Ofitsi afe 2018 no, hɛn magazine ahorow no mu biara kã asɛntsir kor pɛ ho asɛm. Dɛm magazine ahorow yi nyina ka Edwindadze Etsitsir A Yɛdze Kyerɛkyerɛ no ho. Ntsi yebotum dze edzi dwuma wɔ asɛnka mu. Sɛ yerutu kwan anaa yɛrokɔ gua mu a, yebotum so dze magazine no kakra ahyɛ hɛnho akɔ. Wɔannyɛ magazine ahorow no dɛ yɛmfa nyɛ Bible adzesua, naaso obotum ama obi enya ɔpɛ dɛ obosũa Nyankopɔn ho adze.

Sɛ enye obi hyɛ nkɔmbɔ ase wie a, kenkan kyerɛwsɛm bi kyerɛ no na kã asɛm bi a ɔwɔ magazine bi mu a n’enyi bɛgye ho. Dɛ mfatoho no, sɛ ɔwɔ ebusua anaa oridzi awerɛhow anaa ɔrefa ɔhaw bi mu a, ibotum akã dɛ: “Ndaansa yi ara, mekenkaan asɛm bi a ɔyɛ ahomka fa w’asɛm yi ho. Mubotum dze akyerɛ wo a?” Sɛ ɔkyerɛ ho enyigye a, ibotum dze magazine a woetsintsim no bi ama no, anaa ibotum dze elɛktrɔnek dze no bi amona no wɔ nserahwɛ a odzi kan no ara mu. Ɔwɔ mu dɛ ɔnnyɛ hɛn botae tsitsir nye dɛ yɛbɛkyekyɛ nwoma dze, naaso magazine ahorow no botum aboa hɛn ma yeehu hɔn a wɔwɔ ɔpɛ dɛ wɔbɛyɛ dza worusũa no ho biribi no.​—Adw 13:48.