Matthew Asɛmpa 21:1-46
21 Aber a wɔbɛɛn Jerusalem na wodur Bethphage a ɔwɔ Ngodua Bepɔw no do no, Jesus somaa esuafo beenu,
2 na ɔkaa kyerɛɛ hɔn dɛ: “Hom nkɔ ekuraase a hom enyi tua yi mu, na sɛ hom du hɔ ara pɛ a hom bohu asoasopɔnkɔ a wɔamontan no nye ne ba. Hom nsan hɔn na hom mfa hɔn mbrɛ me.
3 Na sɛ obi bisa ho asɛm a hom nka dɛ, ‘Ewuradze hia hɔn.’ Na ntsɛmara ɔdze hɔn bɛma hom.”
4 Nokwasɛm nye dɛ iyi nyinara sii ama asɛm a wɔnam nkɔnhyɛnyi no do kae no aaba mu. Ɔkaa dɛ:
5 “Hom nka nkyerɛ Zion babaa dɛ: ‘Hwɛ! Wo hen reba wo nkyɛn, ɔdwe na ɔtsena asoasopɔnkɔ do, nyew ɔtsena asoasopɔnkɔ a wɔdze no soasoa ndzɛmba ne ba do.’”
6 Ntsi esuafo no kɔree kɛyɛɛ dza Jesus kaa kyerɛɛ hɔn no pɛpɛɛpɛr.
7 Na wɔdze asoasopɔnkɔ no nye ne ba no bae, na wɔdze hɔn ntar ngugudo guu hɔn do na ɔtsenaa do.
8 Na nyimpadɔm no mu dodowara dze hɔn ntar ngugudo sesɛɛw kwan mu, na binom so twitwaa dua ne nsa* dze sesɛɛw kwan no mu.
9 Nna nyimpadɔm a wodzi n’enyim nye hɔn a wodzi n’ekyir no nyinara kɔr do tseatseaa mu dɛ: “Yɛserɛ wo, gye David ne Ba no! Nhyira nye nyia ɔba wɔ Jehovah ne dzin mu! Yɛserɛ wo, gye no, ɔwo a ewɔ ɔsorsor!”
10 Na aber a ɔbaa Jerusalem no, kurow no mu nyinara yɛɛ gyigyeegye, nna nkorɔfo ribisa dɛ: “Woana nye yi?”
11 Dza nna nyimpadɔm no reka ara nye dɛ: “Oyi nye Jesus, nkɔnhyɛnyi a ofi Nazareth a ɔwɔ Galilee no!”
12 Na Jesus kɔr asɔrfie hɔ kɛpaam hɔn a wɔrotɔn adze nye hɔn a wɔrotɔ adze no nyinara fii hɔ, na obutubutuuw hɔn a wɔsesa sika no hɔn apon nye hɔn a wɔtɔn mbubur no hɔn ngua.
13 Na ɔkaa kyerɛɛ hɔn dɛ: “Wɔakyerɛw dɛ, ‘Wɔbɛfrɛ me fie mpaabɔ fie,’ naaso hom dze reyɛ beebi a epoobɔfo suma.”
14 Na enyifurafo nye mbubuafo baa ne nkyɛn wɔ asɔrfie no mu na ɔsaa hɔn yarba.
15 Aber a asɔfo mpanyimfo no na akyerɛwfo no hun anwanwadze ahorow a ɔyɛe nye mbanyimba a wɔretseatsea mu wɔ asɔrfie hɔ dɛ, “Yɛserɛ wo, gye David ne Ba!” no, hɔn bo fuwii,
16 na wɔkaa kyerɛɛ no dɛ: “Etse dza iyinom reka yi a?” Jesus kaa kyerɛɛ hɔn dɛ: “Nyew. Hom nnkenkaan dɛ, ‘Mbofra na enumfoanomba hɔn anomu na ɔwo ama ayɛyi efi aba’?”
