa abofra kakraba no na ne maame na hom nsan nkɔ Israel asaase do, osiandɛ hɔn a wɔrohwehwɛ abofra kakraba no eku no no* nyinara ewuwu.”
21 Ntsi ɔsoɛree faa abofra kakraba no nye ne maame, na wɔkɔr Israel asaase do.
22 Naaso aber a ɔtsee dɛ Arkelaus na oridzi ne papa Herod n’adze wɔ Judea no, nna osuro dɛ ɔbɔkɔ hɔ. Bio so, Nyankopɔn bɔɔ no kɔkɔ wɔ adaaso mu, ntsi ɔannkɔ hɔ, mbom ɔkɔr Galilee mantɔw mu.
23 Na ɔkɛtsenaa kurow bi a wɔfrɛ no Nazareth mu, ama asɛm a wɔnam nkɔnhyɛfo no do kae no aaba mu dɛ: “Wɔbɛfrɛ no Nazarethnyi.”*
Ase Hɔ Nsɛm
^ Anaa “hɔn a wɔhwɛ nworaba mu a wotum ka dza obesi.”
^ Anaa “Messiah; Nyia Wɔasera No.”
^ Greek, “wɔrohwehwɛ abofra kakraba no ne kra no.”
^ Ɔbɛyɛ dɛ ofi Hebrew kasafua “fefɛw” mu.
