Matthew Asɛmpa 25:1-46
25 “Ɔsor Ahendzi no tse dɛ mbaabun du bi a wɔfaa hɔn nkandzea na wopuee dɛ worikehyia ayeforkun bi.
2 Nna hɔn mu beenum yɛ nkwaseafo, na beenum so yɛ enyansafo.*
3 Nkwaseafo no faa hɔn nkandzea naaso wɔammfa ngo annka ho,
4 mbom enyansafo no dze, aber a wɔfaa hɔn nkandzea no, wɔdze ngo guu bɔdambɔ mu kaa ho.
5 Naaso osiandɛ nna ayeforkun no rekyɛr ntsi, hɔn nyinara hyɛɛ ase dɛ wɔrotɔ nkom na wɔdedae.
6 Na odur esuom no, wɔtsee ntseatseamu bi dɛ: ‘Ayeforkun no reba o! Hom mpue nkehyia no.’
7 Afei mbaabun no nyinara soɛree sosɔɔ hɔn nkandzea no.
8 Na nkwaseafo no kaa kyerɛɛ enyansafo no dɛ, ‘Hom mma hɛn hom ngo no bi ɛ, osiandɛ hɛn nkandzea no reyɛ edundum.’
9 Enyansafo no kaa kyerɛɛ hɔn dɛ: ‘Dza yɛwɔ no, sɛ yɛma hom bi a ɔronnso hɛn. Ntsi hom nkɔ hɔn a wɔtɔn bi no hɔ na hom nkɔtɔ homdze.’
10 Aber a wosii mu dɛ wɔrokɔtɔ bi no, ayeforkun no bae. Na mbaabun a wɔayɛ krado no nye no kɔr ayeforhyia aponto no ase, na wɔtoow abow no mu.
11 Ekyir yi, mbaabun nkaa no so bae, na wɔhyɛɛ ase dɛ wɔrobɔ abow no mu dɛ, ‘Owura, Owura, bue hɛn!’
12 Ɔkaa kyerɛɛ hɔn dɛ, ‘Nokwar mese hom dɛ, minnyim hom.’
13 “Dɛm ntsi hom nkɔ do nweɔn, osiandɛ hom nnyim da no anaa dɔn* no.
14 “Bio so, ɔsor Ahendzi no tse dɛ ɔbarimba bi a nna orutu kwan akɔ ekyirekyir na ɔfrɛɛ no nkowaa dze n’egyapadze hyɛɛ hɔn nsa.
15 Ɔmaa hɔn mu kor talɛnt* enum, ɔmaa kor so talɛnt ebien, nna ɔmaa kor so talɛnt kor dɛ mbrɛ obiara n’ahoɔdzen botum, na ɔkɔree.
16 Ntsɛmpanara na akowaa no a wɔmaa no talɛnt enum no dze sika no kɛyɛɛ edwuma, na onyaa enum kaa ho.
17 Dɛmara na akowaa no a wɔmaa no talɛnt ebien no so nyaa ebien kaa ho.
18 Naaso akowaa a wɔmaa no talɛnt kor pɛ no dze, okotutuu famu na ɔdze no wura ne sika* no kesiee hɔ.
19 “Mber tsentsen bi ekyir no, owura no bae nye no nkowaa no bɛyɛɛ nkontaa.
20 Ntsi akowaa a wɔmaa no talɛnt enum no dze talɛnt enum a onyae no kaa ho bae na ɔkaa dɛ, ‘Mo wura, emaa me talɛnt enum; naaso hwɛ, menya talɛnt enum aka ho.’
21 No wura no kaa kyerɛɛ no dɛ: ‘Akowaa pa nokwafo, ayɛ adze! Edzi ndzɛmba kakraabi mu nokwar. Medze ndzɛmba pii bɛhyɛ wo nsa. Bra, enye wo wura mbedzi dɛw.’
22 Afei akowaa a wɔmaa no talɛnt ebien no so bae na ɔkaa dɛ, ‘Mo wura, emaa me talɛnt ebien; naaso hwɛ, menya talɛnt ebien aka ho.’
23 No wura no kaa kyerɛɛ no dɛ: ‘Akowaa pa nokwafo, ayɛ adze! Edzi ndzɛmba kakraabi mu nokwar. Medze ndzɛmba pii bɛhyɛ wo nsa. Bra, enye wo wura mbedzi dɛw.’
24 “Ewiei koraa no akowaa a wɔmaa no talɛnt kor no so bae na ɔkaa dɛ: ‘Mo wura, minyim dɛ eyɛ obi a w’asɛm yɛ dzen, osiandɛ beebi a innduaa aba biara no, hɔ na itwa wo ndɔbaa, na ndɔbaa a ɔnnyɛ ɔwo na ihuuw do no, ɔno na eboaboa ano.
25 Osian iyi ntsi nna musuro, ntsi medze wo talɛnt no kesiee famu. Ɔno nye yi, gye w’adze.’
26 No wura no kaa kyerɛɛ no dɛ: ‘Akowaa bɔn kwadwefo, sɛ inyim ampa dɛ beebi a munnduaa adze no, hɔ na mutwa mo ndɔbaa, na ndɔbaa a ɔnnyɛ emi na muhuuw do no na moboaboa ano a,
27 nna ɔno ebɛnadze ntsi na ammfa me sika* no annkɛma hɔn a wɔbɔ nkorɔfo bosa no?* Nkyɛ mebae yi mibenya me sika no na meenya ho nsiho.
