Matthew Asɛmpa 26:1-75
-
Asɔfo no bɔɔ pɔw dɛ woboku Jesus (1-5)
-
Ɔbaa bi huee ngohuam guu Jesus ne tsirmu (6-13)
-
Apaho afahyɛ a otwa tun, woyii Jesus mae (14-25)
-
Ɔdze Ewuradze Edzidzi no sii hɔ (26-30)
-
Jesus kaa dɛ Peter bɛka dɛ onnyim no (31-35)
-
Jesus kɔbɔɔ mpaa wɔ Gethsemane (36-46)
-
Wɔkyeer Jesus (47-56)
-
Sanhedrin no dzii Jesus n’asɛm (57-68)
-
Peter kaa dɛ onnyim Jesus (69-75)
26 Na aber a Jesus kaa dɛm nsɛm yi nyinara wiei no, ɔkaa kyerɛɛ n’esuafo no dɛ:
2 “Hom nyim dɛ wɔaka nda ebien ma Apaho ber no aso, na wobeyi nyimpa Ba no ama na wɔaabɔ no asɛndua mu.”
3 Na asɔfo mpanyimfo no na ɔman no mu mpanyimfo boaboaa hɔnho ano wɔ sɔfopanyin a wɔfrɛ no Caiaphas ne yaad no mu.*
4 Na wɔbɔɔ pɔw dɛ wɔbɛfa nyansakwan bi do akyer Jesus na woeeku no.
5 Naaso wɔkaa dɛ: “Ɔnnsɛ dɛ ɔyɛ afahyɛ no ase, annyɛ dɛm a amamfo no bɛyɛ begyabegya.”
6 Aber a Jesus wɔ Simon ɔkwatanyi no ne fie wɔ Bethany no,
7 ɔbaa bi a okitsa alabaster bɔdambɔ baa ne nkyɛn. Nna ngohuam a no bo yɛ dzen wɔ bɔdambɔ no mu. Na aber a Jesus ridzidzi no, ɔbaa no huee ngohuam no guu Jesus ne tsirmu.
8 Aber a n’esuafo no hunii no, hɔn bo fuwii na wɔkaa dɛ: “Ebɛnadze ntsi na ɔresɛɛ ngohuam no dɛm?
9 Osiandɛ nkyɛ wobotum atɔn agye sika pii na wɔdze ama ehiafo.”
10 Jesus hun no dɛm no ɔkaa kyerɛɛ hɔn dɛ: “Ebɛnadze ntsi na hom pɛ dɛ hom tseetsee ɔbaa no? Dza ɔayɛ ama me yi yɛ adze pa.
11 Osiandɛ ehiafo dze wɔwɔ hom nkyɛn daa, naaso emi dze, merenntsena hom nkyɛn daa.
12 Aber a ɔbaa yi huee ngohuam no guu mo do no, nna ɔdze risiesie me nyimpadua ama da a wobesie me no.
13 Nokwar mese hom dɛ, wiadze yi mu beebiara a wɔbɛka asɛmpa no, dza ɔbaa yi ayɛ yi so, wɔbɛka dze akaa no.”
14 Afei Duebien no mu kor a wɔfrɛ no Judas Iscariot kɔr asɔfo mpanyimfo no nkyɛn,
15 na ɔkɛkaa kyerɛɛ hɔn dɛ: “Ebɛnadze na hom dze bɛma me ama meeyi no ama hom?” Wɔkaa dɛ wɔbɛma no ndwetɛbona 30.
16 Ntsi ofitsi dɛm aber no rokɔ no, ɔhwehwɛɛ ber pa a obeyi no ama.
17 Da a odzi kan a wodzi Paanoo A Ɔnnkawee* afahyɛ no, esuafo no baa Jesus ne nkyɛn bebisaa no dɛ: “Henfa na epɛ dɛ yekesiesie ma ikedzi Apaho no?”
18 Ɔkaa kyerɛɛ hɔn dɛ: “Hom nkɔ Osimesi nkyɛn wɔ kurow no mu nkɛka nkyerɛ no dɛ, ‘Kyerɛkyerɛnyi no se: “Me ber abɛn; na wo fie na menye m’esuafo no bedzi Apaho no.”’”