17 Na ogyaa hɔn hɔ fii kurow no mu kɔr Bethany na ɔdaa hɔ ma adze kyee.
18 Na aber a ɔresan akɔ kurow no mu anapatutuutu no, ɔtsee dɛ kɔm dze no.
19 Na ohun adɔmbadua bi wɔ kwan no ho, ntsi ɔkɔr ho, naaso oennhu hwee wɔ do dɛ ahataw nkotsee. Ntsi ɔkaa kyerɛɛ dua no dɛ: “Mma nnsow aba bio dabiarada.” Na amonmu hɔ ara, adɔmbadua no kyenkyenee.
20 Aber a esuafo no hunii no, hɔnho dwuruuw hɔn, na wɔkaa dɛ: “Ɔbaa no dɛn na adɔmbadua no kyenkyeen amonmu hɔ ara no?”
21 Jesus kaa kyerɛɛ hɔn dɛ: “Nokwar mese hom dɛ sɛ hom wɔ gyedzi na sɛ hom adwen ennhihim a, ɔnnyɛ dza medze yɛɛ adɔmbadua yi nkotsee na hom bɛyɛ, mbom sɛ hom ka kyerɛ bepɔw yi mpo dɛ, ‘Tutu kogu po mu’ a ɔbɛyɛ hɔ.
22 Na biribiara a hom bɔbɔ mpaa ebisa no, sɛ hom wɔ gyedzi a, hom nsa bɛka.”
23 Afei ɔkɔr asɔrfie hɔ, na aber a ɔrekyerɛkyerɛ no, asɔfo mpanyimfo nye ɔman no mu mpanyimfo baa ne nkyɛn bebisaa no dɛ: “Ebɛn tum na edze yɛ dɛm ndzɛmba yi? Na woana na ɔmaa wo dɛm tum yi?”
24 Jesus yii hɔn ano dɛ: “Hom mma mimbisa hom asɛm kor. Sɛ hom yi me ano a, mo so mebɛka tum kor a medze yɛ dɛm ndzɛmba yi akyerɛ hom:
25 Tum a nna John wɔ a ɔdze numa no, ofi hen? Ofi sor anaa ofi nyimpa?” Naaso ɔyɛɛ huhuhuhu wɔ hɔn mu, na wɔkaa dɛ: “Sɛ yɛka dɛ ofi sor a, obebisa hɛn dɛ, ‘Sɛ dɛm a, ebɛnadze ntsi na hom anngye no enndzi?’
26 Na sɛ yɛka dɛ ofi nyimpa so a, yesuro dza nyimpadɔm no bɛyɛ, osiandɛ hɔn nyinara bu John dɛ ɔyɛ nkɔnhyɛnyi.”
27 Ntsi woyii Jesus ano dɛ: “Yennyim.” Nna ɔno so kaa kyerɛɛ hɔn dɛ: “Sɛ dɛm dze a, ɔno mo so merennka tum kor a medze yɛ dɛm ndzɛmba yi nnkyerɛ hom.
28 “Hom dwen ho dɛn? Nna ɔbarimba bi wɔ mba beenu. Ɔkɔr nyia odzi kan no nkyɛn, na ɔkaa kyerɛɛ no dɛ, ‘Me ba, ndɛ kɔ wenyin haban no mu na kɛyɛ edwuma wɔ mu.’
29 Ɔkaa kyerɛɛ no dɛ, ‘Moronnkɔ,’ naaso ekyir yi onuu noho na ɔkɔree.
30 Ɔkɔr nyia otsia ebien no so nkyɛn, na ɔkaa asɛm kor no ara kyerɛɛ no. Na ɔkaa kyerɛɛ no dɛ, ‘M’egya, mobɔkɔ,’ naaso ɔannkɔ.
