Matthew Asɛmpa 27:1-66
27 Adze kyee no, asɔfo mpanyimfo no nye ɔman no mu mpanyimfo no nyinara kaa hɔn tsir paam ho na wɔdwendween mbrɛ wobesi eku Jesus no ho.
2 Wɔkyekyeer ne nsa, na wɔnye no kɛmaa ambrado Pilate.
3 Afei Judas a oyii Jesus mae no hun dɛ woebu no kumfɔ no, onuu noho na ɔdze ndwetɛbona 30 no sanee brɛɛ asɔfo mpanyimfo no na ɔman no mu mpanyimfo no,
4 na ɔkaa kyerɛɛ hɔn dɛ: “Mayɛ bɔn dɛ meyi obi a asɛm biara nnyi no ho ama dɛ wonku no.” Nna wɔkaa kyerɛɛ no dɛ: “Ɔno dze ɔfa hɛnho dɛn? Woara w’asɛm a!”*
5 Ntsi ɔtoow sika* no guu asɔrfie hɔ na ogyaa hɔ, na ɔkɔree kɛsɛɛn noho.
6 Naaso asɔfo mpanyimfo no sesaaw sika no na wɔkaa dɛ: “Mbra mma kwan dɛ yɛdze bɔkɔ bea krɔnkrɔn a wɔdze sika gu no, osiandɛ ɔyɛ bɔgya ho sika.”
7 Aber a wɔdwendween asɛm no ho wiei no, wɔdze sika no kɔtɔɔ ɔwemfo asaase no dɛ wobesie ahɔho wɔ hɔ.
8 Ntsi dze besi ndɛ, wɔda ho ara frɛ dɛm bea no Bɔgya Asaase.
9 Iyi maa asɛm a wɔnam nkɔnhyɛnyi Jeremiah* do kae no baa mu. Ɔkaa dɛ: “Na wɔgyee ndwetɛbona 30 no, bo a wotwae too nyimpa no do no, onyimpa a Israelmba binom twaa bo too no do no,
10 na wɔdze tɔɔ ɔwemfo asaase no, dɛ mbrɛ ahyɛdze a Jehovah dze maa me no tse no.”
11 Afei Jesus begyinaa ambrado no n’enyim, na ambrado no bisaa no dɛ: “Ɔwo nye Jewfo no hɔn Hen no anaa? Jesus yii no ano dɛ: “Woara aka.”
12 Na asɔfo mpanyimfo no nye ɔman no mu mpanyimfo no bɔɔ no sombo, naaso ɔannka hwee.
13 Nna Pilate bisaa no dɛ: “Ntsi nsɛm beberebe a wɔreka to wo do yi enntse a?”
14 Naaso oennyi no ano; oemmbue n’ano mpo, na iyi yɛɛ ambrado no nwanwa paa.
15 Sɛ odu Apaho afahyɛ biara a, nna ambrado no taa gyaa hɔn a wɔda efiadze no mu kor ma nyimpadɔm no. Nna nyimpadɔm no na wɔkyerɛ obi a ongyaa no.
16 Dɛm aber no so nna ɔdzebɔnyɛnyi bi a wɔfrɛ no Barabbas da efiadze. Nna ɔagye dzin bɔn papaapa.
17 Ntsi aber a nyimpadɔm no behyiaa mu no, Pilate bisaa hɔn dɛ: “Woana na hom pɛ dɛ migyaa no ma hom, Barabbas anaa Jesus a wɔse ɔyɛ Christ no?”
18 Nna Pilate nyim dɛ ɔtan hun ntsi na wɔdze no aba n’enyim no.
19 Na aber a ɔtsena egua mu rubu atsɛn no, ne yer somae ma wɔbɛkaa kyerɛɛ no dɛ: “Mma mmfa woho nngyegye onyimpa tseneneenyi yi n’asɛm mu, osiandɛ mehu amandze pii ndɛ wɔ adaaso mu osian ɔbarimba yi ntsi.”
20 Naaso asɔfo mpanyimfo no nye ɔman no mu mpanyimfo no tutui guu nyimpadɔm no hɔn asowa mu dɛ wɔmma wongyaa Barabbas na wonku Jesus mbom.
21 Ntsi ambrado no sanee bisaa hɔn bio dɛ: “Nyimpa beenu yi mu woana na hom pɛ dɛ migyaa no ma hom?” Woyii no ano dɛ: “Barabbas.”
22 Nna Pilate bisaa hɔn dɛ: “Ntsi Jesus a wɔse ɔyɛ Christ no, menyɛ no dɛn?” Hɔn nyinara kaa dɛ: “Bɔ no asɛndua mu!”
23 Obisaa hɔn dɛ: “Ebɛnadze ntsi a? Ebɛn bɔn paa na ɔayɛ?” Naaso nna tsea ara na wɔretseatsea mu dzendzenndzen dɛ: “Bɔ no asɛndua mu!”