19 Ntsi esuafo no kɛyɛɛ dza Jesus kaa kyerɛɛ hɔn no na wɔkɔtotoo ndzɛmba yie maa Apaho no.
20 Odur ewimbir no, Jesus nye esuafo 12 no bɛtsenaa pon ho.
21 Na woridzidzi no, ɔkaa kyerɛɛ hɔn dɛ: “Nokwar mese hom dɛ, hom mu kor beyi me ama.”
22 Iyi maa hɔn werɛ hoow papaapa, na hɔn mu biara hyɛɛ ase dɛ oribisa no dɛ: “Ewuradze, ɔyɛ emi anaa?”
23 Nna ɔkaa kyerɛɛ hɔn dɛ: “Obi a ɔnye me to nsa dzidzi wɔ kyɛnse kor mu no, ɔno na obeyi me ama.
24 Ampa, nyimpa Ba no rokɔ, dɛ mbrɛ wɔakyerɛw afa no ho no, naaso obi a wɔnam no do beyi nyimpa Ba no ama no dze, ondue! Sɛ wɔannwo no mpo a nkyɛ oye.”
25 Judas a oribeyi no ama no bisaa no dɛ: “Rabbi, ɔyɛ emi anaa?” Jesus kaa kyerɛɛ no dɛ: “Woara aka.”
26 Na aber a wogu do ridzidzi no, Jesus faa paanoo, na ohyiraa do wiei no, obubuu mu, na ɔdze maa esuafo no, na ɔkaa dɛ: “Hom ngye ndzi. Iyi gyina hɔ ma me nyimpadua.”
27 Afei ɔfaa kɔɔpow a nsa wɔ mu no, ɔdaa ase na ɔdze maa hɔn na ɔkaa dɛ: “Hom nyinara hom nnom bi,
28 osiandɛ nsa yi gyina hɔ ma mo bɔgyaa a wɔdze reyɛ apam no, ɔno na wobohue egu ama nyimpa pii enya bɔnfakyɛ.
29 Naaso mereka akyerɛ hom dɛ moronnom nsa yi bio dze ekesi da a menye hom bɔnom nsa fofor wɔ m’Egya n’Ahendzi no mu.
30 Afei aber a wɔtoow ayɛyindwom wiei no, wopuei kɔr Ngodua Bepɔw no do.
31 Afei Jesus kaa kyerɛɛ hɔn dɛ: “Dza ɔbɔto me anafua yi no bɔto hom nyinara fintsidua, osiandɛ wɔakyerɛw dɛ: ‘Mobɔbɔ oguanhwɛfo no, na nguan a wɔwɔ nguankuw no mu no bɔbɔ apetse.’
32 Naaso sɛ wonyan me fi ewufo mu a, mibedzi hom enyim kan akɔ Galilee.”
33 Naaso Peter kaa kyerɛɛ no dɛ: “Sɛ dza ɔbɔto wo no bɔto hɔn nyinara fintsidua mpo a, emi dze ɔronnto me fintsidua da!”
34 Jesus kaa kyerɛɛ no dɛ: “Nokwar mese wo dɛ, anafua yi, ansaana akokɔ bɔbɔn no, nna aka no mpɛn ebiasa dɛ innyim me.”
35 Peter kaa kyerɛɛ no dɛ: “Owu mpo a menye wo bowu, merennka dɛ minnyim wo da.” Na dɛmara na esuafo nkaa no nyinara so kae.
36 Afei Jesus nye esuafo no baa beebi a wɔfrɛ hɔ Gethsemane, na ɔkaa kyerɛɛ hɔn dɛ: “Hom ntsena ha na morokɔ hɔ no akɔbɔ mpaa.”
37 Ɔfaa Peter na Zebedee ne mba beenu no kaa noho kɔree, na no werɛ hyɛɛ ase howee na noho yeraaw no papaapa.
38 Na ɔkaa kyerɛɛ hɔn dɛ: “Awerɛhow ahyɛ mo do araa rokɔ owu mu. Hom ntsena ha na hom nkɔ do nye me nweɔn.”
39 Afei ɔkɔr n’enyim kakra, na ɔdze n’enyim butuuw famu bɔɔ mpaa dɛ: “M’Egya, sɛ ɔbɛyɛ yie a, nkyɛ ma dɛm kɔɔpow yi mpa mo ho nkɔ. Naaso nnyɛ dɛ mbrɛ mepɛ, mbom dɛ mbrɛ ɔwo epɛ.”