31 Hɔn beenu no mu woana na ɔyɛɛ dza n’egya pɛ?” Wɔkaa dɛ: “Nyia odzi kan no a.” Jesus kaa kyerɛɛ hɔn dɛ: “Nokwar mese hom dɛ hɔn a wɔgyegye tow nye tuutuufo apa homho rokɔ Nyankopɔn n’Ahendzi no mu.
32 Osiandɛ John bae bɛkyerɛɛ hom tsenenee kwan, naaso hom anngye no enndzi. Na hɔn a wɔgyegye tow nye tuutuufo dze, wɔgyee no dzii, na aber a hom hun iyi mpo no, hom ennu homho na hom anngye no enndzi.
33 “Hom ntsie mfatoho fofor bi so: Nna ɔbarimba bi wɔ hɔ a ɔyɛ asaasewura, na ɔyɛɛ wenyin haban gyee ho ban. Otuu amona a obekyi no wenyinaba no wɔ mu wɔ haban no mu na ɔtoow abantsentsen wɔ mu. Ɔno ekyir no ɔdze maa ekuafo bi na otuu kwan kɔr ekyirekyir.
34 Ber soo dɛ wɔtsetsew wenyinaba no, ɔsomaa no nkowaa dɛ wɔnkɔ ekuafo no hɔ nkɛgye nedze mbrɛ no.
35 Naaso ekuafo no kyeer no nkowaa no, na wɔboor kor, wokum kor, na wosiiw kor so abo.
36 Ɔsanee somaa nkowaa afofor a wɔdɔɔ so kyɛn hɔn a odzii kan somaa hɔn no, naaso wɔyɛɛ hɔn so dɛmara.
37 Ewiei koraa no, ɔsomaa ne babanyin kɔr hɔn hɔ, na ɔkaa dɛ, ‘Me babanyin dze wɔbɛfɛr no.’
38 Aber a ekuafo no hun ne ba no, wɔkekaa kyerɛɛ hɔnho dɛ, ‘Oyi na obedzi adze no. Hom mbra ma yenku no na yɛmfa n’egyapadze no!’
39 Ntsi wɔkyeer no, na wɔdze no twitwiitwi nye no puei fii wenyin haban no mu kokum no.
40 Hom hwɛ a, sɛ wenyin haban no wura no ba a, ebɛnadze na ɔdze bɛyɛ ekuafo no?”
41 Woyii no ano dɛ: “Osiandɛ wɔyɛ nyimpa bɔn ntsi ɔbɛsɛɛ hɔn pasaa, na ɔaagye no wenyin haban no dze ama ekuafo afofor a hɔn dze sɛ eduaba no sow a wɔdze bɛbrɛ no no.”
42 Jesus kaa kyerɛɛ hɔn dɛ: “Kyerɛwnsɛm no ka dɛ, ‘Ɔbo a adansifo powee no, ɔno na ɔabɛyɛ ɔbo a no ho hia paa* no. Iyi fi Jehovah hɔ, na ɔyɛ nwanwa wɔ hɛn enyiwa do.’ Dɛm asɛm yi hom nnkenkanee a?
43 Dɛm ntsi mereka akyerɛ hom dɛ, Nyankopɔn n’Ahendzi no, wɔbɛgye efi hom nsa mu na wɔdze ama ɔman a ɔrosow Ahendzi no n’aba.
44 Afei so, obiara a ɔbɔhwe ɔbo yi do no, obepira opira a ɔyɛ hu paa. Na obiara a ɔbo yi bɛba abɔhwe no do mpo dze, ɔbɛyam no.”
45 Aber a asɔfo mpanyimfo nye Phariseefo no tsee ne mfatoho ahorow no, wohun dɛ ɔreka hɔn ho asɛm.
46 Ɔwɔ mu dɛ nna wɔpɛ dɛ wɔkyer no dze, naaso nna wosuro dza nyimpadɔm no bɛyɛ, osiandɛ nna wobu no dɛ ɔyɛ nkɔnhyɛnyi.
