Matthew Asɛmpa 3:1-17
3 Nda no mu no, John Onumanyi bɛkaa asɛm no wɔ Judea sar no do.
2 Ɔkaa dɛ: “Hom nnu homho, na ɔsor Ahendzi* no abɛn.”
3 Na ampaara so, oyi ara nye obi a wɔnam nkɔnhyɛnyi Isaiah do kaa no ho asɛm dɛ: “Obi retsea mu wɔ sar no do dɛ: ‘Hom nsiesie Jehovah no kwan! Hom mma akwan a ɔda n’enyim no ntsen.’”
4 Nna John hyɛ atar a wɔdze efupɔnkɔ no nhwi ayɛ, na bɛlt* bi a wɔdze abowa nwoma ayɛ so bɔ n’asen. Nna n’edziban a odzi nye mbɛbɛw na ewo.
5 Na nyimpa fifi Jerusalem nye Judea nyinara nye Jordan mantɔw no nyinara mu kɔr ne nkyɛn,
6 na onumaa hɔn wɔ Jordan Esutsen no mu,* na wɔpaa mu kaa hɔn bɔn.
7 Aber a ohun dɛ Phariseefo na Sadduceefo pii reba beebi a orunuma nkorɔfo no, ɔkaa kyerɛɛ hɔn dɛ: “Nhurutsia mba, woana na ɔkaa kyerɛɛ hom dɛ hom nguan mfi ebufuhyew a ɔreba no ho?
8 Sɛ dɛm a, hom nsow aba a ɔkyerɛ dɛ hom enu homho.
9 Mma hom nnkeka nnkyerɛ homho dɛ, ‘Hɛn dze, hɛn egya nye Abraham.’ Na mereka akyerɛ hom dɛ Nyankopɔn botum ama Abraham enya mba efi mbobaa yi mu.
10 Ekuma no da ndua no ase dada. Ntsi dua biara a ɔnnsow aba pa no, wobotwa na wɔatow akyen gya mu.
11 Emidze, osiandɛ hom nu homho ntsi na munuma hom wɔ nsu mu no, naaso obi a odzi m’ekyir reba no dze, ɔwɔ tum kyɛn me, na memmfata mpo dɛ mobɔworɔw ne mpaboa. Ɔno dze, ɔdze sunsum krɔnkrɔn na gya na ɔdze bonuma hom.
12 Okitsa no sofi a ɔdze huw hwiit do, na ɔbɛprapra beebi a ɔporow hwiit no kofekofe na ɔbɔboaboa hwiit no ano egu n’adzekoradan mu, na ntsɛw no dze, ɔdze gya a onndum da bɛhyew no.”
13 Afei Jesus fii Galilee baa John hɔ wɔ Jordan Esutsen no ho dɛ onnuma no.
14 Naaso John yɛɛ dɛ orisiw no kwan, na ɔkaa dɛ: “Emi mbom na ɔsɛ dɛ mema inuma me, nna ɔwo reba me nkyɛn yi a?”
15 Nna Jesus kaa kyerɛɛ no dɛ: “Mma nnsiw me kwan, mbrɛ ɔbɛyɛ a yebotum ayɛ ndzɛmba a ɔtsen a ɔwɔ dɛ yɛyɛ nyinara.” Ɔkaa dɛm no oennsiw no kwan bio.
16 Aber a onumaa Jesus wiei no, ntsɛmara na Jesus fii nsu no mu puei; na hwɛ! ɔsor buei, na ohun dɛ Nyankopɔn no sunsum ayɛ tse dɛ ebubur risian ba no do.
17 Afei hwɛ, ndze bi fi sor kaa dɛ: “Oyi nye me Ba a modɔ no na magye no ato mu.”
Ase Hɔ Nsɛm
^ Anaa “Ahenman.”
^ Anaa “abɔyamu.”
^ Anaa “ɔdze hɔn nuu Jordan Esutsen no mu; ɔdze hɔn hyɛɛ Jordan Esutsen no mu.”
