Jehovah n’asomfo nyina botum ayɛ biribi ama Jehovah a no werɛ nnkefir da. Sɛ ɔwofo bi ne mba yɛ ndzɛmba papa bi ma no a n’enyi sɔ, na no werɛ mmfir. Dɛmara na Jehovah tse, no werɛ mmfir edwuma a yɛyɛ ma no nye ɔdɔ a yɛda no edzi kyerɛ no no. (Mt 6:20; Heb 6:10) Ɔyɛ nokwar dɛ ɔsor dza hɛn mu biara botum ayɛ na hɛn nsɛm tsebea so nnyɛ kor dze, naaso, sɛ yɛyɛ dza yebotum biara wɔ ɔsom a yɛdze ma Jehovah no mu a, yebotum enya enyigye. (Ga 6:4; Col 3:23) Mfe pii nye yi na enuanom mpempem pii asom wɔ Bethel. Aso ibotum etu woho ama na aakɔsom wɔ Bethel anaa? Sɛ wo tsebea remma wo kwan mpo a, ana ibotum ahyɛ obi nkuran ma wɔaakɔsom wɔ Bethel anaa ibotum aboa Bethel ebusua no munyi bi ma ɔaakɔ do asom Jehovah wɔ dɛm kwan soronko yi do?

HWƐ VIDEO A WƆATO DZIN ASO IBOTUM AKƆSOM WƆ BETHEL? NO, NA YIYI NSƐMBISA A ODZIDZI DO YI ANO:

• Ebɛnadze na ɔsɛ dɛ ɔma obi nya ɔpɛ no dɛ ɔbɔkɔ akɔsom wɔ Bethel?

• Ebɛn nhyira na binom se woenya efi Bethel som mu?

• Ebɛnadze na wɔhwehwɛ fi hɔn a wɔpɛ dɛ wɔkɔsom wɔ Bethel no hɔ?

• Ebɛyɛ dɛn ahyehyɛ fɔɔm a wɔdze kɔ Bethel no bi?