40 Ɔsanee baa esuafo no nkyɛn na ɔbɔtoo hɔn dɛ wɔadeda, nna ɔkaa kyerɛɛ Peter dɛ: “Ntsi hom enntum nye me annweɔn dɔnhwer kor mpo?
41 Hom nkɔ do nweɔn na hom mbɔ mpaa daa, amma hom aannkɔ nsɔhwɛ mu. Ampa sunsum no dze ɔpɛ, naaso honam no yɛ mberɛw.”
42 Ɔsanee kɔr ne mpɛn a otsia ebien kɔbɔɔ mpaa dɛ: “M’Egya, sɛ ɔrennyɛ yie dɛ kɔɔpow yi bɛpa mo ho akɔ, na nom ara na ɔsɛ dɛ monom dze a, ma wo pɛ nyɛ hɔ.”
43 Na ɔsanee baa bio bɔtoo hɔn dɛ wɔadeda, osiandɛ nna hɔn enyiwa akom paa.
44 Ntsi ogyaa hɔn hɔ, na ɔsanee kɔree kɔbɔɔ mpaa a ɔtɔ do ebiasa, na asɛm kor no ara na ɔsanee kaa no bio.
45 Afei ɔsanee baa esuafo no nkyɛn na ɔkaa kyerɛɛ hɔn dɛ: “Mber a ɔtse dɛm mu na hom ada regye hom ahom yi! Hwɛ, ber aso dɛ woyi nyimpa Ba no hyɛ ndzebɔnyɛfo nsa.
46 Hom nsoɛr ma yɛnkɔ. Hwɛ! Obi a obeyi me ama no edu hɛn nkyɛn ha yi ara.”
47 Na aber a ogu do rekasa no, hwɛ, Duebien no mu kor a wɔfrɛ no Judas bae, na nyimpadɔm a wokitsakitsa nkrantsee na mpɔtsibaa ka no ho. Asɔfo mpanyimfo nye ɔman no mu mpanyimfo no na wɔsomaa hɔn.
48 Nna obi a obeyi no ama no aka akyerɛ hɔn dɛ: “Obi a mibefew n’ano no, ɔyɛ ɔno; hom nkyer no.”
49 Na ɔkɔr Jesus ne nkyɛn tsenn, na ɔkaa kyerɛɛ no dɛ: “Rabbi, asomdwee nka wo o” na ofeew n’ano.
50 Naaso Jesus kaa kyerɛɛ no dɛ: “Me gyafo, ebɛnadze ntsi na aba ha?” Nna wɔbɛkyeer Jesus.
51 Naaso hwɛ, hɔn a wɔka Jesus ho no hɔn mu kor twee ne nkrantsee na otwaa ɔsɔfopanyin no n’akowaa n’asowa fii hɔ.
52 Nna Jesus kaa kyerɛɛ no dɛ: “Fa wo nkrantsee hyɛ n’ananmu, osiandɛ hɔn a wɔtwe nkrantsee nyinara wobowu wɔ nkrantsee ano.
53 Edwen dɛ murunntum nnserɛ m’Egya ma ɔmma me abɔfo mpempem pii* seseiara anaa?
54 Kyerɛwnsɛm no kaa dɛ ɔsɛ dɛ dɛm nsɛm yi sisi. Naaso sɛ meyɛ dɛm a, Kyerɛwnsɛm no besi dɛn aba mu?”
55 Afei Jesus kaa kyerɛɛ nyimpadɔm no dɛ: “Meyɛ ewi na hom dze nkrantsee na mpɔtsibaa aba mo do rebɛkyer me yi a? Da biara nna mebɛtsena asɔrfie hɔ kyerɛkyerɛ, naaso hom annkyer me.
56 Naaso mbrɛ ɔbɛyɛ a dza nkɔnhyɛfo no kyerɛwee no bɛba mu ntsi na iyinom nyinara esisi.” Afei esuafo no nyinara guanee gyaa no hɔ.
57 Hɔn a wɔbɛkyeer Jesus no nye no kɔr ɔsɔfopanyin Caiaphas hɔ. Nna akyerɛwfo no nye mpanyimfo no ehyia mu wɔ hɔ.
58 Naaso Peter kɔr do dzii n’ekyir wɔ ekyirekyir, na ɔbae araa bodur ɔsɔfopanyin no ne yaad no mu. Afei owuraa mu, na ɔkɛtsenaa asomfo a wɔwɔ fie hɔ no nkyɛn dɛ ɔrohwɛ dza obesi.
