Aban etumfo aboa Jehovah n’asomfo mpɛn pii wɔ abakɔsɛm mu. (Ezr 6:1-12; Es 8:10-13) Ndɛ mpo, sɛ ‘dragon no’ a ogyina hɔ ma Satan Abɔnsam no ma wɔdze ɔtaa a ɔsen waa waa dɛ “esutsen no” ba Nyankopɔn n’asomfo do a, yehu dɛ “asaase no” a ogyina hɔ ma wiadze nhyehyɛɛ yi mu ahyehyɛdze a wɔtse asɛm ase no men dɛm esutsen no. (Ny 12:16) Jehovah yɛ “nkwagye Nyankopɔn,” ntsi ɔtɔfabi a obotum aka aban etumfo hɔn akoma ma wɔaama n’asomfo enya ahotɔ.​—Nd 68:20; Mbɛ 21:1.

Naaso, sɛ hɛn gyedzi ntsi wɔkyer hɛn to efiadze ɛ? Mma innya adwen da dɛ Jehovah eyi n’enyiwa efi wo do. (Ge 39:21-23; Nd 105:17-20) Nya awerɛhyɛmu dɛ wo gyedzi ntsi ibenya akatua, na sɛ ekɔ do kura w’emudzi mu a, ɔbɛhyɛ wo nuanom a wɔwɔ wiadze nyina no nkuran.​—Php 1:12-14; Ny 2:10.

HWƐ VIDEO A WƆATO DZIN WOYII ENUANOM A WƆWƆ KOREA NO FII EFIADZE NO, NA YIYI NSƐMBISA A ODZIDZI DO YI ANO:

• Wɔ mfe a abɛsen mu no, ebɛnadze ntsi na wɔkyeer hɛn nuanom mpempem pii a wɔwɔ South Korea no too efiadze?

• Ebɛn asɛm na wodzii no wɔ asɛndzibea ma ɔno ntsi wodzii kan gyaa hɛn nuanom no bi?

• Wɔdze hɛn nuanom a wɔwɔ wiadze n’afã ahorow pii no ato efiadze osian hɔn gyedzi ntsi. Yɛbɛyɛ dɛn aboa dɛm enuanom yi?

• Ebɛn kwan do na ɔsɛ dɛ yɛdze fahodzi a yɛwɔ no sesei no dzi dwuma?

• Konyim a yedzi wɔ asɛndzii no, woana ankasa na ɔtaa ekyir?