28 “Afei ɔkaa kyerɛɛ no nkowaa no dɛ: ‘Hom ngye talɛnt no mfi ne nsamu, na hom mfa mma obi a ɔwɔ talɛnt du no.
29 Osiandɛ obiara a ɔwɔ bi no, wɔdze bi bɛka dza ɔwɔ no ho, na obenya pii ma wɔaabor do. Naaso obi a onnyi bi no dze, kakra mpo a ɔwɔ no, wɔbɛgye efi ne nsamu.
30 Hom ntow akowaa a mfaso biara nnyi no do no nkyen sum no mu wɔ paado. Hɔ na obosu na ɔaaka ne se esi do dzendzenndzen.’*
31 “Sɛ nyimpa Ba no ba wɔ n’enyimnyam mu a n’abɔfoe nyinara ka no ho a, ɔbɛtsena n’enyimnyam ahengua no do.
32 Wɔbɔboaboa aman nyinara ano wɔ n’enyim, na ɔbɛkyekyɛ hɔn mu dɛ mbrɛ oguanhwɛfo kyekyɛ nguan na mpɔnkye mu no.
33 Na ɔbɛma nguan no egyina ne nsa nyimfa na mpɔnkye no eegyina ne nsa bankum.
34 “Afei Ɔhen no bɛka akyerɛ hɔn a wɔwɔ n’enyimfa no dɛ: ‘Hom mbra, hom a m’Egya ehyira hom, hom mbɛfa Ahendzi a ofitsi wiadze ahyɛse woesiesie ama hom no.
35 Osiandɛ ɔkɔm dzee me na hom maa me biribi ma midzii. Nsukɔm dzee me na hom maa me nsu ma monomee. Nna meyɛ ɔhɔho na hom gyee me tsenaa hom fie.
36 Medaa adagyaw* na hom furaa me tam. Meyaree na hom hwɛɛ me. Nna meda efiadze na hom bɛseraa me.’
37 Na atseneneefo no bebisa no dɛ: ‘Ewuradze, dabɛn na ɔkɔm dzee wo ma yɛmaa wo edziban, anaa nsukɔm dzee wo ma yɛmaa wo nsu nomee?
38 Dabɛn na yehun dɛ eyɛ ɔhɔho ma yɛgyee wo tsenaa hɛn fie, anaa eda adagyaw ma yefuraa wo tam?
39 Na dabɛn na yehun dɛ eyar anaa eda efiadze ma yɛbɛseraa wo?’
40 Na Ɔhen no bɛka akyerɛ hɔn dɛ, ‘Nokwar mese hom dɛ, hom ayɛ ama mo nuanom nkakraba yi mu kor yi ara dze, hom ayɛ ama mara so.’
41 “Afei ɔbɛka akyerɛ hɔn a wɔwɔ ne nsa bankum no dɛ: ‘Hom a wɔadom hom, hom mfi mo do nkɔ gya a onndum da a woesiesie ama Abɔnsam na n’abɔfoe no mu.
42 Osiandɛ ɔkɔm dzee me, naaso hom amma me biribiara enndzi; na nsukɔm dzee me naaso hom amma me nsu annom.
43 Nna meyɛ ɔhɔho naaso hom anngye me anntsena hom fie. Nna meda adagyaw, naaso hom emmfura me tam. Meyaree na mekɛdaa efiadze, naaso hom ammbɔhwɛ me.’
44 Na hɔn so bebisa no dɛ: ‘Ewuradze, dabɛn na yehun dɛ ɔkɔm dze wo, anaa nsukɔm dze wo, anaa eyɛ ɔhɔho, anaa eda adagyaw anaa eyar anaa eda efiadze ma yɛammbɔboa* wo?’
45 Na ɔbɛka akyerɛ hɔn dɛ: ‘Nokwar mese hom dɛ, hom annyɛ amma nkakraba yi mu kor yi ara dze, hom annyɛ amma mara so.’
46 Iyinom bɔkɔ daa ɔsɛɛ* mu, naaso atseneneefo no dze wobenya daa nkwa.”
Ase Hɔ Nsɛm
^ Anaa “mbadwemba.”
^ Anaa “ber.”
^ Nna Greek talɛnt kor no mu dur yɛ 20.4 kg.
^ Greek, “dwetɛ.”
^ Greek, “dwetɛ.”
^ Anaa “ammfa me sika no annkɔto sikakorabea?”
^ Kyerɛ dɛ, no bo bofuw na n’enyidado nyina so bɛsa.
^ Greek kasafua a wɔakyerɛ ase wɔ ha dɛ adagyaw no, obotum akyerɛ dɛ obi nnhyɛ hwee koraa. Naaso obotum so akyerɛ dɛ dza ɔhyɛ no wɔ ase no, ɔno ara nye no, ɔnnhyɛ atar biara nngu do.
^ Anaa “yɛammbɔsom.”
^ Kyerɛ dɛ, wobeyi hɔn nkwa efi hɔ. Greek, “ɔtse dɛ worutwitwa dua bi ho.”