59 Nna asɔfo mpanyimfo no nye Sanhedrin no nyinara rohwehwɛ adanse bi a ɔnnyɛ nokwar etsia Jesus ama woeegyina do eku no.
60 Na adasefo atorfo pii bae, naaso woennya biribiara enntsia no. Ekyir yi nyimpa beenu bi bae,
61 na wɔkaa dɛ: “Ɔbarimba yi kaa dɛ, ‘Mubobubu Nyankopɔn n’asɔrfie no na medze ndaansa esi.’”
62 Wɔkaa dɛm no ɔsɔfopanyin no soɛree na obisaa no dɛ: “Dza wɔreka yi, eka ho dɛn? Dza mbarimba yi reka tsia wo yi ɔyɛ nokwar a?”
63 Naaso Jesus yɛɛ dzinn. Ntsi ɔsɔfopanyin no kaa kyerɛɛ no dɛ: “Ka Nyankopɔn tseasefo no ntam, sɛ ɔwo nye Christ, Nyankopɔn ne Ba no a, ka kyerɛ hɛn!”
64 Jesus yii no ano dɛ: “Woara aka. Naaso mereka akyerɛ hom dɛ: Ofitsi ndɛ rokɔ no, hom bohu dɛ nyimpa Ba no tsena Otumfo no ne nsa nyimfa na ɔnam ɔsor mununkum mu reba.”
65 Afei ɔsɔfopanyin no tseew n’atar ngugudo no mu na ɔkaa dɛ: “Ɔaka ebususɛm! Ebɛn adasefo bio na yehia? Hwɛ, nkyɛ hom atse ebususɛm a ɔaka no?
66 Hom dwen ho dɛn?” Nna wɔkaa dɛ: “Ɔsɛ dɛ woku no.”
67 Nna wɔtotoo ntafi guu n’enyim, na wɔbobɔɔ no ekutuku. Binom so bobɔɔ no asotɔr,
68 na wɔkaa dɛ: “Christ, sɛ eyɛ nkɔnhyɛnyi ampa a, kyerɛ hɛn obi a ɔbɔɔ wo no.”
69 Nna Peter tsena yaad no mu* hɔ, na abaawa bi baa ne nkyɛn bɛkaa kyerɛɛ no dɛ: “Nkyɛ nna woara so ka Galileenyi Jesus no ho?”
70 Naaso ɔkaa no wɔ hɔn a wɔwɔ hɔ no nyina enyim dɛ ɔnnyɛ nokwar. Ɔkaa dɛ: “Asɛm a ereka yi, minnyim ho hwee.”
71 Aber a obegyinaa yaad no n’abowano hɔ no, basiaba bi so hun no na ɔkaa kyerɛɛ hɔn a wɔwɔ hɔ no dɛ: “Nna dɛm ɔbarimba yi so ka Nazarethnyi Jesus no ho.”
72 Ɔsanee kaa bio dɛ ɔnnyɛ nokwar, na ɔkaa ntam mpo dɛ: “Minnyim ɔbarimba no!
73 Ɔyɛɛ kakra no, hɔn a wogyinagyina hɔ no so bae bɛkaa kyerɛɛ Peter dɛ: “Biribiara kyerɛ dɛ eka hɔn ho, adze yi ara wo kasaa mpo kyerɛ.”
74 Hɔ no ara na Peter hyɛɛ ase kaa ntam dzii nsew dɛ: “Minnyim ɔbarimba no!” Na amonmu hɔ ara akokɔ bɔnee.
75 Na Peter kaa asɛm a Jesus kaa kyerɛɛ no no. Ɔkaa dɛ: “Ansaana akokɔ bɔbɔn no, nna aka no mpɛn ebiasa dɛ innyim me.” Na opuee abowano kosuu yayaayaw.
Ase Hɔ Nsɛm
^ Anaa “n’abangua no do.”
^ Anaa “Paanoo A Nkaweedur Nnyi Mu.”
^ Kyerɛ dɛ, asafokuw 12.
^ Anaa “abangua no do.”
