Matthew Asɛmpa 6:1-34
6 “Hom nhwɛ yie na hom annyɛ hom tsenenee wɔ nyimpa enyim mbrɛ ɔbɛyɛ a wobohu; sɛ hom yɛ dɛm a hom rinnya akatua biara mmfi hom Egya a ɔwɔ sor no hɔ.
2 Dɛm ntsi sɛ hom reyɛ adɔyɛ a,* mma hom nnhɛn totorobɛnto nndzi hom enyim, dɛ mbrɛ nyaatwemfo* no yɛ wɔ nhyiamudan nye bagua mu mbrɛ ɔbɛyɛ a nyimpa bohu hɔn na wɔahyɛ hɔn enyimnyam no. Nokwar mese hom dɛ, woenya hɔn akatua nyinara ewie.
3 Na ɔwodze, sɛ ereyɛ adɔyɛ a, mma wo nsa bankum nnhu dza wo nsa nyimfa reyɛ no,
4 ama w’adɔyɛ no aayɛ nsumaa mu adze. Ɔno na w’Egya a ohu nsumaa mu no botua wo kaw.
5 “Afei so, sɛ hom robɔ mpaa a, mma hom nnsuasua nyaatwemfo no, osiandɛ wɔpɛ dɛ wogyina nhyiamudan na bagua mu bɔ mpaa mbrɛ ɔbɛyɛ a nyimpa bohu hɔn. Nokwar mese hom dɛ, woenya hɔn akatua nyinara ewie.
6 Naaso ɔwodze, sɛ erobɔ mpaa a, kɔ wo pia mu, na tow w’abow mu, na bɔ w’Egya a ɔwɔ nsumaa mu no mpaa. Ɔno na w’Egya a ohu nsumaa mu no botua wo kaw.
7 Na sɛ hom robɔ mpaa a, mma hom nntsi asɛm kor no ara mu nnka no mpɛn pii dɛ mbrɛ amanaman mufo no yɛ no, osiandɛ wosusu dɛ hɔn nsɛm pii no ntsi Nyankopɔn betsie hɔn.
8 Mma hom nnsuasua hɔn, osiandɛ hom Egya nyim ndzɛmba a hom hia koraa mpo ansaana hom ebisa no.
9 “Dɛm ntsi hom mfa dɛm kwan yi do mbɔ mpaa:
“‘Hɛn Egya a ewɔ sor, wo dzin ho ntsew.*
10 W’Ahendzi* mbra. Ma w’apɛdze nyɛ hɔ wɔ asaase yi do, dɛ mbrɛ ɔtse wɔ sor.
11 Ma hɛn edziban a yehia no ndɛ da yi;
12 na fa hɛn akaw kyɛ hɛn, dɛ mbrɛ hɛn so yɛdze kyɛ hɔn a wɔdzedze hɛn akaw no.
13 Na mma mmfa hɛn nnkɔ nsɔhwɛ mu, mbom gye hɛn fi ɔbɔnfo no nsamu.’
14 “Na sɛ hom dze nkorɔfo hɔn bɔn kyɛ hɔn a, hom Egya a ɔwɔ sor no so dze homdze bɛkyɛ hom;
15 na sɛ hom ammfa nkorɔfo hɔn bɔn annkyɛ hɔn a, hom Egya no so remmfa homdze nnkyɛ hom.
16 “Sɛ hom reyɛ akɔnkyen* a, mma hom nnyɛ hom enyim mbɔbɔrmbɔbɔr* tse dɛ nyaatwemfo no, osiandɛ wɔma hɔn enyim yɛ mbɔbɔrmbɔbɔr ama nyimpa eehu dɛ wɔreyɛ akɔnkyen. Nokwar mese hom dɛ, woenya hɔn akatua nyinara ewie.
17 Naaso ɔwodze, sɛ ereyɛ akɔnkyen a, fa ngo sera wo tsirmu na hohor w’enyim,
18 amma nyimpa eennhu dɛ ereyɛ akɔnkyen na mbom ama w’Egya a ɔwɔ nsumaa mu no nkotsee eehu. Ɔno na w’Egya a ohu nsumaa mu no botua wo kaw.
19 “Hom ngyaa egyapadze a hom roboaboa ano egu asaase do no. Asaase do dze, mbowaba* na nkandar botum asɛɛ no na ewifo so botum ebubu ekowia.
20 Na mbom, hom mboaboa hom egyapadze ano ngu sor. Hɔ dze, mbowaba na nkandar runntum nnsɛɛ no, na ewifo so runntum mmbubu nnkowia.
