Matthew Asɛmpa 8:1-34
8 Aber a osianee fii bepɔw no do no, nyimpadɔm pii tui dzii n’ekyir.
2 Na hwɛ, ɔkwatanyi bi bae bɔkotoow no, na ɔkaa kyerɛɛ no dɛ: “Ewuradze, sɛ epɛ a, ibotum asa me yarba.”
3 Ntsi ɔtseen ne nsa kaa no, na ɔkaa dɛ: “Mepɛ! Woho ntɔ wo.” Na amonmu hɔ ara na no kwata no kɔree.
4 Na Jesus kaa kyerɛɛ no dɛ: “Hwɛ na annka annkyerɛ obiara, mbom kɔ, na fa woho kɛkyerɛ asɔfo no, na kɔbɔ afɔr a Moses hyɛɛ ho mbra no, ama hɔnankasa eedzi ho dase.”*
5 Afei, aber a ɔbaa Capernaum no, sogyanyi* panyin bi baa ne nkyɛn, na ɔbɛserɛɛ no dɛ:
6 “Mo wura, m’akowaa ebubu egu hɔ ma ɔda fie, na oruhu amandze papaapa.”
7 Nna ɔkaa kyerɛɛ no dɛ: “Sɛ mudu hɔ a, mebɛsa no yarba.”
8 Sogyanyi panyin no kaa kyerɛɛ no dɛ: “Mo wura, memmfata dɛ eba me fie, ɔwodze ka biribi, na m’akowaa no ho bɔtɔ no.
9 Osiandɛ mara so mehyɛ obi n’ase, na mowɔ nsordaafo so a wɔhyɛ m’ase, na sɛ meka kyerɛ oyi dɛ, ‘Kɔ!’ a, ɔkɔ, na sɛ meka kyerɛ ɔfofor so dɛ ‘Bra!’ a, ɔba, na sɛ meka kyerɛ m’akowaa so dɛ, ‘Yɛ dɛm adze yi!’ a, ɔyɛ.”
10 Aber a Jesus tsee dɛm asɛm yi no, noho dwuruuw no na ɔkaa kyerɛɛ hɔn a wodzi n’ekyir no dɛ: “Mereka nokwar akyerɛ hom, munnhun obiara wɔ Israel a ɔwɔ gyedzi kɛse dɛm.
11 Na mereka akyerɛ hom dɛ, nyimpa pii befi Boka na Anee aba, na wɔnye Abraham na Isaac na Jacob abɛtsena pon ho ato nsa edzidzi wɔ sor Ahendzi no mu.
12 Naaso Ahendzi no ne mba no dze, wɔbɔtow hɔn egu sum no mu wɔ paado. Hɔ na wobosu na wɔaaka hɔn se esi do dzendzenndzen.”*
13 Afei Jesus kaa kyerɛɛ sogyanyi panyin no dɛ: “Kɔ. Na dɛ mbrɛ agye edzi no, ɔmbra mu dɛmara mma wo.” Na akowaa no no ho tɔɔ no amonmu hɔ ara.
14 Na aber a Jesus baa Peter ne fie no, ohun dɛ n’asew basia da hɔ na oenya fiiva.*
15 Ntsi osuoo ne nsa mu, na ne fiiva no kɔree, afei ɔsoɛree na ɔhyɛɛ ase soom no.
16 Na odur ewimbir no, nkorɔfo dze nyimpa pii a wɔwɔ esunsum fi baa ne nkyɛn; na ɔkaa asɛm bi dze tuu esunsum no, na ɔsaa hɔn a wɔyar no nyinara yarba,
17 ama asɛm a wɔnam nkɔnhyɛnyi Isaiah do kae no aaba mu dɛ: “Ɔno na ɔfaa hɛn nyarba na ɔsoaa hɛn yaw.”
