Ebɛnadze ntsi na ɔsɛ dɛ yɛnye hɔn a wɔdɔ Jehovah no bɔ? Siantsir no nye dɛ, hɔn a yɛnye hɔn bɔ no botum aboa hɛn ma yaayɛ dza ɔtsen, anaadɛ wobotum ahyɛ hɛn nkuran ma yaayɛ ndzɛmba bɔn. (Mbɛ 13:20) Ma yɛmfa Ɔhen Joash dɛ mfatoho. Mpɛn dodow a ɔkɔr do nye Sɔfopanyin Jehoiada bɔe no, ɔyɛɛ “dza ɔtsen wɔ [Jehovah] enyi do.” (2Mb 24:2) Naaso ber a Jehoiada wui ekyir no, fɛkuw bɔn ntsi Joash gyaa Jehovah n’ekyir dzi.​—2Mb 24:17-19.

Wɔ asomafo no ber do no, ɔsomafo Paul dze Christianfo asafo no totoo “ofi kɛse” ho, na ɔdze asafo no mufo so totoo “ndzɛmba” a wɔdze yɛ adze wɔ fie ho. Ɔnnsɛ dɛ yɛnye hɔn a wɔyɛ dza Jehovah mmpɛ no bɔ dzendzenndzen. Hɔn a wɔtse dɛm no mu bi botum ayɛ hɛn ebusuafo anaa asafo no mufo mpo. Sɛ yɛnye dɛm nkorɔfo no ammbɔ a, yɛbɔkɔ do ayɛ “adze a wobu no bi.” (2Ti 2:20, 21) Ntsi, ɔsɛ dɛ yɛkɔ do fa hɔn a wɔdɔ Jehovah na wɔbɛhyɛ hɛn nkuran ma yaasom no no nyɛnko.

HWƐ VIDEO A WƆATO DZIN KWETSIR FEKUW BƆN NO, NA YIYI NSƐMBISA A ODZIDZI DO YI ANO:

• Yebotum dze hɛnho ahyɛ fɛkuw bɔn mu ber mpo a hɛn enyiwa nnda. Iyi bɛyɛ dɛn esi?

• Wɔ video no mu no, ebɛnadze na ɔboaa Christianfo baasa bi ma wotwaa fɛkuw bɔn mu?

• Ebɛn Bible mu ngyinadonsɛm na obotum aboa wo ma aafa anyɛnkofo pa?