Nna Jehovah nnyae mmfaa mbra a otsia abosonsɔr no mmbae, naaso nna Jacob nyim dɛ Jehovah nkotsee na ɔfata dɛ ɔsom no. (Ex 20:3-5) Ntsi, aber a Jehovah kãa kyerɛɛ no dɛ ɔnsan nkɔ Bethel bio no, Jacob kãa kyerɛɛ obiara a nna ɔka noho no dɛ ɔntow n’ehonyi biara a ɔwɔ no ngu. Afei Jacob toow ehonyi no nyinara gui, na ɔtow hɔn asomu nkaba a ɔbɛyɛ dɛ nna ɔno so yɛ nsɛbɛ bi a wɔdze bɔ hɔnho ban no so kaa ho gui. (Ge 35:1-4) Yebotum akã dɛ Jehovah n’enyi sɔɔ dza Jacob yɛe no.

Yɛbɛyɛ dɛn dze ɔsom a ɔfata ama Jehovah nkotsee wɔ hɛn aber yi do? Adze a odzi kan a ɔwɔ dɛ yɛyɛ nye dɛ yɛbɔtwe hɛnho efi biribiara a ɔnye abosonsɔr anaa esumansɛm wɔ biribi yɛ no ho. Iyi bɔhwehwɛ dɛ yeyi ndzɛmba biara a ɔnye abayidze wɔ biribi yɛ no akwa fi hɛn asetsena mu, na yɛyɛ ahwɛyie kɛse wɔ ndzɛmba a yɛdze gyegye hɛn enyi no ho. Dɛ mfatoho no, bisa woho dɛ: ‘Aso mbuukuu anaa sene ahorow a anyɛnsɛm, nsamanfo, na esumansɛm ahyɛ mu mã no na medze gyegye m’enyi? Aso ndzɛmba a medze gyegye m’enyi no da nkongyaayi, edutow, anaa mpaama edzi dɛ biribi a wɔdze ridzi agor bi kɛkɛ?’ Ɔwɔ dɛ yɛtwe hɛnho fi biribiara a Jehovah kyir no ho kora kora.​—Nd 97:10.

HWƐ VIDEO A WƆATO DZIN “HOM NSIW ABƆNSAM KWAN” NO, NA YIYI NSƐMBISA A ODZIDZI DO YI ANO:

• Ebɛn asɛm na osii wɔ Bible suanyi bi a wɔfrɛ no Palesa no asetsena mu?

• Sɛ yehyia nsɛm a ɔfa esumansɛm ho a, ebɛnadze ntsi na ɔwɔ dɛ yɛhwehwɛ mboa fi mpanyimfo no hɔ?

• Sɛ yɛpɛ dɛ yenya Jehovah n’ahobambɔ a, ebɛn ndzɛmba na ɔwɔ dɛ yeyi no akwa fi hɛn asetsena mu?

• Anamɔn a ɔfata bɛn na Palesa tui?

• Ebɛn akwan ahorow na ibotum afa do atwe woho efi esunsum fĩ ho wɔ beebi a etse no?