24 Aber a Pilate hun dɛ dza ɔyɛe no nyinara ennkesi hwee na nyimpadɔm no ahyɛ ase reyɛ begyabegya no, ɔfaa nsu hohoor ne nsa ho wɔ hɔn enyim, na ɔkaa dɛ: “Minndzi ɔbarimba yi no bɔgyaa ho fɔ. Dza hom dze bɛyɛ no biara homara hom asɛm a.”
25 Ɔkaa dɛm no, nyimpadɔm no nyinara kaa dɛ: “Ma no bɔgyaa mbogu yɛnye hɛn mba etsifi.”
26 Ntsi ogyaa Barabbas maa hɔn, naaso Jesus dze ɔmaa wɔhwee no na ɔdze no maa hɔn dɛ wɔnkɔbɔ no asɛndua mu.
27 Afei ambrado no n’asogyafo no dze Jesus kɔr ambrado no ne fie na wɔboaboaa asogyafo no nyinara ano ma wobotwaa no ho hyiae.
28 Woyii n’atar no, na wɔdze tam kɔkɔɔ bi furaa no,
29 na wɔdze nsoɛ ween ahenkyɛw hyɛɛ ne tsir na wɔdze ndzɛmbir* kitsaa ne nsa nyimfa, na wobuu ntwɛr wɔ n’enyim dzii no ho fɛw. Wɔkaa dɛ: “Jewfo hɔn Hen, asomdwee nka wo o!”
30 Na wɔtotoo ntafi guu no ho na wɔgyee ndzɛmbir no fii ne nsamu dze hwehwee ne tsirmu.
31 Ekyir yi aber a wodzii no ho fɛw wiei no, woyii tam no fii no ho na wɔdze n’atar ngugudo no hyɛɛ no na wɔdze no kɔr dɛ wɔrokɔbɔ no asɛndua mu.
32 Aber a worupue akɔ no, wohyiaa ɔbarimba bi a ofi Cyrene a wɔfrɛ no Simon, na wɔhyɛɛ no ma ɔsoaa dua a wɔrekɛsɛn Jesus wɔ do no.
33 Na aber a wodur beebi a wɔfrɛ hɔ Golgotha a n’asekyerɛ nye Tsidwerba no,
34 wɔmaa no nsa a wɔdze bɔwen afora mu dɛ ɔnnom;* naaso aber a ɔdze kaa n’ano no, ɔannom.
35 Na aber a wɔbɔɔ no asɛndua mu no, wɔtwee tonto dze kyɛɛ n’atar ngugudo no,
36 na wɔtsenatsenaa hɔ weɔɔn no.
37 Afei so wɔkyerɛɛw sombo a wɔdze bɔɔ no no bɔɔ n’etsifi. Wɔkyerɛɛw dɛ: “Oyi nye Jewfo hɔn Hen a wɔfrɛ no Jesus no.”
38 Na wɔbɔɔ epoobɔfo beenu bi asɛndua mu kaa no ho, nna kor wɔ ne nsa nyimfa, na kor so wɔ ne nsa bankum.
39 Na hɔn a worutwa mu wɔ hɔ no kasae tsiaa no na wɔwosoow hɔn tsir.
40 Wɔkaa dɛ: “Ɔnnyɛ ɔwo na ekaa dɛ ibodwuruw asɔrfie no egu na edze nda ebiasa eesi yi bi a? Gye woho ɛ! Sɛ eyɛ Nyankopɔn ne Ba ampa a, sian fi dua no do!”
41 Asɔfo mpanyimfo no, nye akyerɛwfo no nye ɔman no mu mpanyimfo no so hyɛɛ ase dzii no ho fɛw dɛmara. Wɔkaa dɛ:
42 “Ɔgyee nkorɔfo; naaso nankasa dze onntum nngye noho! Sɛ ɔyɛ Israelhen ampa a, onsian mfi asɛndua no do na yɛbɛgye no edzi.
43 Ɔdze noho ato Nyankopɔn do; nkyɛ ɔkaa dɛ, ‘Meyɛ Nyankopɔn ne Ba’ bi a? Ntsi sɛ Nyankopɔn pɛ n’asɛm a, ɔmbɛgye no ɛ.”
44 Dɛmara so na epoobɔfo a wɔbɔɔ hɔn asɛndua mu kaa no ho no hyehyɛɛ no ahorba.
45 Na ofitsi dɔn a otsia esia* kesi dɔn a otsia akron* no, sum baa asaase no nyinara do.
46 Na bɛyɛ dɔn a otsia akron no, Jesus dze ndze kɛse tseaa mu dɛ: “Eli, Eli, lama sabachthani?” n’asekyerɛ nye dɛ, “Me Nyankopɔn, me Nyankopɔn, ebɛnadze ntsi na apow me yi?”