18 Aber a Jesus hun dɛ nyimpadɔm etwa noho ehyia no, ɔkaa kyerɛɛ n’esuafo no dɛ wontwa nkɔ nsu no ekyir.
19 Na ɔkyerɛwfo bi bae bɛkaa kyerɛɛ no dɛ: “Kyerɛkyerɛnyi, beebiara a ebɔkɔ no mibedzi w’ekyir.”
20 Naaso Jesus kaa kyerɛɛ no dɛ: “Nsɔ wɔ etu na wimu nnoma wɔ buw, naaso nyimpa Ba no dze onnyi beebi a ɔdze ne tsir to.”
21 Afei osuanyi kor so kaa kyerɛɛ no dɛ: “Ewuradze, ma me kwan ma minkesie me papa ansaana.”
22 Jesus kaa kyerɛɛ no dɛ: “Kɔ do dzi m’ekyir, na ma ewufo nsie hɔn ewufo.”
23 Na aber a ɔfoow hɛmba no, n’esuafo no dzii n’ekyir.
24 Afei hwɛ, ehum kɛse bi tui wɔ po no do ma nna asorɛkye no rekata hɛmba no do; naaso ɔno dze nna ɔada.
25 Ntsi wɔbaa ne nkyɛn benyaan no, na wɔkaa kyerɛɛ no dɛ: “Ewuradze, gye hɛn, na yerubowuwu!”
26 Naaso ɔkaa kyerɛɛ hɔn dɛ: “Ebɛnadze ntsi na hom akoma etu* dɛm? Hom a hom gyedzi suar.” Afei ɔsoɛree na ɔtseaa ehum no nye po no, na ɔtaa dzinn.
27 Iyi maa esuafo no ho boow hɔn na wobisaa dɛ: “Ebɛn nyimpa koraa nye yi? Mframa na po mpo tsie no.”
28 Aber a odur nsu no ekyir wɔ Gadarafo asaase do no, mbarimba beenu bi a wɔwɔ esunsum bɔn* fi esiei* behyiaa no. Nna hɔn enyi do yɛ hegyahegya paa, ntsi nna obiara nntum mmfa dɛm kwan no do osiandɛ nna wosuro hɔn.
29 Na hwɛ, wɔtseatseaa mu kaa dɛ: “Nyankopɔn ne Ba, ebɛnadze na yɛnye wo wɔ yɛ? Aba ha dɛ erebɛhaw hɛn ansaana ber a wɔahyɛ no edu anaa?”
30 Nna mpreko beberee ridzidzi wɔ ekyirekyir hɔ beebi.
31 Ntsi esunsum fi no hyɛɛ ase serɛɛ no dɛ: “Sɛ itu hɛn a, ma yɛnkɛhyɛ mpreko no mu.”
32 Na ɔkaa kyerɛɛ hɔn dɛ: “Hom nkɔ!” Ɔkaa dɛm no wopuei kɛhyehyɛɛ mpreko no mu, na hwɛ, mpreko no nyinara dze mbirika siaan bepɔw no koguu po no mu na wowuwui wɔ po no mu.
33 Na hɔn a wɔhwɛ mpreko no guanee kɔr kurow no mu kɛkaa dza woesi no nyinara, na wɔkaa mbarimba a wɔwɔ esunsum fi no hɔn asɛm no so kaa ho.
34 Na hwɛ, kurow no mufo nyinara puee dɛ worikehyia Jesus, na aber a wohun no no wɔserɛɛ no dɛ omfi hɔn mantɔw no mu hɔ nkɔ.
Ase Hɔ Nsɛm
^ Anaa “wɔaayɛ dasedzi ama hɔn.”
^ Anaa “sordaanyi.”
^ Kyerɛ dɛ, hɔn bo bofuw na hɔn enyidado nyina so bɛsa.
^ Anaa “papu; ibun.”
^ Anaa “hom abɔ hu.”
^ Anaa “esunsum fi.”
^ Anaa “beebi a nkaa nda no wɔ no.”