21 Na beebi a w’egyapadze wɔ no, hɔ ara so na w’akoma wɔ.
22 “Nyimpadua ne kandzea nye enyiwa. Dɛm ntsi, sɛ w’enyiwa hwɛ tsenn a,* wo nyimpadua no nyinara bɛhyerɛn.*
23 Naaso sɛ w’enyiwa ber adze a,* wo nyimpadua no nyinara bɛyɛ sum. Na sɛ ɔnnyɛ kan na ɔwɔ wo mu na mbom sum na ɔwɔ wo mu a, ɔnodze dɛm sum no, ɔnnyɛ sum kakraba!
24 “Obiara runntum nnsom ewuranom beenu; ɔnyɛ dɛn ara a ɔbɛtan kor na ɔadɔ kor, anaadɛ ɔdze noho bɛfam kor ho na oebu kor no enyimtsia. Hom runntum nnsom Nyankopɔn na ber kor no ara hom nnsan nnsom Ahonyadze.
25 “Dɛm ntsi mereka akyerɛ hom dɛ: Hom ngyaa dɛ hom dwendwen hom nkwa* ho dɛ ebɛnadze na hom bedzi anaadɛ ebɛnadze na hom bɔnom, anaa hom nyimpadua ho dɛ ebɛnadze na hom bɛhyɛ. Nkwa* ho nnhia nnkyɛn edziban, na nyimpadua ho nnhia nnkyɛn atar anaa?
26 Hom ngyen hom enyi nhwɛ wimu nnoma; wonndua aba, wonntwa na wɔmmboaboa ano so nngu adzekoradan mu, naaso hom Egya a ɔwɔ sor no hwɛ hɔn. Hom nnsom bo koraa nnkyɛn hɔn anaa?
27 Hom mu woana na sɛ ɔdwendwen a obotum dze basafa kor mpo aka no nkwa nda ho?
28 Afei so, ebɛnadze ntsi na hom dwendwen atar a hom bɛhyɛ ho? Hom nhwɛ haban mu nhyiren, na hom nsua biribi mfi mbrɛ wosi nyin no mu; wɔnnyɛ edwuma, na wɔnnwen tam so;
29 naaso mereka akyerɛ hom dɛ enyimnyam a nna Solomon wɔ nyinara ekyir mpo no, oenntum ennsiesie noho tse dɛ nhyiren yi mu kor.
30 Na sɛ Nyankopɔn ma haban mu efuw a ɔwɔ hɔ ndɛ na ɔkyena wɔdze egu fononoo mu no atar a, hom hwɛ a ɔrennyɛ dza ɔkyɛn iyi mma hom ma ɔmmbor do a? Hom a hom gyedzi suar.
31 Ntsi mma hom nndwendwen nnka dɛ, ‘Ebɛnadze na yebedzi’ anaa ‘Ebɛnadze na yɛbɔnom?’ anaa ‘Ebɛnadze na yɛbɛhyɛ?’
32 Na iyinom nyinara nye ndzɛmba a amanaman no dzi ekyir dzendzenndzen. Hom Egya a ɔwɔ sor no nyim dɛ hom hia dɛm ndzɛmba yi nyinara.
33 “Ntsi, hom nkɔ do nhwehwɛ Ahendzi no nye Nyankopɔn ne tsenenee kan, na wɔdze ndzɛmba a wɔaka nyinara bɛka ho ama hom.
34 Dɛm ntsi mma hom nndwendwen ɔkyena ho da, na ɔkyena nankasa dze ne dadwen nam. Da biara wɔ nankasa ne haw a ɔdɔɔ so ma da no.
Ase Hɔ Nsɛm
^ Anaa “hom rekyɛ ehiafo adze a.”
^ Anaa “ndabrabafo; hɔn a wɔyɛ hɔnho dɛ atseneneefo.”
^ Anaa “wo dzin nyɛ krɔnkrɔn.”
^ Anaa “W’Aban.”
^ Anaa “Sɛ hom ridzi mbuada.”
^ Anaa “mma hom nnyɛ hom enyim sakoo.”
^ Kyerɛ dɛ, mbowaba bi a wotu na wotum we tam.
^ Greek, “sɛ w’enyiwa tsim adze kor do a.”
^ Anaa “bɛyɛ kann.”
^ Greek, “w’enyiwa dzi bɔn ekyir a.”
^ Anaa “hom kra.”
^ Anaa “Ɔkra no.”