47 Aber a hɔn a wogyinagyina hɔ no tsee dza ɔkae no, hɔn mu binom kaa dɛ: “Ɔbarimba yi refrɛ Elijah.”
48 Na ntsɛmara na hɔn mu kor dze mbirika kɛfaa sapɔw dze bɔɔ nsa a wɔakaw mu, na ɔdze sɛɛn ndzɛmbir do brɛɛ no dɛ ɔnnom.
49 Naaso hɔn a wɔaka no kaa dɛ: “Gyaa no, ma yɛnhwɛ dɛ Elijah bɛba abɛgye no a.”
50 Afei Jesus dze ndze kɛse tseaa mu bio na ogyaa no sunsum mu.*
51 Na hwɛ, ntwamutam a ɔwɔ asɔrdan mu hɔ no mu tseew ebien, ofi sor kesi ase, na asaase wosowee, na abotan mu paapaae.
52 Na nda* do buebuei, na akrɔnkrɔmfo a woewuwu* no hɔn mu pii hɔn efun puepuei
53 ma nyimpa pii hunii (Jesus no wusoɛr ekyir no, nyimpa bi a wɔkɔr esiei hɔ bi no kɔr kurow krɔnkrɔn no mu).
54 Na aber a sogyanyi panyin no nye hɔn a wɔka no ho ma wɔroweɔn Jesus no hun asaasewosow no nye dza orisisi no, hɔn akoma tuu paa na wɔkaa dɛ: “Nyankopɔn ne Ba nye yi ampa.”
55 Nna mbaa beberee gyinagyina ekyir a wɔrohwɛ dza ɔrokɔ do no. Dɛm mbaa yi na wodzii Jesus n’ekyir fii Galilee, nna hɔn na wɔsom no.
56 Hɔn mu binom nye Mary Magdalene, James na Joses hɔn maame Mary, nye Zebedee ne mba no hɔn maame.
57 Afei ɔdze rokɔ ewimbir no, osikanyi bi a ofi Arimatea a wɔfrɛ no Joseph baa hɔ, nna ɔabɛyɛ Jesus no suanyi.
58 Dɛm ɔbarimba yi kɔr Pilate hɔ na ɔkɛserɛɛ no dɛ ɔmfa Jesus no fun no mma no. Na Pilate kaa dɛ wɔmfa mma no.
59 Joseph kɛfaa fun no, na ɔdze tam* pa a n’enyi tsew kyekyeer ho,
60 na ɔdze no kɔtoo nankasa ne nda* fofor a nna oetwa no wɔ ɔbotan mu no mu. Na opiaa bobaa kɛse bi dze kataa ano, na ogyaa hɔ kɔree.
61 Naaso Mary Magdalene nye Mary kor no dze wɔannkɔ, mbom wɔtsenaa nda no enyim.
62 Da a odzi hɔ a ɔyɛ Ahosiesieda no ekyir no, asɔfo mpanyimfo nye Phariseefo no boaboaa hɔnho ano kɔr Pilate hɔ,
63 na wɔkaa kyerɛɛ no dɛ: “Owura, yɛkaa dɛ aber a ɔbarimba kɔhwinyi no tse ase no ɔkaa dɛ, ‘Nda ebiasa ekyir no mobɔsoɛr.’
64 Ntsi ma wɔnkɔweɔn nda no yie paa nkɛpem da a otsia ebiasa no, amma n’esuafo no aammba emmbowia no, na wɔannkɛkeka annkyerɛ nkorɔfo dɛ, ‘Woenyan no efi ewufo mu!’ Ɔba no dɛm a dɛm ndaadaasɛm yi bɛkyɛn dza odzi kan no koraa.”
65 Nna Pilate kaa kyerɛɛ hɔn dɛ: “Hom mfa aweɔmfo nkɔ. Na hom nkɔbɔ ho ban dɛ mbrɛ hom botum biara.”
66 Ntsi wɔkɔree kesiiw nda no ano na wɔmaa aweɔmfo weɔɔn hɔ.
Ase Hɔ Nsɛm
^ Anaa “Woara wo gyegyiregye!”
^ Anaa “ndwetɛbona.”
^ Matthew n’aber do no, ɔbɛyɛ dɛ nna wɔdze dzin “Jeremiah” gyina hɔ ma nwoma ahorow a nkɔnhyɛfo no kyerɛwee no nyina. Nna Zechariah nwoma no so ka ho.
^ Efuw bi a ɔtse dɛ mfea anaa ahwer.
^ Wɔdze adze bi a ɔyɛ wen foraa nsa mu maa no dɛ ɔnnom.
^ Kyerɛ dɛ, bɛyɛ ewiaber 12:00.
^ Kyerɛ dɛ, bɛyɛ ewiaber 3:00.
^ Anaa “owui.”
^ Anaa “nkaa nda.”
^ Greek, “wɔadeda.”
^ Anaa “ndwera.”
^ Anaa “nkaa nda.”
